1 Samuel 7 - Ti Biblia (1973)

Ti lacasa maipan idiay Kiryat-jearim. Dagiti Filisteos maparucmada babaen ti panagcararag ni Samuel. Ni Samuel agocom cadagiti Israelitas.

¹ Ket dagiti tattao a taga Kiryat-jearim immayda, ket innalada nga insang-at daydi lacasa ni Jehova, ket isu inserrecda iti balay ni Abinadab iti turod, ket sinantficarna ni Eleazar nga anacna a lalaki a mangaywan iti daydi lacasa ni Jehova.

² Ket nanipud iti aldaw a ti lacasa nagtaeng idiay Kiryat-jearim, napalabas ti atiddug a tiempo; ta duapulo a tawen: ket amin a balay ti Israel nagasug ken Jehova.

³ Ket ni Samuel nagsao iti amin a balay ti Israel, a cunana, No dacayo agsublicayo ken Jehova iti isu-amin a pusoyo, iwacsiyo ngarud dagiti sabsabali a didios, ken ni Astarot manipud iti tengngayo, ket iturongyo dagiti puspusoyo ken Jehova, ket agservicayo kencuana laeng; ket isu isalacancayto iti ima dagiti Filisteos.

⁴ Idin dagiti annac ti Israel inwacsida dagiti Baales ken ni Astarot, ket nagservida laeng ken Jehova.

⁵ Ket ni Samuel kinunana, Urnongenyo amin nga Israel idiay Mizpa, ket siac agcararagacto ken Jehova ti maipaay cadacayo.

⁶ Ket isuda naguornongda idiay Mizpa; ket nagsacdoda iti danum, ket imbucbocda iti sango ni Jehova, ket nagayunarda iti daydi nga aldaw, ket kinunada idiay, Dacami nagbasolcami iti maicaniwas ken Jehova. Ket ni Samuel inocomanna dagiti annac ti Israel idiay Mizpa.

⁷ Ket idi a dagiti Filisteos nangngegda a dagiti annac ti Israel naurnongda idiay Mizpa, dagiti appoen dagiti Filisteos simmang-atda a maibusor iti Israel. Ket idi a dagiti annac ti Israel nangngegda, isuda nagbutengda idi maipapan cadagiti Filisteos.

⁸ Ket dagiti annac ti Israel kinunada ken Samuel, Dica sumardeng ala nga umawag ken Jehova a Diostayo gapu cadacami, tapno isu isalacannatayo iti ima dagiti Filisteos.

⁹ Ket ni Samuel nangala iti maysa a cordero nga agsuso, ket isu indatagna a maysa a sibubukel a daton a mapuuran ken Jehova: ket ni Samuel immaoag ken Jehova gapu iti Israel; ket ni Jehova simmungbat kencuana.

¹⁰ Ket idi a ni Samuel idatdatagna idi ti daton a mapuuran, dagiti Filisteos immasidegda a manggubat a maibusor iti Israel; ngem ni Jehova naggurrood iti natbag a gurrood iti daydi nga aldaw iti rabaw dagiti Filisteos, ket riniribucna ida; ket isuda napasagda iti sango ti Israel.

¹¹ Ket dagiti lallaki ti Israel rimmuarda iti Mizpa, ket kinamatda dagiti Filisteos, ket kinabilda ida, agingga iti nacagtengda iti baba ti Bet-car.

¹² Idin ni Samuel nangala iti maysa a bato ket isu insaadna iti nagbaetan ti Mizpa ken Sen, ket ingaladna kencuana ti nagan nga Eben-ezer, a kinunana, Agingga ditoy ti nangtulongan ni Jehova cadacami.

¹³ Iti casta dagiti Filisteos naparucmada, ket isuda saanda nga immayen iti beddeng ti Israel: ket ti ima ni Jehova adda idi a maibusor cadagiti Filisteos cadagiti isu-amin nga al-aldaw ni Samuel.

¹⁴ Ket dagiti il-ili nga innala idi dagiti Filisteos iti Israel naisublida iti Israel, manipud Ecron agingga met laeng iti Gat; ket ti beddengna insalacan ti Israel iti ima dagiti Filisteos. Ket adda idi talna iti tengnga ti Israel ken dagiti Amorreo.

¹⁵ Ket ni Samuel inocomanna ti Israel cadagiti amin nga al-aldaw ti panagbiagna.

¹⁶ Ket iti tinawentawen pinagsasaganadna a napanan ti Bet-el, ken Gilgal, ken Mizpa; ket isu inocomna ti Israel isu-amin cadagidiay a luglugar.

¹⁷ Ket isu nagsubli idiay Rama, ta idiay ti yan idi ti balayna ket idiay isu ti nagocomanna iti Israel: ket isu nangibangon idiay iti maysa nga altar ken Jehova.