1 Samuel 9 - Ti Biblia (1973)

Ni Saul birukenna dagiti asno ni amana. Mapan agsaludsod ken Samuel. Makicaan ken makisao ken ni Samuel.

¹ Adda idi maysa a lalaki ti Benjamin, a ti naganna Cis, nga anac a lalaki ni Abiel, nga anac a lalaki ni Seor, nga anac a lalaki ni Becora, nga anac a lalaki ni Afia, nga anac a lalaki ti maysa a Benjamita, maysa a lalaki a mannacabalin ken maingel.

² Ket isu addaan idi iti maysa nga anac a lalaki, a ti naganna Saul, maysa a lalaki nga agtutubo ken nataer: ket awan idi ti lalaki nga agtutubo a natataer ngem isu ti tengnga dagiti annac ti Israel: manipud iti abagana ken agpangato nataytayag idi ngem iti uray asinoman iti umili.

³ Ket dagiti asno ni amana a Cis napucawda idi. Ket ni Cis kinunana ken Saul nga anacna a lalaki, Mangalaca itatta iti maysa cadagiti adipen ti cacuyogmo, ket tumacderca, ket inca biruken dagiti asno.

⁴ Ket isu linasatna ti caturodan ti Efraim, ket linasatna ti daga ti Salisa, ngem dida ida nabirucan: idin linasatda ti daga ti Saalim, ket idiay awanda met idi: ket isu limmasat iti daga dagiti Benjamitas, ngem dida ida nabirucan.

⁵ Idi nga immayda iti daga ti Suf, ni Saul kinunana iti adipenna nga adda idi kencuana, Umayca, ket agsublita coma, di la ket ta ni amac baybay-anna ti panangaluadna cadagiti asno, ket isu mapadanagto unay a gapu cadata.

⁶ Ket isu kinunana kencuana, Adtoy ita, adda iti daytoy nga ili ti maysa a lalaki ti Dios, ket isu ti maysa a lalaki a nacagun-od iti dayaw; isu-amin a cunana maaramid a di bumurong: ita inta coma idiay; nalabit a mabalinna nga ibaga cadata ti maipapan iti pagnaan isu nga papananta coma.

⁷ Idin kinuna ni Saul iti adipenna, Ngem, adtoy, no inta, ania ti yegta iti lalaki? ta ti taraon nadadaelen cadagiti alicamenta, ket awan ti sagut a yegta iti lalaki ti Dios; ania ti adda cadata?

⁸ Ket ti adipen simmungbat manen ken Saul, ket kinunana, Adtoy, adda iti imac ti apagcapat ti maysa a siclo ti pirac: daydiay itedconto iti lalaki ti Dios, tapno ibagana cadata ti dalanta.

⁹ (Idi ugma iti Israel, no maysa a tao mapan idi agsaludsod iti Dios, castoy ti kinunana, Umaycayo ket intayo coma macakita iti masacbayan; ta dagidiay naganenda ita iti Mammadto nagaladan idi ugma iti Macakita iti masacbayan.)

¹⁰ Idin kinuna ni Saul idi adipenna, Naimbag ti cunam; umayca, inta coma. Iti casta napanda iti ili nga yan idi ti lalaki ti Dios.

¹¹ Idi a sumangsang-atda iti sang-atan nga agpa-ili, isuda nasaracanda dagiti babbalasang a rumrumuarda a mapan sumacdo iti danum, ket kinunada cadacuada, Adda ditoy ti macakita iti masacbayan?

¹² Ket isuda sinungbatanda ida, ket kinunada, Adda; adtoy, adda iti sangom: agdarasca ita, ta isu umay ita nga aldaw iti ili; ta dagiti tattao addaanda iti maysa a sacrificio ita nga aldaw iti nangato a disso.

¹³ Apaman a dumtengca iti ili, dagus a masaracanyonto, iti sacbay ti yuulina iti nangato a disso a mangan; ta dagiti tattao didanto mangan agingga iti di umay, agsipud ta isu ti mangbendicion iti sacrificio; ket sadanto mangan dagidiay a maawis. Ita ngarud sumang-atcayo; ta iti daytoy a tiempo isu masaracanyonto.

