1 Samuel 18 - Ti Biblia (1973)

Ti ayat ni Jonatan maipaay ken David. Ti pungtot ni Saul a maibusor ken David. Ni David asawaenna ni Micol babai nga anac ni Saul.

¹ Ket naaramid, idi a nagibusanna ti pannakisasaona ken Saul, a ti cararua ni Jonatan naisinggalut idi cararua ni David, ket ni Jonatan nagayat kencuana a cas iti cararuana met laeng.

² Ket ni Saul isu innalana idi nga aldaw, ket dina kinayat nga impalubos a mapan iti pagtaenganna iti balay ni amana.

³ Idin da Jonatan ken ni David nangaramidda iti maysa a tulag, agsipud ta isu nagayat kencuana a cas iti cararuana met laeng.

⁴ Ket ni Jonatan inucsubna di lambonna nga adda idi kencuana, ket intedna ken David, ken ti pagan-anayna, uray pay ti campilanna met laeng, ken ti ba-ina, ken ti barikesna,

⁵ Ket ni David rimmuar a napan iti uray sadino man a pangibaonan ni Saul kencuana, ket nagmanakem unay: ket ni Saul isu ti insaadna a pangolo dagiti lallaki ti gubat, ket naimbag idi iti imatang dagiti isu-amin a tattao, ken casta met iti imatang dagiti adipen ni Saul.

⁶ Ket naaramid idi nga isuda sumungadda, idi a ni David simmubli a naggapu iti panangpapatayna iti Filisteo, a dagiti babbai rimmuarda cadagiti isu-amin nga il-ili ti Israel, a nagcancantada ken nagsalsalada, a simmabet ken ari Saul, agraman panpandareta, agraman ragragsac, ken agraman gamigam ti musica.

⁷ Ket dagiti babbai incantada ti maysa ken maysa idi nga agay-ayamda, ket kinunada, ni Saul pinatayna dagiti rinibribuna, ket ni David dagiti linaclacsana.

⁸ Ket ni Saul naglucsaw unay idi, ket daytoy a panagsao namapungtot kencuana; ket kinunana, Impaayda ken David ti linaclacsa, ket caniac impaayda laeng ti rinibribu: ket ania pay ti mabalinna nga icutan no saan a ti pagarian?

⁹ Ket ni Saul kinuscusilapanna ni David nanipud idi nga aldaw ken iti calpasanna.

¹⁰ Ket naaramid iti sumaganad a bigat, a maysa a dakes nga espiritu a gapu iti Dios immay a sipipigsa ken Saul, ket nagpadles idi tengnga ti balay: ket ni David nagtocar babaen iti imana, a cas ar-aramidenna idi iti inaldawaldaw. Ket ni Saul addaan iti imana iti maysa a gayang.

¹¹ Ket ni Saul ingayangna ti gayang; ta kinunana, Sugatecto ni David agingga iti pader met laeng. Ket ni David naglisi iti namindua iti saclangna.

¹² Ket ni Saul nagbuteng ken ni David, agsipud ta ni Jehova adda idi kencuana, ket pimmanaw ken Saul.

¹³ Gapuna a ni Saul pinapanawna iti dennana, ket isu inaramidna a capitanna a pangulo ti sangaribu; ket isu rimmuar ken simrec iti una dagiti tattao.

¹⁴ Ket ni David nagmanakem unay cadagiti isu-amin a daldalanna: ket ni Jehova adda idi kencuana.

¹⁵ Ket idi a ni Saul maimatanganna nga isu nagmanakem unay, nagbuteng kencuana.

¹⁶ Ngem amin nga Israel ken Juda inayatda ni David; ta isu rimmuar ken simrec ti unada.

¹⁷ Ket ni Saul kinunana ken David, Adtoy, ni Merab a babai nga anacco nga inauna, isu itedco kenca nga asawa: isuna laeng nga umingelca coma a maipaay caniac, ket makibacalca cadagiti gubgubat ni Jehova. Ta ni Saul kinunana, Saan coma a ti imac ti maipatay kencuana, no di ket ti ima dagiti Filisteos ti rumabaw coma kencuana.

¹⁸ Ket ni David kinunana ken Saul, Asinoac aya? ken ania aya ti biagco, wenno ti familia ni amac iti Israel, tapno siac coma ti manugang a lalaki ti ari?

¹⁹ Ngem naaramid nga idi tiempo a ni Merab, nga anac a babai ni Saul, maited coma idi ken David, nga isu naited nga asawa ni Adriel a Meolatita.

²⁰ Ket ni Micol, nga anac a babai ni Saul, inayatna ni David: ket imbagada ken Saul, ket ti banag nangay-ayo kencuana.

²¹ Ket ni Saul kinunana, Isu itedconto kencuana, tapno ni Micol isunto kencuana ti maysa a silo, ken tapno ti ima dagiti Filisteos bumusorda coma kencuana. Gapuna a ni Saul kinunana ken David, Ita nga aldaw sicanto ti manugangco a maicadua.

²² Ket ni Saul binilinna dagiti adipenna, a kinuna, Ipacaammoyo ken David a sililimed unay, ket cunaenyo, Adtoy, ti ari siaayat kenca, ken amin nga adipenna ayatendaca: gapuna ita agbalinca a manugang ti ari.

²³ Ket dagiti adipen ni Saul imbagada dagitoy a sasao cadagiti lapayag ni David. Ket ni David kinunana, Ipagarupyo a nalag-an a banag ti manugangen ti ari, idinto a maysaac a napanglaw a lalaki, ken bassit ti pannacaipategna?

²⁴ Ket dagiti adipen ni Saul imbagada kencuana, a kinunada, Castoy ti sinao ni David.

²⁵ Ket ni Saul kinunana, Castoy ti saoenyonto ken David, Ti ari dina calicaguman ti sab-ong, no di laeng sangagasut nga akinsango a cudil dagiti Filisteos, tapno mabales dagiti cabusor ti ari. Ngem ni Saul pinanunotna a pagpasagen ni David iti ima dagiti Filisteos.

²⁶ Ket idi a dagiti adipenna imbagada ken David dagitoy a sao, nacaay-ayo ken David a naimbag ti agbalin a manugang ti ari. Ket dagiti aldaw dipay nagturpos.

²⁷ Ket ni David timmacder ket napan, isu ken dagiti lallakina, ket pimmatay cadagiti Filisteos iti dua-gasut a lallaki; ket ni David inyegna dagiti akinsango a cudilda, ket intedna ida nga apag-isu ti bilang iti ari, tapno isu coma ti manugang ti ari. Ket ni Saul intedna kencuana ni Micol a babai nga anacna nga asawana.

²⁸ Ket ni Saul naimatanganna ken maammoanna a ni Jehova adda idi ken David; ket ni Micol nga anac ni Saul, nagayat kencuana.

²⁹ Ket ni Saul limmanlan ti panagbutengna ken David; ket ni Saul bimmusor a cancanayon ken David.

³⁰ Idin dagiti panguloen dagiti Filisteos rimmuarda: ket naaramid, iti masansan nga iruruada, a ni David nagmanakem unay ngem cadagiti isu-amin nga adipen ni Saul; iti casta a ti naganna napateg idi.