1 Taga-Corinto 16 - Ti Biblia (1973)

Ti tulong dagiti cristiano cadagiti napanglaw idiay Jerusalem.

¹ No maipapan iti maurnong a maipaay cadagiti sasanto, cas imbilinco cadagiti Iglesia ti Galacia, aramidenyo met ti casta.

² Tunggal umuna nga aldaw ti lawas, tunggal maysa cadacayo, mangilasin ti idulinna cas iti irarangaynanto, tapno intono umayac, saanto a masapul ti agurnong.

³ Ket intono dumtengac, ibaonconto dagidiay anamunganyonto babaen cadagiti surat, tapno ipanda ti paraburyo idiay Jerusalem;

⁴ Ket no maicarinto a mapanac met, makicuyogdanto caniac.

⁵ Ngem umayacto cadacayo inton masarungcarac ti Macedonia; ta masapulco a pagnaen ti Macedonia.

⁶ Ket nalabit makipaggianacto cadacayo, ken aggianac pay iti calamecna, tapno dacayo idalandac iti uray sadino a masapul a papanac.

⁷ Ta diac cayat a makitacayo ita a labasan; ta inanamaec ti agtaeng, iti sumagmamano nga aldaw cadacayo, no ipalubos ti Apo.

⁸ Ngem agsardengacto idiay Efeso agingga iti Pentecostes;

⁹ Ta naluctan caniac ti maysa a ruangan a dackel ken paglaingan, ket dagiti cabusor aduda.

Bagbaga ken panagcablaaw.

¹⁰ Ket no umayto ni Timoteo, kitaenyo tapno aggian cadacayo a di agbutbuteng; ta isu aramidenna ti aramid ti Apo, a cas caniac:

¹¹ Awan ngarud ti mangumsi kencuana; ngem isu idalanyo a sitatalna, tapno umay caniac: ta isu ururayec agraman dagiti cacabsat.

¹² Ngem no maipapan ken cabsat nga Apolos, nagdawatac unay kencuana tapno umay idi cadacayo a makikuyog cadagiti cacabsat, ket dina cayat ti umay ita, ngem umayto intono adda pannacaipaayna.

¹³ Agsalucagcayo, agtalinaedcayo a sititibker iti pammati, agbiagcayo a siiingel, napigsacayo coma.

¹⁴ Maaramid coma dagiti isu-amin nga aramidyo a buyugen ni ayat.

¹⁵ Dawatec cadacayo, cacabsat, (ammoyo a dagiti cabbalay ni Estefanas, isuda ti immun-una a bungbunga ti Acaya, ket indatonda ti bagida iti panagservi cadagiti sasanto),

¹⁶ A paiturayancayo cadacuada ken iti tunggal maysa a tumulong ken agbannog.

¹⁷ Ket agragsacac gapu iti iyaay ni Estefanas, ken ni Fortunato ken ni Acaico; ta ti nagcuranganyo, pinunnoanda.

¹⁸ Ta rinagragsacda ti nakemco ken ti nakemyo: Bigbigenyo ngarud dagiti cacasta.

¹⁹ Cablaawandacayo dagiti Iglesia ti Asia. Da Aquila ken Prisca cablaawandacayo unay iti Apo, agraman ti Iglesia nga adda iti balayda.

²⁰ Isu-amin dagiti cacabsat cablaawandacayo. Agkikinnablaawcayo iti maysa ken maysa a buyugan ti nasantoan nga agep.

²¹ Ti cablaawco, insurat toy imac met laeng, Pablo.

²² No adda di agayat ken Apo Jesu-Cristo, mapagtalaw coma. Ti Apo umay coma.

²³ Ti parabur ni Apo Jesu-Cristo agtaeng coma cadacayo.

²⁴ Agtaeng coma ti ayatco cadacayo amin ken Jesu-Cristo. Amen.