Biblia Todo Logo
Bìoball air-loidhne

- Sanasan -

1 Taga-Corinto 11 - Ti Biblia (1973)


Ti panagdalungdong dagiti babbai iti Iglesia.

1 Tuladendac coma, a cas met iti panangtuladco ken Cristo.

2 Siac daydayawencayo gapu ta cadagiti isu-amin a banag malagipdac ket salimetmetanyo a di agbalbaliw dagiti sursuro a cas idi inyawatco ida cadacayo.

3 Ngem cayatco a maamoanyo coma a ti panguloen ti isu-amin a tao isu ni Cristo, ket ti panguloen ti babai isu ti lalaki, ket ti pannacaolo ni Cristo isu ti Dios.

4 Isu-amin a lalaki nga agcararag wenno mangascasaba nga adda a siabbong ti olona, iccatanna ti dayaw ti olona.

5 Ngem isu-amin a babai nga agcarcararag wenno mangascasaba a saanna a dalungdungan ti olona, iccatanna ti dayaw ti olona; ta cas la adda a nakiskisan.

6 Ta no ti babai saan coma nga agdalungdong, mapukisan coma met: ngem no nacababain iti babai ti mapukisan wenno makiskisan, agdalungdong ngarud.

7 Ta ti lalaki kinapudnoanna a dina rebbeng a dalungdungan ti olona, idinto nga isu ti ladawan ken dayaw ti Dios; ngem ti babai isu ti dayaw ti lalaki.

8 Ta ti lalaki saan a naala iti babai, no di ket ti babai naala iti lalaki:

9 Ket saan met a naparsua ti lalaki a maipaay iti babai, no di ket naparsua ti babai a maipaay iti lalaki:

10 Gapuna rebbeng ti babai ti maaddaan iti ulona ti pagilasinan ti pannacabalin gapu cadagiti angeles.

11 Nupay casta, awan babai nga agwaywayas nga awan lalaki awan met lalaki nga agwaywayas nga awan babai, iti Apo.

12 Agsipud ta ti babai naala iti lalaki, casta met ti lalaki maadda gapu iti babai; ngem amin dagiti banbanag naggapuda iti Dios.

13 Ipatoyo a dacdacayo: maipaay aya a ti maysa a babai agcararag iti Dios a di agdalungdong?

14 Saan aya nga isuro ti sigud a cadawyan cadacayo a no ti lalaki adda atiddag a boocna, nacababain kencuana?

15 Ngem no ti babai adda atiddag a boocna, dayawna: ta ti atiddag a booc maited kencuana a pagdalungdong.

16 Ngem no ti siasinoman a tao supiatenna pay laeng, awan dayta nga ugalitayo, uray pay dagiti Iglesia ti Dios.


Di rumbeng a naaramid cadagiti panaggigimong. Ti maipaay a pannangan iti nasantoan a pangrabii.

17 Ngem iti panangibagac cadagitoy cadacayo, siac dicay dayawen; agsipud ta aguurnongcayo, saan a maipaay iti nasaysayaat, ngem maipaay iti dacdakes.

18 Ta, umuna, nadamagco a no aguurnongcayo iti Iglesia, adda panaglalasin cadacayo; ket patiec bassit.

19 Ta masapul nga adda bongbonggoy a sumupadi cadacayo, tapno maiparangarang cadacayo dagiti mapili.

20 Ngarud idinto nga aguurnongcayo iti maysa a disso, dicay mabalin a canen ti Pangrabii ti Apo:

21 Ta iti pannanganyo, tunggal maysa alaenna ti bucodna a pangrabii; ket adda mabisinan, ket adda mabartec.

22 Ania, awan ti balbalayyo a panganan ken inumanyo? wenno umsienyo ti Iglesia ti Dios, ket babainenyo dagiti napanglaw? Ania ti sao-ecto cadacayo? dayawencayo aya gapu itoy? Saancayo a dayawen.

23 Ta inawatco iti Apo ti inyawatco met cadacayo: a ni Apo Jesus, idi met la a rabii a nayawat, nangala iti tinapay;

24 Ket idi a nacapagiamanen pinisina ket kinunana: Alaenyo, kanenyo. Daytoy ti bagic a mapisi gapu cadacayo. Aramidenyo daytoy a panglaglagip caniac.

25 Ket casta met, innalana ti copa, idi calpasan ti panangrabii, a kinunana: Daytoy a copa isu ti Baro a Tulag iti darac; aramidenyo daytoy, a masansan nga uminumcayo, a maipaay a panglaglagip caniac.

26 Ta no masansan a canenyo daytoy, a tinapay ken uminumcayo iti copa, iwarragawagyo ti ipapatay ti Apo, agingga ti yaayna.

27 Gapuna, siasinoman a manganto iti tinapay wenno uminumto iti copa ti Apo a saan a maicari, macabasolto iti maipapan iti bagi ken dara ti Apo.

28 Ngem tunggal maysa sukimatenna ti bagina; iti casta, sa mangan iti tinapay, ken uminum iti copa.

29 Ta ti mangan ken uminum kanenna ken inumenna ti pannacaocomna met laeng no dina mailasin ti bagi.

30 Gapu itoy adu cadacayo ti nacapuy ken masacsakit, ket adu dagiti naturog.

31 Ngem no sukimatentayo coma dagiti bagbagitayo, saantay coma a maocom.

32 Ngem no maocomtayo, dusaennatay ti Apo, tapno saantayo a madusa a mairaman iti lubong.

33 Gapuna, cacabsatco, no aguurnongcayo a mangan, agiinnuray ti maysa ken maysa.

34 No siasinoman a tao ti mabisin mangan coma iti balayna; tapno dicay aggigimung iti maipaay, iti pacaocoman. Ket dagiti dadduma a banbanag urnosecto inton umayac.

Ti Biblia © 1973 Philippine Bible Society

Philippine Bible Society
Lean sinn:



Sanasan