1 Samuel 20 - Ti Biblia (1973)

Ti panagtulag da Jonatan ken David. Ti cari ni Jonatan ken David. Ni Saul agpungtot ken Jonatan. Ti panagpinnacada da Jonatan ken David.

¹ Ket ni David nagtaray nanipud Najot sadi Rama, ket immay ket kinunana ken Jonatan, Ania aya ti inaramidco? ania aya ti kinadakesco? ken ania aya ti basolco iti sango ni amam a sapulenna ti biagco?

² Ket isu kinunana, Adayu iti dayta; dicanto matay: adtoy, ni amac awan ti aramidenna nga uray dackel man wenno bassit, no di ket isu ipalgacna caniac; ket apayapay nga ilimed caniac ni amac daytoy a banag? saan a casta.

³ Ket ni David nagsapata pay manen, ket kinunana, Ni amam ammona a naimbag a nacasaracac iti parabur cadagita matam; ket isu cunana, Di coma maammoan ni Jonatan daytoy, di la ket ta agliday: ngem pudno cas ni Jehova sibibiag, ken cas ta cararuam sibibiag, adda maymaysa laeng nga addang iti nacaibaetac ken patay.

⁴ Idin ni Jonatan kinunana ken David, Iti uray aniaman a calicaguman ta cararuam, isu ti aramidecto met laeng a maipaay kenca.

⁵ Ket ni David kinunana ken Jonatan, Adtoy, intono bigat isu ti lutuad, ket diac agcurang coma a makicatugaw iti ari iti panganan: ngem palubosannac coma a mapan, tapno aglemmengac coma iti away agingga iti maicatlo nga aldaw iti rumabii.

⁶ No ni amam dillawenna ti caawanco iti apag-apaman, cunam ngarud, Ni David nagdawat a sigagagar unay ti ipapanawna caniac tapno tumaray coma a dumanon iti Betlehem nga ilina; ta adda tinawentawen a daton idiay a maipaay iti amin a familia.

⁷ No cunaenna iti castoy, Naimbag; ti adipenmo addaanto iti talna: ngem no agpungtot, ammoem ngarud a ti dakes nakedngan gapu kencuana.

⁸ Gapuna nga agaramidca a sicacaasi unay iti adipenmo; ta sica inyegmo ti adipenmo iti maysa a tulag ni Jehova: ngem no adda coma kinadakes caniac, sica met laeng ti mangpatay caniac; ta apayapay yegnac pay laeng coma ken amam?

⁹ Ket ni Jonatan kinunana, Dayta adayu coma kenca; ta no iti apagapaman maammoac coma a ti dakes nakedngan gapu ken amac a maipatay kenca, isu diac ngarud ibaga kenca?

¹⁰ Idin ni David kinunana ken Jonatan, Asino ti mangibaganto caniac no cas pagarigan ni amam sungbatannaca a sigugubsang?

¹¹ Ket ni Jonatan kinunana ken David, Umayca ket rumuarta iti away. Ket napanda nga agpadpada iti away.

¹² Ket ni Jonatan kinunana ken David, Ni Jehova a Dios ti Israel, agsacsi coma: intono agsaludsudac ken amac cadagitoy a tiempo intono bigat, wenno iti maicatlo nga aldaw, adtoy, no adda imbag a maiturong ken David, diacto ngarud ibaon kenca, ken isu ipalgacco kenca?

¹³ Ni Jehova aramidenna ti casta ken Jonatan ken ad-adda pay met, no pagrayoan coma ni amac ti panangaramidna iti dakes kenca, no isu diac coma ipalgac kenca, ken papanawenca, tapno mabalinmo ti mapan a sitatalna: ket ni Jehova adda coma kenca, a cas caaddana idi ken amac.

¹⁴ Ket sica saan laeng a iti bayat iti panagbiagco ti pangiparangamto caniac iti naayat a kinaimbag ni Jehova, tapno diac matay;

¹⁵ No di ket dicanto met iccaten ta kinaimbagmo iti balayco iti agnanayon; saan, saan uray intono ni Jehova iccatenna dagiti cabusor ni David tunggal maysa iti rabaw ti daga.

¹⁶ Iti casta ni Jonatan nagaramid ti maysa a tulag iti balay ni David, a kinunana, Ket ni Jehova, sapulennanto daytoy babaen iti ima dagiti cabusor ni David.

¹⁷ Ket ni Jonatan pinagsapatana manen ni David, gapu iti ayat nga ipaayna kencuana: ta isu inayatna a cas iti cararuana met laeng.

¹⁸ Idin ni Jonatan kinunana kencuana, Intono bigat isu ti lutuad: ket sica madillawcanto, agsipud ta ti tugawmo malengngawanto.

¹⁹ Ket intono nacapagtaengca iti tallo nga aldaw, sumalogcanto a madaras unay, ket umayca iti lugar a naglemmengam idi ta ti panggep agdinama ket agbaticanto iti denna ti bato nga Ezel.

²⁰ Ket mangipanaacto cadagiti tallo a pana iti sikiganna, a cas laeng no agpanaac iti maysa a pagsursuroan.