¹⁴ Ket simmang-atda iti ili; ket idi a nacagtengda iti uneg ti ili, adtoy, ni Samuel rimmuar nga agturong cadacuada, tapno umuli iti nangato a disso.

¹⁵ Ni Jehova impaltiingna ken Samuel iti maysa nga aldaw iti sacbay ti yaay ni Saul, a kinunana,

¹⁶ Intono bigat iti daytoy met laeng nga horas ibaonconto kenca ti maysa a lalaki a naggapu iti daga ti Benjamin, ket sica pulotamto daydiay tapno isu ti pangulo iti ilic nga Israel; ket isu isalacannanto ti ilic iti ima dagiti Filisteos: ta siac kinitac ti ilic, agsipud ta ti asugda immay caniac.

¹⁷ Ket idi a ni Samuel nakitana ni Saul, ni Jehova kinunana kencuana, Adtoy, ti lalaki isu nga insaoc idi kenca! Daytoy met laeng ti addaanto iti panangituray iti ilic.

¹⁸ Idin ni Saul dimmenna ken Samuel iti ruangan, ket kinunana, Dawatec kenca, ibagam coma caniac, no sadino ti yan ti balay ti macakita iti masacbayan.

¹⁹ Ket ni Samuel simmungbat ken Saul, ket kinunana, Siac ti macakita iti masacbayan; umulica iti sangoc iti nangato a disso, ta dacayo makicaancayto caniac itoy nga aldaw: ket iti bigat palubosancanto a mapan, ket saoecto kenca amin nga adda ita pusom.

²⁰ Ket iti maipapan cadagiti asnom a napucaw idi maicatlo nga aldaw a napalabas, dica panunuten ida; ta nasaracandan. Ket iti siasino ti pacaipaayan ti amin a macalicaguman iti Israel? Saan aya a maipaay kenca, ken iti amin a balay ni amam?

²¹ Ket ni Saul simmungbat ket kinunana, Saan aya a siac ti maysa a Benjamita, iti cababassitan cadagiti capcaputotan ti Israel? Ket ti familiac ti cababassitan dagiti amin a famfamilia ti caputotan ni Benjamin? Apayapay ngarud a saoem caniac iti castoy?

²² Ket ni Samuel innalana da Saul ken ti adipenna, ket inserrecna ida iti laem, ket pinagtugawna ida idi lugar a cangatoan cadagiti a naawis, nga isuda idi dagiti agtallopulo a tattao.

²³ Ket ni Samuel kinunana iti aglutluto, Yegmo ti apag nga intedco kenca isu nga kinunac kenca, Isu ti isaadmo iti dennam.

²⁴ Ket ti aglutluto innalana ti luppo, ken daydi nga adda iti rabawna, ket isu insaadna iti sango ni Saul. Ket ni Samuel kinunana, Adtoy, daydi a naidulin! isu isaadmo iti sangom ket canem; agsipud ta iti nadutocan a tiempo isu naidulin a maipaay kenca, ta kinunac, Siac nagawisac cadagiti tattao. Iti casta ni Saul nakipangan ken Samuel iti daydi nga aldaw.

²⁵ Ket idi immulogda a naggapu iti nangato a disso iti ili, isu nakisarita ken Saul iti toctoc ti balay.

²⁶ Ket isuda bimmangonda a nasapa: ket naaramid idi dandani agbannawag, a ni Samuel inayabanna ni Saul iti toctoc ti balay, a kinunana, Bumangonca, ta papanawenca. Ket ni Saul bimmangon, ket isuda rimmuarda a dua, isu ken ni Samuel.

²⁷ Idi a sumalsalogda iti pungto ti ili, ni Samuel kinunana ken Saul, Paunaem cadata dayta adipen (ket isu immuna), ngem sica agurayca nga umuna, tapno ipangngegco kenca ti sao ti Dios.