1 Taga-Corinto 2 - Ti Biblia (1973)

Isakitna ti pamay-anna a panangascasaba.

¹ Ket siac, cacabsat, idi immayac cadacayo, saanac nga immay a binuyog ti kinalaing ti panagsasao wenno ti kinasirib nga inwarragawagco cadacayo ti pannacapanecnec ti Dios.

² Ta pinanggepco a di ammoen ti uray aniaman iti nagtengngaanyo, no saan laeng a ni Jesu-Cristo ken ti pannacailanzana iti cruz.

³ Ket nakipaggianac cadacayo a sicacapuy, ken sibubuteng ken sitatayegteg unay.

⁴ Ket ti panagsaoc ken ti panangascasabac saan a binuyog dagiti macauy-uyot a sao ti kinasirib, no di ket ti pannacaipakita ti Espiritu ken ti pannacabalin:

⁵ Tapno ti pammatiyo saan coma a mabangon iti kinasirib dagiti tattao, no di iti pannacabalin ti Dios.

⁶ Ngem sao-enmi ti sirib cadagiti nataenganen; ngem saan a ti sirib daytoy a lubong, ket saan met a ti sirib dagiti agturay itoy lubong, isuda nga agawawanen:

⁷ Ngem sao-enmi ti nalimed a sirib ti Dios; ti sirib a nailemmeng, isu nga intuding ti Dios idi awan pay ti lubong a maipaay a dayawtayo:

⁸ Isu a saan a naammoan ti uray siasino cadagiti agturay ditoy lubong; ta no naammoanda coma, saanda coma nga inlansa iti cruz ti Apo ti gloria:

⁹ Ngem, cas iti naisurat: A saan a nakita ti mata, ket saan a nangngeg ti lapayag; Ket saan a simrec iti puso ti tao, Dagiti banbanag nga insagana ti Dios cadagiti agayat kencuana.

¹⁰ Ngem ti Dios impacaammona ida cadatayo gapu iti Espiritu; ta ti Espiritu sukimatenna dagiti isu-amin a banbanag, ken dagiti pay nauneg a banbanag ti Dios.

¹¹ Siasino ngarud cadagiti tao ti macaammo cadagiti banbanag ti maysa a tao, no saan a ti espiritu ti tao nga adda kencuana? casta met dagiti banbanag ti Dios awan ti macaammo cadacuada, no di ti Espiritu ti Dios.

¹² Ngem inawattayo, saan a ti espiritu ti lubong, no di ti Espiritu a cucua ti Dios; tapno maammoantayo dagiti banbanag a naparaburan nga inted ti Dios cadatayo.

¹³ Ket dagitoy a banag sao-enmi met, saan a cadagiti sasao nga isuro ti sirib ti tao, no di cadagiti isuro ti Espiritu, nga ipalawagmi dagiti banag a naespirituan cadagiti naespirituan.

¹⁴ Ngem ti tao a linalasag saanna nga awaten dagiti banag ti Espiritu ti Dios; ta kencuana isuda ti cas la kinanengneng; ket dina met ida mabalin nga ammoen, agsipud ta dagitoy, naespirituan ti pannacabigbigda.

¹⁵ Ngem ti tao a naespirituan mailasinna a sipupudno dagiti amin a banbanag ngem isu saan a mailasin ti siasinoman.

¹⁶ Ta Siasino ti nacaammo iti panunot ti Apo, tapno isu isurona coma? Ngem adda cadatayo ti capanunutan ni Cristo.