1 Taga-Corinto 10 - Ti Biblia (1973)

Saantay a pagungeten ti Dios a cas ti inaramid dagidi taga Israel.

¹ Ta diac cayat a dicay maammoan, cacabsat, a dagidi ammatayo addada amin iti baba ti ulep, ket bimmaliasatda amin iti uneg ti taaw;

² Ket nabautizaranda amin ken Moises iti ulep ken iti baybay;

³ Ket nanganda amin iti daydiay met la a pagtaraon a naespirituan;

⁴ Ket imminumda amin iti daydiay met la nga inumen a naespirituan; ta imminumda iti daydiay a bato a naespirituan a sumursurot cadacuada idi: ket daydi a bato isu idi ni Cristo.

⁵ Nupay casta, ti Dios saan a naayayo cadagiti ad-adu cadacuada; ta napucawda idiay let-ang.

⁶ Ket dagidi a banbanag isuda dagiti ulidan cadatayo, tapno ditay aguman dagiti banbanag a dakes, a cas ti panagagumda.

⁷ Dicay met agrucbab cadagiti ladladawan a cas cadagidi dadduma cadacuada; cas adda a naisurat; Nagtugawda dagiti umili a mangan ken uminum, ket timmacderda a nagay-ayam.

⁸ Ditay met makikamalala, a cas inaramid dagiti dadduma cadacuada, ket iti maymaysa nga aldaw napasag dagiti duapulo ket tal-lo a ribo.

⁹ Ditay met ruroden ti Apo, cas inaramid dagiti dadduma cadacuada, ket natayda gapu cadagiti ululeg.

¹⁰ Dicay agtanabutob, cas cadagiti dadduma cadacuada a nagtanabutobda, ket natayda gapu iti agpapatay.

¹¹ Ket dagitoy a banbanag naaramidda cadacuada a pagulidanan ket naisuratda tapno pacabagbagaantayo, a dimtengen dagiti panungpalan dagiti aldaw.

¹² Gapuna, ti mangipagarup nga adda a sitatacder, kitaenna ta di maiculbo.

¹³ Saan nga immay cadacayo ti uray ania a pannacasulisog a di met simro cadagiti isu-amin a tattao: ngem ti Dios mapagtalcan isu a dinto mangipalubos a masulisogcayo iti aglabes iti mabalinanyo; no di ket, maigiddanto iti pannacasulisog, isaganananto met ti dalan a paglissian, tapno mabalinyo a pagballigian.

Ti panagrucbab cadagiti ladawan isu ti pannakipagayam iti sairo.

¹⁴ Gapuna, ay-ayatec, pumanawcayo iti panagrucbab cadagiti ladladawan.

¹⁵ Agsaoac cadacayo a cacas la mamasirib; ipatoyo ti sao-ec.

¹⁶ Ti copa ti bendicion a bendicionantayo, saan aya nga isu ti pannacairaman iti dara ni Cristo? Ti tinapay a pisientayo, saan aya nga isu ti pannacairaman iti bagi ni Cristo?

¹⁷ Agsipud ta adda maymaysa a tinapay, datayo idinto nga adutayo, maymaysatayo a bagi; ta mairamantayo amin iti daydiay maymaysa a tinapay.

¹⁸ Kitaenyo ni Israel cas iti lasag: Dagiti mangan cadagiti datdaton, saanda aya a mairaman iti altar?

¹⁹ Ania ngarud ti cunac? a ti maidaton cadagiti ladladawan adda capapay-anna? wenno ti ladawan adda capapay-anna?

²⁰ Awan, no di ket dagiti banbanag nga idaton dagiti Gentil, idatonda ida cadagiti sairo, a saan nga iti Dios: ket diac cayat nga adda pacairamananyo cadagiti sairo.

²¹ Saanyo a mabalin ti uminum iti copa ti Apo ken iti copa dagiti sairo. Saanyo a mabalin ti mairaman iti panganan ti Apo ken iti panganan dagiti sairo.

²² Wenno gargarientayo aya nga agimun ti Apo? Napigpigsatayo aya ngem isu.

Panagwayawaya ti Cristiano ken ti panagayat iti pada a tao.

²³ Dagiti amin a banag maipalubosda ngem saanda a maipaay amin. Dagiti amin a banag maipalubosda, ngem saanda a maipaay amin a mamatibker.

²⁴ Awan coma ti agagawa iti cabucbucudanna no di ket iti pagimbagan ti sabali.

²⁵ Isu-amin a malaco iti paguragaan, canenyo; a dicay agin-intuud a gapu iti conciencia?

²⁶ Ta ti Apo cucuana ti daga ken dagup ti aglasud kencuana.

²⁷ No awisennacayo ti maysa cadagiti saan a mamati, ket cayatyo ti mapan, dagup ti isangoda cadacayo, kanenyo, a dicay agsalsaludsud a gapu iti conciencia.

²⁸ Ngem no adda agsaonto cadacayo: Daytoy naidaton iti altar: saanyo a canen, gapu iti daydiay nangibaga, ken gapu iti conciencia.

²⁹ Ti conciencia, cunac, saan a ti concienciam no di ket ti concienciana; ta apayapay maocomto ti wayawayac gapu iti conciencia ti sabali?

³⁰ No mairamanac a siyayaman iti Dios, apayapay mababalawacto gapu iti daydiay pagyamanac?

³¹ Gapuna, uray mangancayo, uray uminumcayo, wenno uray ania nga aramidenyo, aramidenyo amin a maipaay iti dayaw ti Dios.

³² Saancay coma nga agbalin a pacaiculboan, uray cadagiti Judio, uray cadagiti Griego, uray iti Iglesia, ti Dios:

³³ A cas met caniac iti isu-amin agawaac nga ay-ayoen dagiti amin a tattao, a saanco a sapulen ti paglaingac, no di ket ti paglaingan dagiti adu, tapno isuda maisalacanda.