1 Samuel 23 - Ti Biblia (1973)

Ni David ispalenna ti Keila. Camaten ni Saul, ket ni David pumanaw iti Keila. Da David ken Jonatan pangabaroanenda ti tulagda. Ni Saul camatenna ni David.

¹ Ket imbagada ken David, a kinunada, Adtoy, dagiti Filisteos gubgubatenda ti Keila, ken agagawenda dagiti pagtaltagan.

² Gapuna a ni David immuman ken Jehova, a kinunana, Innacto, ken cabilecto dagitoy Filisteos? Ket ni Jehova kinunana ken David, Inca, ket cabilem dagiti Filisteos, ket isalacanmo ti Keila.

³ Ket dagiti tattao ni David kinunada kencuana, Adtoy, a sibubutengtayo ditoy Juda: dinto ad-adda ngarud no intayo idiay Keila a maibusor iti buyot dagiti Filisteos?

⁴ Idin ni David immuman pay manen ken Jehova. Ket ni Jehova simmungbat kencuana, ket kinunana, Tumacderca, sumalogca agingga iti Keila; ta yawatconto dagiti Filisteos ita imam.

⁵ Ket ni David ken dagiti tattaona napanda iti Keila, ket nakigubatda cadagiti Filisteos, ket innalada dagiti an-animalda, ket pinatayda ida iti naindaclan a panangpapatay. Iti casta ni David insalacanna dagiti agnaed iti Keila.

⁶ Ket naaramid, idi a ni Abiatar nga anac ni Ahimelec nagtaray agingga ken David idiay Keila, nga isu simmalog agraman iti maysa nga efod iti imana.

⁷ Ket naibaga ken Saul a ni David immay iti Keila. Ket ni Saul kinunana, Ti Dios isu inyawatna iti imac; ta isu napupoc, gapu iti iseserrecna iti maysa nga ili nga addaan cadagiti ruruangan ken balbalunet.

⁸ Ket ni Saul pinatucnadna amin a tattao iti gubat, tapno sumalogda agingga iti Keila, tapno lacubenda ni David ken dagiti tattaona.

⁹ Ket ni David naammoanna a ni Saul nangbalabala iti dakes a maibusor kencuana; ket kinunana ken Abiatar a padi, Yegmo ditoy ti efod.

¹⁰ Idin kinuna ni David, O Jehova, a Dios ti Israel, pudno a ti adipenmo nangngegna a ni Saul tarigagayanna ti umay iti Keila, tapno rebbekenna ti ili a gapu caniac.

¹¹ Yawatdacto dagiti tattao ti Keila iti imana? sumalogto ni Saul, a cas iti nangngeg ti adipenmo? O Jehova, a Dios ti Israel gumawawaac kenca, ibagam iti adipenmo. Ket ni Jehova kinunana, Isu sumalogto.

¹² Idin ni David kinunana, Dagiti lallaki ti Keila yawatdacto ken dagiti lallakic iti ima ni Saul? Ket ni Jehova kinunana, Isuda yawatdacanto.

¹³ Idin ni David ken dagiti lallakina, nga aginnem a gasutda idi, timmacderda ket pimmanawda idiay Keila, ket napanda iti nabalinda a napanan. Ket naibaga idi ken Saul a ni David nagtalaw idiay Keila; ket isu nagmadin a rimmuar.

¹⁴ Ket ni David nagtaeng idiay let-ang cadagiti sarikedked, ket nagyan iti caturodan idiay let-ang ti Zif. Ket isu binirbiruc ni Saul iti tunggal aldaw, ngem isu saan nga inyawat ni Jehova iti imana.

¹⁵ Ket ni David nakitana a ni Saul rimmuar a mangbiruc idi biagna: ket ni David nagyan iti let-ang ti Zif idiay cabakiran.

¹⁶ Ket ni Jonatan, nga anac ni Saul timmacder ket napan ken David iti cabakiran, ket pinapigsana ti imana iti Dios.

¹⁷ Ket isu kinunana kencuana, Dica agbuteng; ta ti ima ni Saul nga amac dinacanto masaracan; ket sicanto ti agari iti Israel, ket siacto ti caasitgan kenca, ket ni Saul nga amac ammona met dayta.

¹⁸ Ket isuda a dua nagaramidda iti maysa a tulag iti sango ni Jehova: ket ni David nagnaed iti cabakiran, ket ni Jonatan napan iti balayna.

¹⁹ Idin simmang-at dagiti Zifeos ken Saul idiay Gabaa, a kinunada, Saan aya a makipaglemmeng cadacami ni David cadagiti sarikedked idiay cabakiran, idiay turod ti Haquila, nga adda iti abagatan ti let-ang?

²⁰ Gapuna ita, O ari, a sumalogca, a cas mayannurot iti amin a calicaguman ta cararuam nga isasalog; ket ti biangmi isunto ti panangyawatmi kencuana iti ima ti ari.

²¹ Ket ni Saul kinunana, Mabendicionancayo coma ken Jehova: ta addaancayo iti pannakipagsagaba caniac.

²² Agdawatac cadacayo, incayo ket aramidenyo pay ti ad-adda a panangpanecnec, ket ammoenyo ken kitaenyo ti lugar a pagyananna, ken no asino ti kimmita kencuana idiay; ta naibaga caniac nga isu agaramid a sisisicap unay.

²³ Kitaenyo ngarud, ken ammoenyo dagiti amin a gingginget a paglemmenganna, ket umaycayo manen caniac agraman pannacapanecnec, ket cumuyogacto cadacayo a mapan: ket maaramidto, no adda iti daga, nga isu birukecto cadagiti amin a rinibribu ti Juda.

²⁴ Ket isuda timmacderda, ket napanda idiay Zif iti una ni Saul: ngem ni David ken dagiti lallakina addada idi idiay let-ang ti Maon, idiay Araba iti abagatan ti let-ang.

²⁵ Ket ni Saul ken dagiti lallakina napanda a nangbiruc kencuana. Ket imbagada ken David: gapuna a simmalog agingga iti bato, ket nagtaeng idiay let-ang ti Maon. Ket idi nangngeg ni Saul dayta, isu kimmamat ken David idiay let-ang ti Maon.

²⁶ Ket ni Saul napan itoy a bangir ti bantay, ket ni David ken dagiti lallakina iti dayta a bangir ti bantay: Ket ni David nagpardas a pumanaw a gapu iti panagbuteng ken Saul; ta ni Saul ken dagiti lallakina inalicubcubda a linicmut ni David ken dagiti lallakina tapno alaenda ida.

²⁷ Ngem immay ti maysa a babaonen ken Saul, a cunana, Agdarasca, ket umayca; ta dagiti Filisteos nangaramidda iti maysa a panangsillong iti daga.

²⁸ Iti casta ni Saul nagsubli iti panagcamatna ken David, ket napan a maibusor cadagiti Filisteos: gapuna a ninaganda daydiay a lugar iti Sela-hammalecot.

²⁹ Ket ni David simmang-at nanipud idiay, ket nagtaeng cadagiti sarikedked ti En-gaddi.