1 Samuel 6 - Ti Biblia (1973)

Dagiti Filisteos isublida ti lacasa a mapacuyogan cadagiti datdatonda. Ti lacasa maipan idiay Bet-semes, ket ti Beth-semes, nadidigra.

¹ Ket ti lacasa ni Jehova nagyan idi iti daga dagiti Filisteos bayat ti pito a bulan.

² Ket dagiti Filisteos inayabanda dagiti papadi ken dagiti mammadles, a kinunada, Anianto aya ti aramidenmi iti lacasa ni Jehova? ipalawagyo cadacami no casano ti panangisubliminto kencuana iti lugarna.

³ Ket isuda kinunada, No dacayo ibaonyo ti lacasa ti Dios ti Israel, dicayo ibaon nga ongngaong; no di ket saan nga agcurang a supapacanyo kencuana ti maysa a daton iti salungasing: iti casta dacayo maimbagancayonto, ket maipacaammonto cadacayo no apayapay a ti imana saan a naipanaw cadacayo.

⁴ Idin kinunada, Anianto a daton ti salungasing ti isupapacminto kencuana? Ket isuda kinunada, Lima a sinan-bosbosali a balitoc, ken lima a sinan-marabutit a balitoc, a mayanatup cadagiti bilang dagiti appoen dagiti Filisteos; ta maysa a didigra ti nagyan idi cadacayo amin, ken cadagiti appoenyo.

⁵ Gapuna a mangaramidcayo cadagiti ladawan dagiti bosbosaliyo, ken ladawan dagiti marabutityo nga agdadael iti daga; ket dacayo mangtedcayto iti dayaw iti Dios ti Israel: bareng no palag-anannanto ti imana cadacayo, ken cadagiti isu-amin a didiosyo, ken iti isu-amin a dagayo.

⁶ Apayapay ngarud a patangkenenyo dagita puspusoyo, a cas cadagiti Egipcios ken ni Faraon pinatangkenda dagiti puspusoda? Idi nga isu nagaramid a nacascasdaaw unay iti tengngada, dida aya pinalubusan ti ili a napan, ket isuda pimmanawda?

⁷ Gapuna ita mangalacayo ken mangsaganacayo iti maysa a carison a baro, ken dua a vacvaca nga agpasuso, isuda a di pay inayan ti sangol: ket isangolyo dagiti vacvaca iti carison, ket ipanawyo cadacuada dagiti urbonda:

⁸ Ket alaenyo ti lacasa ni Jehova ket isu idisso iti rabaw ti carison; ket icabilyo dagiti alicamen a balbalitoc, nga isupapacyo kencuana a maipaay a daton ti salungasing, iti maysa a caja iti sikiganna; ket isu ibbatanyo, tapno mabalinna ti mapan.

⁹ Ket kitaenyo; no isu sumang-at iti dalan ti beddengna nga agpa-Bet-semes, isu ngarud ti nangaramid cadatayo itoy dackel a dakes: ngem no saan, ammoentayto ngarud a saan a ti imana ti nangcabil cadatayo; gasat laeng ti napasamac cadatayo.

¹⁰ Ket dagiti lallaki inaramidda a casta, ket nangalada cadagiti dua a vacvaca nga agpasuso, ket insangolda ida iti carison, ket impupocda dagiti urbonda iti pagtaenganda;

¹¹ Ket incabilda iti rabaw ti carison daydi lacasa ni Jehova, ken daydi caja agraman cadagiti sinan-marabutit a balitoc ken dagiti ladawan dagiti bosbosalida.

¹² Ket dagiti vacvaca nagnaga iti nalinteg a dalan nga agpa-Bet-semes; isuda ninurnurda ti napatac a dalan, nga nagem-emmacda a magmagna, ket dida simmiasi iti sikig a canawan wenno catigid; ket dagiti appoen dagiti Filisteos simmurotda cadacuada agingga iti beddeng ti Bet-semes.

¹³ Ket dagiti taga Bet-semes agan-anida idi iti trigoda iti lobong; ket intangadda dagiti matada, ket nakitada daydi lacasa, ket nagrag-oda a nacakita kencuana.

¹⁴ Ket ti carison immay iti uneg ti talon ni Josue a Bet-semita, ket nagsardeng idiay, isu a yan idi ti dackel a bato: ket isuda tinuccolda ti cayo ti carison, ket indatonda dagiti vacvaca a maipaay a daton a mapuuran ken Jehova.

¹⁵ Ket dagiti Levitas imbabada daydi lacasa ni Jehova, ken daydi caja nga adda idi a naicuyog kencuana, isu a yan idi dagiti alicamen a balitoc, ket incabilda ida iti dackel a bato: ket dagiti tattao a taga Bet-semes nagidatonda cadagiti datdaton a mapuuran ken nagidatagda cadagiti sacsacrificio iti daydi met laeng nga aldaw ken Jehova.

¹⁶ Ket idi a dagiti lima nga appoen dagiti Filisteos nakitadan, nagsublida idiay Ecron iti daydi met laeng nga aldaw.

¹⁷ Ket dagitoy isuda dagiti sinan-bosbosali a balitoc a dagiti Filisteos insupapacda a maipaay a maysa a daton ti salungasing ken Jehova: gapu iti Asdod maysa, gapu iti Gaza maysa, gapu iti Ascalon maysa, gapu iti Gat maysa, gapu iti Ecron maysa;

¹⁸ Ket dagiti sinan-marabuit a balitoc, mayannurot iti bilang dagiti amin nga il-ili dagiti Filisteos a cucua dagiti lima nga appoen, cadagiti il-ili a nasarikedkedan ken cadagiti purpuroc iti away agpadpada, agingga met laeng iti dackel a bato, isu a nangdissaaganda iti daydi lacasa ni Jehova, bato a siaadda agingga itoy nga aldaw iti talon ni Josue a Bet-semita.

¹⁹ Ket isu kinabilna dagiti tattao a taga Bet-semita, agsipud ta kinitada idi ti uneg ti lacasa ni Jehova, ket kinabilna cadagiti tattao dagiti pitopulo a tattao, ken lima pulo a ribu a tattao; ket ti ili nagpanes, agsipud ta ni Jehova kinabilna ti ili iti dackel a panagpapatay.

²⁰ Ket dagiti tattao a taga Bet-semes kinunada, Siasino ti macabael nga agtacder iti sango ni Jehova, daytoy nasantoan a Dios? ken maipaay iti asino ti sang-atannanto manipud cadatayo?

²¹ Ket imbaonda dagiti babaonen cadagiti agnaed idiay Kiryat-jearim, a kinunada, Dagiti Filisteos insublida daydi lacasa ni Jehova; sumalogcayo, ket alaenyo nga isang-at cadacayo.