1 Samuel 2 - Ti Biblia (1973)

Ti canta ti panagyaman ni Anna. Ti basol dagiti annac a lallaki ni Eli. Ni Anna ken dagiti annacna. Ni Eli tubngarenna dagiti annacna a lallaki. Maysa a padto a maibusor iti balay ni Eli.

¹ Ket ni Anna nagcararag, ket kinunana, ti pusoc agrag-o ken Jehova; ti sarac maitanoc ken Jehova; ti ngiwatco mapadackel iti rabaw dagiti cabusorco; agsipud ta agragsacac iti panangisalacanmo.

² Awan ti nasantoan a cas ken Jehova ta awan iti lacsidmo, awan met ti uray ania a bato a cas iti Diosmi.

³ Dicayo agsaon iti casta unay a sipapalanguad; dicayo coma palubosan a rumuar ti kinapasindayag iti ngiwatyo; ta ni Jehova isu ti Dios ti pannacaammo, ket gapu kencuana dagiti tigtignay nagantingda.

⁴ Dagiti panpana dagiti mamaingel a lallaki mabungtolda; ket dagiti maitibcol mabaricsanda iti kinapigsa.

⁵ Dagiti nabsog idi nangabangda gapu iti taraon; ket dagidiay a nabisinan simmardengda nga agbisin: wen, ti lupes nangyanac iti pito; ket daydi nga addaan idi iti adu nga annac mapacsuyan a mabannog.

⁶ Ni Jehova mangpapatay, ken mamagbiag: isu ipababana agingga iti Tanem, ken ipangatona.

⁷ Ni Jehova mamapanglaw, ken mamabacnang: isu mangipababa, ken mangingato met.

⁸ Isu patacderenna ti napanglaw manipud iti tapoc, ket ingatona ti addaan pacasapulan manipud iti kinarugit, tapno pagtugawenna ida agraman cadagiti pangpangolo, ken agtawidda iti trono ti kinadayag: ta dagiti mommon ti daga cucua ida ni Jehova, ket insaadna ti lubong iti rabawda.

⁹ Isu aywanannanto dagiti sacsaca dagiti sasantona, ngem ti managdacdakes mapaulimecto iti kinasipnget; ta gapu iti pigsa awanto ti tao a mangrimbaw.

¹⁰ Dagiti makisusic ken Jehova maburburacdanto; sadi langit isu aggurroodto a maibusor cadacuada: ni Jehova ocomennanto dagiti pungpungto ti daga; ket itan-ocnanto ti sara ti sinapsapoanna.

¹¹ Ket ni Elcana napan iti balayna idiay Rama. Ket ti ubing nagannong ken Jehova iti sango ni Eli a Padi.

¹² Ngem dagiti annac a lallaki ni Eli isuda nacas-angda a tattao idi; isuda dida ammo idi ni Jehova.

¹³ Ket adda idi cadawyan dagiti papadi iti umili nga uray siasino a tao ti nangidatag iti daton, ti tagabu ti padi immay, a nacaiggem iti maysa a pagadaw iti lasag a tallo ti tudocna.

¹⁴ Ket isu idogsolna iti uneg ti parioc, wenno dongdong, wenno caldero, wenno tayab; isu-amin a maingato ti pangadaw ti lasag alaen ti padi. Casta ti inaramidda idi idiay Silo cadagiti amin nga Israelita nga umay idi sadiay.

¹⁵ Wen, iti sacbay ti panangpuurda iti taba, ti tagabu ti padi immay ket cunana idi tao nga agidaton, Mangtedca iti lasag a tonoen a maipaay iti padi; ta isu dinto mangala kenca iti lasag a naluto, no di naata.

¹⁶ Ket no ti tao kinunana kencuana, Mapuuran pay nga umuna ti taba, saca mangala iti caadu a cas calicaguman ti cararuam; iti casta sumungbat, Saan, no di ket mangtedca caniac ita: ket no saan, mangalaacto a capilitan.

¹⁷ Ket ti basol dagiti agtutubo a lal-lalaki dackel unay idi iti sango ni Jehova, ta dagiti lallaki linaisda ti maidaton ken Jehova.

¹⁸ Ngem ni Samuel nagannong iti sango ni Jehova, idinto nga ubing, a nabaricsan iti maysa nga efod a lienzo.

¹⁹ Maysa pay ni inana isu ti inyaramidanna iti bassit a lambon, ket yegna idi kencuana iti tinawentawen, idi isu sumang-at a makicuyog ken ni asawana nga mangidatag iti daton a tinawen.

