1 Samuel 30 - Ti Biblia (1973)

Dagiti Amalecitas rebbekenda ti Siclag, ket cayawanda dagiti assawa ni David, isu a camacamenna ida ken parmekenna dagiti Amalecitas; subbutenna dagiti assawana ken cucuana, ket bingbingayenna ti samsam.

¹ Ket naaramid, idi a ni David ken dagiti lallakina immayda iti Siclag iti maicatlo nga aldaw, a dagiti Amalecitas nangaramidda iti maysa a panangraut iti Abagatan, ken iti Siclag, ket kinabilda ti Siclag, ket pinuuranda iti apuy.

² Ket innalada a kinayawan dagiti babbai ken amin a nagnaed kencuana, bassit man ken dackel agpadpada: dida pinatay ti uray asinoman, no di ket innalada ida, ket pimmanawda.

³ Ket idi a ni David ken dagiti lallakina dimtengda iti ili, adtoy, a napuuran idi iti apuy; ket dagiti babbai nga assawada, ken dagiti annacda a lallaki ken babbai, naalada idi a kinayawan.

⁴ Idin ni David ken dagiti tattao nga adda idi kencuana inngatoda ti timecda ket nagsangitda agingga iti awanen ti pigsada nga agsangit.

⁵ Ket dagiti dua nga assawa ni David naalada idi a kinayawan, da Ahinoam a Jezreelita, ken Abigail daydi asawa ni Nabal a Carmelito.

⁶ Ket ni David napaldaang iti napalalo; ta ti umili insaona ti pananguborda kencuana, agsipud ta ti cararua ti amin nga umili napaliday, tunggal lalaki a gapu cadagiti annacna a lallaki ken babbai: ngem ni David pinapigsana ti bagina ken Jehova a Diosna.

⁷ Ket ni David kinunana ken Abiatar a padi, nga anac ni Ahimelec, Agdawatac kenca, a yegmo caniac ditoy ni efod. Ket ni Abiatar inyegna idiay ken David ti efod.

⁸ Ket ni David immuman ken Jehova, a cunana, No cumamatac a sumurot itoy a buyot, macamacamco ida? Ket isu simmungbat kencuana, Cumamatca: ta macamacammo ida a di-bumurong, ket awan pagtibcolan masbutmonto amin.

⁹ Iti casta ni David napan, isu ken dagiti innem a gasut a lallaki nga adda idi kencuana, ket immayda iti waig a Beser, isu a nacabatian dagidiay nabaybay-an.

¹⁰ Ngem ni David kimmamat, isu ken ti uppat a gasut a lallaki; ta ti dua gasut nagbatida, a nabannuganda idi iti casta dida nabalin ti nagballasiw iti waig a Beser.

¹¹ Ket nacasaracda ti maysa nga Egipcio iti tay-ac ket isu inyegda ken David ket isu iniccanda iti tinapay, ket nangan; ken iniccanda iti danum tapno uminum;

¹² Ket isu iniccanda iti sangcatipkel nga higos, ken dua caraay nga uvas: ket idi a nacacaan, ti espirituna immay manen kencuana; ta isu saan a nangan iti tinapay, di met imminum iti danum, iti tallo nga aldaw ken tallo a rabii.

¹³ Ket ni David kinunana kencuana, Asino ti makincadua kenca? ken taga anoca? Ket isu kinunana, Maysaac a lalaki nga agtutubo ti Egipto, nga adipen ti maysa nga Amalecita ket ni apoc binaybay-annac, agsipud ta iti tallo nga aldaw a napalabas nagsakitac

¹⁴ Nagaramid cami iti maysa a panangraut iti abagatan dagiti Cereti; ken iti daydiay a cucua ti Juda; ken iti abagatan ti Caleb; ket pinuuranmi ti Siclag iti apuy.

¹⁵ Ket ni David kinunana kencuana, Isalognacto agingga itoy a buyot? Ket isu kinunana, Isapatam caniac gapu iti Dios a dinacto papatayen, dinacto met yawat cadagiti ima ni apoc, ket isalogcanto agingga itoy a buyot.

