1 Samuel 31 - Ti Biblia (1973)

Da Saul ken dagiti annacna a lallaki mapapatayda cadagiti Filisteos; maitabonda idiay Jabes-galaad.

¹ Iti dayta dagiti Filisteos nakigubatda a maibusor iti Israel: ket dagiti lallaki ti Israel nagtarayda ti sango dagiti Filisteos, ket napasagda a natay idiay bantay Gilboa.

² Ket dagiti Filisteos kinamatda a siiinget ni Saul ken dagiti annacna a lallaki; ket dagiti Filisteos pinatayda da Jonatan, ken Abinadab, ken Melquisua, nga annac a lallaki ni Saul.

³ Ket ti gubat dimmegdeg a maibusor ken Saul, ket dagiti panaan isu ti nacamacamda; ket isu nariribuc iti napalalo a gapu cadagiti panaan.

⁴ Idin kinuna ni Saul idi agawawit cadagiti igamna, Asutem ta campilanmo, ket isu ti pangsalputmo caniac, di la ket ta dagitoy di nacugit umayda ket salputendac, ken pagpalaloandac. Ngem ti agawawit cadagiti igamna nagmadi; ta nagbuteng iti napalalo. Gapuna a ni Saul innalana ti campilanna, ket isu ti rinugmaanna.

⁵ Ket idi a ti agawawit cadagiti igamna naimatanganna a ni Saul natayen, isu rinugmaanna met ti campilanna, ket natay a naicanunong kencuana.

⁶ Iti casta ni Saul natay, ken dagiti tallo nga annacna a lallaki, ken ti agawawit cadagiti igamna, ken amin a lal-lakina, idi met laeng nga aldaw a sangcacanunongda.

⁷ Ket idi a dagiti lallaki ti Israel nga adda idi iti sabali a bangir ti lobong, ken dagidiay nga adda iti ballasiw ti Jordan, naimatanganda a dagiti lallaki ti Israel nagtarayda, ket ni Saul ken dagiti annacna a lallaki nataydan; isuda pinanawanda dagiti il-ili, ket nagtarayda; ket dagiti Filisteos immayda ket nagnaedda cadacuada.

⁸ Ket naaramid iti bigat, idi a dagiti Filisteos immayda manglabus cadagiti natay, a nasaracanda ni Saul ken dagiti tallo nga annacna a lallaki a napasagda idiay bantay Gilboa.

⁹ Ket pinutolda ti olona, ket linabusda ti cabalna, ket nagbaonda iti daga dagiti Filisteos iti aglicmut, a nagpaipan cadagiti damdamag agingga iti balay dagiti ladladawanda ken cadagiti tattao.

¹⁰ Ket incabilda ti cabalna iti balay ni Astarot; ket imbitinda ti bangcayna iti bacud ti Bet-san.

¹¹ Ket idi a dagiti agnaed iti Jabes-galaad nangngegda iti maipapan kencuana, daydi a inaramid dagiti Filisteos ken Saul.

¹² Amin dagiti maingel a lallaki timmacderda, ket nagnada a nagpatnag, ket innalada ti bangcay ni Saul, ken dagiti bangcay dagiti annacna a lallaki nanipud iti bacud ti Bet-san; ket immayda iti Jabes, ket pinuuranda idiay.

¹³ Ket innalada dagiti tultulangna, ket intabonda ida iti siroc ti cayo a salamagi idiay Jabes, ket nagayunarda iti pito nga aldaw.