²⁰ Ket ni Eli binendicionanna ni Elcana ken ni asawana, ket kinunana, Ni Jehova itedna ti putot itoy a babai a maipaay iti dawat nga isu dinawatna ken Jehova. Ket isuda napanda iti pagtanenganda met laeng.

²¹ Ket ni Jehova sinarungcaranna ni Anna, iti casta a nagsicug, ket nangyanac iti tallo nga annac a lallaki ken dua nga annac a babbai. Ket ni ubing a Samuel dimmackel iti sango ni Jehova.

²² Ni Eli lacayen unay idi; ket naammoanna amin nga inaramid dagiti annacna a lallaki iti amin nga Israel, ken no casano ti pannakicaiddada cadagiti babbai nga agannong idi iti ruangan ti tolda ti gimong.

²³ Ket isu kinunana cadacuada, Apayapay nga aramidenyo dagita cacasta a banbanag? ta mangngegco dagiti dakes nga ar-aramidyo iti amin daytoy nga umili.

²⁴ Saan, annacco; ta isu saan a naimbag a damag a mangngegco: dacayo paglabsingenyonto ti umili ni Jehova.

²⁵ No ti maysa a tao agbasol a maicaniwas iti sabali, ti Dios ocomennanto daydiay: ngem no ti maysa a tao agbasol iti maicaniwas ken Jehova, asino ti mangidawdawatto kencuana? Nupay casta isuda dida impangpangag ti timec ni amada, agsipud ta ni Jehova pinanggepna ida a papatayen.

²⁶ Ket ni ubing a Samuel dimmackel, ken immadu kencuana ti parabur ni Jehova, ken casta met cadagiti tattao.

²⁷ Ket immay idi ti maysa a lalaki ti Dios ken Eli, ket kinunana kencuana, Castoy ti kinuna ni Jehova, Saanac aya a nagpalgac iti balay ni amam, idi addada idiay Egipto iti pannacaadipen iti balay ni Faraon?

²⁸ Ket saan aya nga isu ti pinilic cadagiti isu-amin a capcaputotan ti Israel tapno isu coma ti padic, nga umuli iti altarco, a mangpuur iti incienso, a mangicawes iti maysa nga efod iti saclangco? Ket saanco aya nga inted iti balay ni amam dagiti amin a datdaton a maaramid iti apuy dagiti annac ti Israel?

²⁹ Apayapay a cusayanyo ti sacrificioc ken ti datonco, nga imbilinco idi iti pagtaengac; ket padayawam dagiti annacmo a nangnangrona ngem siac, nga ilucmegyo dagiti cangronaan dagiti amin a datdaton ti Israel nga ilic?

³⁰ Gapuna a ni Jehova a Dios ti Israel cunana, Pudno a kinunac a ti balaymo, ken ti balay ni amam, magnada coma nga agnanayon iti saclangco: ngem ni Jehova cunana, Adayu coma caniac; ta dagidiay a mangdayaw caniac dayawecto, ket dagidiay a manglais caniac maicascasodanto a silalaca unay.

³¹ Adtoy, dagiti al-aldaw umayda, a putdecto ta tackiagmo, ken ti tackiag ti balay ni amam, tapno awanto ti uray maysa a lacay iti balaymo.

³² Ket makitamto ti panangparigat ti pagnaedac, iti amin a kinabacnang a ti Dios itdennanto iti Israel: ket awanto ti uray maysa a lacay iti balaymo iti agnanayon.

³³ Ket ti lalaki kenca, a diacto ipusay iti altarco, isunto ti mangrunaw cadagiti matam, ken mangliday ita pusom; ken amin nga annac ti balaymo mataydanto iti sabong dagiti tawenda.

³⁴ Ket daytoy isunto ti pagilasinan kenca, a mapasamacto cadagiti dua nga annacmo, da Ofni ken Finees: iti maymaysa nga aldaw isuda mataydanto a dua.

³⁵ Ket patacderecto caniac ti maysa a matalec a padi, nga aramidennanto ti mayabuloy iti daydiay nga adda iti pusoc ken iti nakemco; ket isu ipatacderacto iti maysa a natalged a balay; ket isu agpagnanto iti saclang ti sinapsapoac iti agnanayon.

³⁶ Ket maaramidto, a tunggal maysa a mabaybay-an iti balaymo umayto ken agtamedto kencuana gapu iti sangcapisi a pirac ken sangabukel a tinapay, ken cunananto, Dawatec kenca, icabilnac, iti maysa cadagiti annong dagiti papadi, tapno macacaanac coma iti sangcapisi ti tinapay.