¹⁶ Ket idi nga isu naisalogna, adtoy, nga isuda addada a naisacnap iti amin a rabaw ti daga, nga agcacaanda ken aginumda, ken agsasalada, a gapu iti amin a naruay a samsam nga innalada iti daga dagiti Filisteos, ken iti daga ti Juda.

¹⁷ Ket ni David kinabilna ida nanipud iti sumipnget agingga laeng iti rumabii ti sumaganad nga aldaw: ket awan ti nacatalaw a lalaki cadacuada, no di laeng uppat a gasut nga agtutubo a lallaki, a simmacayda cadagiti camelloda ket nagtarayda.

¹⁸ Ket ni David nasbutna amin nga innala idi dagiti Amalecitas; ket ni David nasbutna dagiti dua nga assawana.

¹⁹ Ket awan ti agcurang cadacuada, uray bassit wenno dackel, uray annac a lalaki wenno babai, uray samsam, uray aniaman nga innalada idi cadacuada: ni David pinasublina amin.

²⁰ Ket ni David innalana amin dagiti pangen ken dagiti arban, nga inacayda iti sango daydiay sabsabali nga an-animal, ket kinunada, Daytoy isu ti sinamsam ni David.

²¹ Ket ni David immay cadagiti dua a gasut a lallaki, a nabannogan idi iti casta a dida nabalin ti simmurot ken David, isuda a pinagtaengda met idi waig a Beser; ket isuda rimmuarda a simmabet ken David, ken simmabet cadagiti tattao nga adda idi kencuana: ket idi a ni David nacaasideg cadagiti tattao, kinablaawanna ida.

²² Idin dagiti amin a dakes ken nacas-ang a lallaki, cadagidi a napan kimmuyog ken David simmungbatda ket kinunada, Agsipud ta dida nakicuyog cadatayo, ditayto iccan ida ti uray aniaman iti samsam a nasbottayo, no saan laeng a ti tunggal lalaki ni asawana ken dagiti annacna, tapno isu iturongna ida coma, ket pumanaw.

²³ Idin simmungbat ni David, Dicayto aramiden ti casta, cacabsatco, iti daydiay nga inted ni Jehova cadatayo: isu a nangigaga cadatayo, ken nangyawat iti buyot nga immay a maibusor cadatayo cadagiti imatayo.

²⁴ Ket asino ti mangipangagto cadatayo itoy a panggep? ta no casano ti bingay daydiay a simmalog iti gubat, castanto met ti bingay daydiay a nabati iti gargaret: agbingaydanto iti agpada.

²⁵ Ket casta idi nanipud iti daydi nga aldaw ken calpasanna, nga isu nangaramid iti maysa nga alagaden ken linlinteg a maipaay iti Israel agingga ita nga aldaw.

²⁶ Ket idi a ni David immay iti Siclag, nangibaon iti samsam cadagiti lallacay ti Juda, cadagiti met laeng gagayyemna, a kinunana, Adtoy ti maysa nga isagut cadacayo iti sinamsam cadagiti cabusor ni Jehova:

²⁷ Cadagidiay a nagnaed idiay Betel, ken cadagidiay a nagnaed idiay Ramot ti Abagatan, ken cadagidiay a nagnaed idiay Jattir.

²⁸ Ken cadagidiay a nagnaed idiay Aroer, ken cadagidiay a nagtaeng idiay Sifmot, ken cadagidiay a nagtaeng idiay Estemoa.

²⁹ Ken cadagidiay a nagtaeng idiay Racal, ken ti Jerameel, ken cadagidiay a nagtaeng cadagiti il-ili dagiti Cineo.

³⁰ Ken cadagidiay a nagnaed idiay Horma, ken cadagidiay a nagnaed idiay Corasan, ken cadagidiay a nagnaed idiay Atac.

³¹ Ken cadagidiay a nagnaed idiay Hebron, ken cadagiti amin a luglugar a ni David met laeng ken dagiti lallakina nacairuamanda.