1 Taga-Corinto 1 - Ti Biblia (1973)

Cablaaw ken panagyaman.

¹ Ni Pablo, naayab nga agapostol ken Jesu-Cristo, gapu iti pagayatan ti Dios, castamet ni Sostenes a cabsat;

² Isuratda iti Iglesia ti Dios idiay Corinto, nga isuda dagiti napagsanto ken Cristo Jesus, naayaban nga agsanto, agraman cadagiti isu-amin, nga umaw-awag iti nagan ni Apotayo a Jesu-Cristo, iti uray adino a disso, Apoda ken Apotayo:

³ Parabur ken cappia ti Dios nga Amatayo, ken ni Apo Jesu-Cristo maadda coma cadacayo.

⁴ Agnanayon nga agyamanac iti Diosco a maipoon cadacayo, gapu iti parabur ti Dios a naited cadacayo ken Cristo Jesus;

⁵ Gapu ta cadagiti isu-amin a banbanag napabacnangcayo kencuana, iti isu-amin a panagsao, ken iti isu-amin a pannacaammo;

⁶ A cas met ti panangsacsi ni Cristo napanecnecan cadacayo:

⁷ Iti casta saancayo nga nagcurang iti uray ania a talunggading, nga agur-uray ti pannacaiparangarang ni Apotayo a Jesu-Cristo;

⁸ Isu patibkerennacayo agingga iti panungpalan, tapno awan ti pacababalawanyo iti aldaw ni Apotayo a Jesu-Cristo;

Ni Pablo ibalacadna ti panagtutunos.

⁹ Ti Dios mapagtalcan, gapu kencuana naawiscayo iti pannakicaddua ken Jesu-Cristo nga Apotayo.

¹⁰ Dawatec ngarud cadacayo, cacabsat, gapu iti nagan ni Apotayo a Jesu-Cristo a sao-enyo amin coma ti maymaysa a banag, ket awan coma dagiti panaglalasin cadacayo, no di ket naananay coma ti panagtitimpuyogyo iti maymaysa a panunot ken maymaysa a panagricna.

¹¹ Ta nadamagco ti maipapan cadacayo, cacabsatco, cadagiti cabbalay ni Cloe, nga adda sussusic cadacayo.

¹² Cayatco a sao-en daytoy, a tunggal maysa cadacayo cunana: siac caduanac ni Pablo; ket siac caduanac ni Apolos; ket siac caduanac ni Cefas; ket siac caduanac ni Cristo.

¹³ Adda aya a nasinasina ni Cristo? Nailansa aya iti cruz ni Pablo gapu cadacayo wenno nabautizarancayo aya iti nagan ni Pablo?

¹⁴ Agiamanac iti Dios ta diac binautizaran ti uray siasino cadacayono di laeng da Crispo ken Gayo;

¹⁵ Tapno awan coma ti agcuna a nabautizarancayo iti naganco.

¹⁶ Ket binautizarac pay ti sangacabbalayan ni Estefanas; ket diac ammo no adda sabali pay a binautizarac.

¹⁷ Ta saannac nga imbaon ni Cristo a mangbautizar, no di mangicascasaba ti evangelio: saan a buyugen ti kinasirib dagiti sasao, tapno di agbalin nga awan capapay-anna ti cruz ni Cristo.

Ti sirib ti Dios ken ti sirib ti lubong.

¹⁸ Ta ti pacasaritaan ti cruz kinamaag cadagiti mapucaw; ngem cadatayo a maisalacan, isu ti pannacabalin ti Dios.

¹⁹ Ta adda a naisurat: Pucawecto ti kinasirib dagiti mamasirib, Ket ti saririt dagiti nasaririt pagbalinecto nga awan.

²⁰ Adino ti yan ti masirib? adino ti yan ti nasursuroan ti linteg? adino ti yan ti mannakisuppiat itoy agdama a panawen? Saan aya a pinagbalin ti Dios a kinamaag ti sirib ti lubong?

²¹ Idinto ta, gapu iti kinasirib ti lubong, saanna a nabigbig ti kinasirib ti Dios, ti Dios kinayatna nga isalacan dagiti mamati, gapu iti kinanengneng ti pannacaicascasaba.

²² Ta dagiti taga Judea dumawatda cadagiti pagilasinan ket dagiti taga Grecia agsapulda ti sirib:

²³ Ngem ibunannagtayo ni Cristo a nailansa iti cruz, maysa a pacaitibcolan cadagiti taga Judea, ket kinamaag cadagiti Gentil;

²⁴ Ngem cadagiti maayaban, Judio man ken Griego, ni Cristo ti pannacabalin ti Dios ken ti kinasirib ti Dios.

²⁵ Ta ti kinanengneng iti Dios nasirsirib ngem cadagiti tattao, ket ti kinacapuy iti Dios napigpigsa ngem cadagiti tattao.

²⁶ Ta kitaenyo ti pannacaawisyo, cacabsat, ta saan nga adu a mamasirib cas iti linalasag, saan nga adu a mannacabalin, saan nga adu a natan-oc, dagiti maawis.

²⁷ No di ket pinili ti Dios dagiti banbanag a minamaag ti lubong, tapno babainenna dagiti mamasirib; ket dagiti banbanag a nacapuy ti lubong pinili ti Dios, tapno babainenna dagiti napigsa;

²⁸ Ket dagiti banbanag ti lubong nga awan capapay-anda ken dagiti maum-umsi pinili ti Dios, ken dagiti banag a dipay timmaud tapno pucawenna dagiti addan:

²⁹ Tapno awan ti agpasindayag a lasag iti imatang ti Dios.

³⁰ Ngem maipoon kencuana addacay ken Cristo Jesus, isu a gapu iti biang ti Dios, naaramid cadacayo a kinasirib ken kinalinteg ken kinasanto ken subbot:

³¹ Tapno, cas iti naisurat: Ti agrag-o agrag-o coma iti Apo.