1 Samuel 24 - Ti Biblia (1973)

Ni David isakitna ti biag ni Saul idiay En-gaddi. Ni Saul itukenna ti panangcamatna ken David.

¹ Ket naaramid, idi a ni Saul nagsubli a naggapu iti panangsurotna cadagiti Filisteos, a naibaga kencuana, a nacuna, Adtoy, ni David adda idiay let-ang ti En-gaddi.

² Idin ni Saul nangala iti tallo a ribu a lallaki a napili iti amin nga Israel, ket napan a nangbiruc ken David ken cadagiti lallakina cadagiti batbato dagiti calding nga atap.

³ Ket isu immay iti pagyaponan iti carnero idi dalan, a yan idi ti maysa a gucayab; ket ni Saul simrec a mangabbong cadagiti sacana. Ngem ni David ken dagiti lallakina addada nga agyan cadagiti caunegan a paset ti gucayab.

⁴ Ket dagiti lallaki ni David kinunada kencuana, Adtoy ti aldaw a kinuna ni Jehova kenca, Adtoy yawatconto ita imam ti cabusormo, ket aramidemto kencuana ti cas pagarupemto a naimbag. Idin ni David timmacder, ket rinagasna a siiinayad unay daydi gayadan ti lambon ni Saul.

⁵ Ket calpasanna naaramid, a ti puso ni David pinagladingitna met laeng, agsipud ta nangragas idi gayadan ti lambon ni Saul.

⁶ Ket isu kinunana cadagiti lallakina, Ni Jehova iparitna nga aramidec coma daytoy iti apoc a pinulotan ni Jehova, nga unnatec ti imac a maibusor kencuana, idinto nga isu ti pinulotan ni Jehova.

⁷ Iti casta ni David inep-epna dagiti lallakina cadagitoy a saona, ket dina pinalubosan ida a tumacder a maibusor ken Saul. Ket ni Saul timmacder a rimmuar idi gucayab, ket napan iti dalanna.

⁸ Calpasanna ni David timmacder met, ket rimmuar iti gucayab, ket pinuccawanna ni Saul, a kinunana, Apoc nga ari. Ket idi a ni Saul timmaliaw kencuana, ni David incul-obna ti rupana iti daga, ket nagrucbab.

⁹ Ket ni David kinunana ken Saul, Apayapay nga impangagmo dagiti sao dagiti lallaki, a nagcuna, Adtoy, ni David sapulenna ti pagdacsam?

¹⁰ Adtoy, itoy nga aldaw dagiti matam nakitada no casano ti panangyawat ni Jehova kenca ita nga aldaw iti imac idiay gucayab: ket dadduma ti nagcuna caniac a papatayenca; ngem ti matac insakitnaca; ket kinunac, Diacto unnaten ti imac a maibusor ti apoc: ta isu pinulotan ni Jehova.

¹¹ Maysapay, amac, kitaem, wen kitaem ti gayadan ti lambonmo iti imac; ta iti dayta a panangragasco iti gayadan ti lambonmo, ket dica pinapatay, ammoem ket kitaem nga awan ti uray ania a dakes wenno panaglabsing itoy imac, ket diac nagbasol a naibusor kenca, nupay sica anupem ti biagco tapno alaem.

¹² Ni Jehova mangocom cadata, ket ni Jehova ibalsannac kenca; ngem ti imac dinto rumabaw kenca.

¹³ Cas cuna ti proverbio dagiti lallacay, Aggapu iti nadangkes rumuar ti kinadangkes; ngem ti imac dinto rumabaw kenca.

¹⁴ Asino ti sinurot ti ari a rimmuaranna? iti asino ti kinamatmo? iti maysa a natay nga aso, iti maysa a timel.

¹⁵ Ni Jehova ngarud ti mangocom coma, ken mangted iti panangikeddeng cadata, ket kitaenna, ket salucubanna ti panggepco, ken isalacannac ita imam.

¹⁶ Ket naaramid idi a ni David nagibusanna ti panangisaona cadagitoy a sao ken Saul, a ni Saul kinunana, Isu daytoy ti timecmo, anacco a David? Ket ni Saul inngatona ti timecna, ket nagsangit.

¹⁷ Ket isu kinunana ken David, Sica nalinlintegca ngem siac; ta sinubadannac iti imbag, idinto a sinubadanca iti dakes.

¹⁸ Ket sica impalawagmo ita nga aldaw no casano ti panangaramidmo caniac ti imbag, nupay no ni Jehova inyawatnac ita imam, sica dinac pinapatay.

¹⁹ Ta no maysa a lalaki masaracanna ti cabusorna, isu bay-annanto a pumanaw? gapuna a ni Jehova supapacannaca coma iti imbag gapu iti daydiay nga inaramidmo caniac ita nga aldaw.

²⁰ Ket ita, adtoy, maammoac nga agaricanto a di bumorong, ken ti pagarian ti Israel mapasingkedanto ita imam.

²¹ Ita agsapataca ngarud caniac gapu ken Jehova, a dicanto keltayen ti putotco iti calpasac, ket dicanto dadaelen ti naganco iti balay ni amac.

²² Ket ni David nagsapata ken ni Saul. Ket ni Saul napan iti balayna; ngem ni David ken dagiti lallakina simmang-atda iti sarikedked.