1 Samuel 8 - Ti Biblia (1973)

Dagiti annac ni Samuel agocomda a sikikillo. Dagiti Israelitas dawatenda ti maysa nga ari. Ni Samuel supiatenna ida ngem anamonganna ida gapu iti pananguy-uyotda.

¹ Ket naaramid idi a ni Samuel lacayen, nga inaramidna dagiti annacna a lallaki nga oc-ocom iti Israel.

² Ket ti nagan ti inauna nga anacna Joel; ket ti nagan ti maicadua, Abia: isuda idi dagiti oc-ocom idiay Beer-seba.

³ Ket dagiti annacna saanda idi a nagna cadagiti daldalanna, no di ket simmiasida a siaannurot iti kinaagum, ket nagalada cadagiti pannocsoc, ket kinilloda ti kinajusticia.

⁴ Idin dagiti isu-amin a lallacay ti Israel naguornongda a nagtitipon, ket immayda ken Samuel idiay Rama;

⁵ Ket isuda kinunada kencuana, Adtoy sica lacaycan, ket dagiti annacmo a lallaki dida magna cadagiti daldalanmo: ita mangaramidca cadacami ti maysa nga ari a mangocom cadacami a cas cadagiti amin a nasnacion.

⁶ Ngem ti banag saan a nacaay-ayo ken Samuel, idi nga isuda kinunada, Iccannacami iti maysa nga ari a mangocom cadacami. Ket ni Samuel nagcararag ken Jehova.

⁷ Ket ni Jehova kinunana ken Samuel, Ipangagmo ti timec ti ili iti amin a cunada kenca; ta isuda didaca inumsi, no di ket siac ti inumsida tapno saanac coma nga agari cadacuada.

⁸ Cas mayannurot iti amin nga ar-aramid nga inaramidda nanipud iti aldaw a panangaonco cadacuada idiay Egipto agingga met laeng itoy nga aldaw, iti daydiay panangidianda caniac, ket nagservida cadagiti sabsabali a didios, castamet ti aramidenda kenca.

⁹ Ita ngarud ipangagmo ti timecda: ngem sica isupiatmonto a sidadaeg unay cadacuada, ket ipalawagmonto cadacuada ti wagas ti ari nga agarinto cadacuada.

¹⁰ Ket ni Samuel imbagana dagiti amin a sasao ni Jehova iti umili a nagdawat kencuana iti maysa nga ari.

¹¹ Ket isu kinunana, Daytoy isunto ti wagas ti ari nga agarinto cadacayo: isu alaennanto dagiti annacyo a lallaki, ket dutocannanto ida a maipaay kencuana, nga agaywan cadagiti lugluganna, ken tapno isuda dagiti tattaona nga agcabcabayo; ket isuda agtaraydanto iti sango dagiti lugluganna;

¹² Ket isu dutocannanto ida a maipaay kencuana, nga agservi a capcapitan dagiti rinibu, ken capcapitan dagiti linimapulo; ket isu isaadnanto ti dadduma nga agarado iti dagana ken agani iti panaganina, ket aramidenna nga ar-aruatenna iti gubat, ken ar-aruaten dagiti lugluganna.

¹³ Ket isu alaennanto dagiti annacyo a babbai tapno isuda dagiti agararamid iti bangbanglo, ken tapno isuda dagiti aglutluto, ken tapno isuda dagiti agtintinapay.

¹⁴ Ket isu alaennanto dagiti taltalonyo, ken dagiti uvasanyo, ken dagiti caolivaanyo, a dagiti met laeng casasayaatan unay cadacuada, ket itednanto ida cadagiti ad-adipenna.

¹⁵ Ket isu alaennanto ti apagcapullo dagiti bucbukelyo, ken dagiti cauvasanyo, ket itednanto cadagiti pagturayenna, ken cadagiti adipenna.

¹⁶ Ket isu alaennanto dagiti ad-adipenyo a lallaki ken dagiti ad-adipenyo a babbai, ken dagiti cataeran nga agtutuboyo a lallaki, ken dagiti as-asnoyo, ket icabilnanto ida iti trabajona.

¹⁷ Isu alaennanto ti apagcapullo dagiti ar-arbanyo: ket dacayto dagiti ad-adipenna.

¹⁸ Ket dacayo umkiscayto iti daydiay nga aldaw a gapu iti ariyo a piniliyo cadacayo; ket ni Jehova dinto sumungbat cadacayo iti daydiay nga aldaw.

¹⁹ Ngem ti ili dina kinayat a impangag ti timec ni Samuel; ket kinunada, Saan; no di ket dacami cayatmi ti maysa nga ari nga agturay cadacami,

²⁰ Tapno dacami met agbalincami a cas cadagiti amin a nasnacion, ken tapno ti arimi ocomennacami coma, ken rumuar coma iti sangomi, ken makibacal cadagiti gubgubatmi.

²¹ Ket ni Samuel dinengngegna amin dagiti sasao ti umili, ket inulitna ida cadagiti pagdengngeg ni Jehova.

²² Ket ni Jehova kinunana ken Samuel, Ipangagmo ti timecda, ket yaramidam ida iti maysa nga ari. Ket ni Samuel kinunana cadagiti tattao ti Israel, Mapancayo tunggal tao iti ilina.