²¹ Ket adtoy, ibaonconto ti bumbumaro, a cunac, Inca sapulem dagiti pana. No cunac iti bumbumaro, Adtoy, dagiti pana addada ditoy a sikigam; alaem ida, ket umayca; gapu iti dayta adda talna kenca ket awan ti ranggas, cas ni Jehova sibibiag.

²² Ngem no cunac ti castoy iti bumbumaro, Adtoy, dagiti pana addada iti labesmo; inca iti dalanmo; ta ni Jehova pinapanawnaca.

²³ Ket no maipapan iti panggep a sica ken siac sinaritata, adtoy, ni Jehova adda iti nagbaettanta iti agnanayon.

²⁴ Iti casta ni David naglemmeng iti away: ket idi dimteng ti lutuad, ti ari nagtugaw a mangan idi taraon.

²⁵ Ket ti ari timmugaw iti tugawna, a cas cadagiti sabali a tiempo, iti rabaw met laeng ti tugaw iti denna ti pader: ket ni Jonatan nagtacder, ket ni Abner nagtugaw iti abay ni Saul: ngem ti lugar ni David lengngaw idi.

²⁶ Nupay casta awan ti aniaman nga insao ni Saul iti daydi nga aldaw: ta pinanunotna, Adda ngata napasamac kencuana, isu saan a nadalus; awan duadua nga isu saan a nadalus.

²⁷ Ket naaramid iti bigat iti calpasan ti lutuad nga isu idi ti maicadua nga aldaw, a ti lugar ni David lengngaw idi: ket ni Saul kinunana ken Jonatan nga anacna, Apayapay a ti anac a lalaki ni Isai saan nga immay a mangan, uray idi calman, uray ita nga aldaw?

²⁸ Ket ni Jonatan simmungbat ken Saul, Ni David sigagagar a nagdawat ti ipapanawna caniac a mapan idiay Betlehem:

²⁹ Ket isu kinunana, Agdawatac kenca, Palubosannac coma a mapan, ta ti familiami addaan iti maysa a sacrificio iti ili; ket ti cabsatco a lalaki, isu binilinnac nga addaac coma idiay: ket ita no nacasaracac ti parabur cadagiti matam, agdawatac kenca, palubosannac coma a mapan, ket kitaec dagiti cacabsatco. Gapuna a saan nga umay iti lamesaan ti ari.

³⁰ Idin ti pungtot ni Saul simged a maibusor ken Jonatan, ket kinunana kencuana, Sica anac ti maysa a dakes ken nasukir a babai, diac ammo aya a sica pinilim ti anac a lalaki ni Isai a pacabainamto met laeng, ken pacabainanto ti ibain ni inam?

³¹ Ta bayat ti panagbiag ti anac ni Isai iti rabaw ti daga, sica dicanto mabangon, uray ti pagariam. Gapuna ita agbaonca, ket isu payegmo caniac, ta matayto a di bumurong.

³² Ket ni Jonatan simmungbat ken Saul nga amana, ket kinunana kencuana, Apayapay a mapapatayto? ania aya ti inaramidna?

³³ Ket ni Saul ingayangna di gayangna kencuana a pangcabilna kencuana; isu a nacaammoan ni Jonatan a nakedngan idi gapu ken amana a mapapatay ni David.

³⁴ Iti casta ni Jonatan timmacder idi lamesaan iti sibabara a pungtot, ket saan idi a nangan iti taraon idi maicadua nga aldaw ti bulan; ta napaliday gapu ken David, agsipud ta isu binabain ni amana.

³⁵ Ket naaramid iti bigat, a ni Jonatan rimmuar iti away iti tiempo a natudingan ken David, ket maysa a bumbumaro ti caduana.

³⁶ Ket kinunana idi bumbumaro, Tumarayca, sapulem ita dagiti pana nga ipanac. Ket idi a timmaray ti bumbumaro, isu nangipana iti maysa a pana idi labesna.

³⁷ Ket idi a ti bumbumaro dimteng iti lugar ti pana nga impana ni Jonatan, ni Jonatan pinuccawanna ti bumbumaro, ket kinunana, Saan nga adda ti pana ita labesmo?

³⁸ Ket ni Jonatan pinuccawanna ti bumbumaro, Agsiglatca, agdarasca, dica agtactac. Ket ti bumbumaro ni Jonatan inurnongna dagiti pana ket immay ken apona.

³⁹ Ngem ti bumbumaro dina naammoan ti uray aniaman: da laeng Jonatan ken David ti macaammo idi iti panggep.

⁴⁰ Ket ni Jonatan intedna dagiti igamna idi bumbumarona, ket kinunana kencuana, Inca, ipanmo ida iti ili.

⁴¹ Ket apaman a ti bumbumaro nacapanaw, ni David timmacder a naggapu idi maysa a lugar nga agturong iti Abagatan, ket nagpacleb ti rupana iti daga, ket nagrucnoy iti namitlo: ket isuda naginnagecda ti maysa ken maysa, ket nagsangit ti maysa ken maysa, agingga ni David napalpalalo.

⁴² Ket ni Jonatan kinunana ken David, Inca a sitatalna, gapu ta cas insapatata nga agpadpada iti nagan ni Jehova, a kinuna, Ni Jehova addanto iti baetta, ken iti putotco ken iti putotmo iti agnanayon. Ket isu timmacder ket pimmanaw: ket ni Jonatan simrec iti ili.