1 Samuel 17 - Ti Biblia (1973)

Ti gubat cadagiti Filisteos. Ti panangcarit ni Goliat. Ni David sumarungcar iti pacarso, ket mangegna ti panangcarit. Annugotenna ti panangcarit, ket patayenna ni Goliat.

¹ Ket dagiti Filisteos inummongda dagiti buybuyotda a pakigubat; ket naguornongda idiay Soco, a cucua ti Juda, ket nagpacarsoda iti nagbaetan ti Soco ken Azeca, idiay Efes-dammim.

² Ket ni Saul ken dagiti lallaki ti Israel naguornongda ket nagpacarsoda idiay lobong ti Ela, ket inurnosda ti gubat a maibusor cadagiti Filisteos.

³ Ket dagiti Filisteos nagtacderda iti bantay iti maysa a bangir, ket ti Israel nagtacder iti bantay iti sabali a bangir: ket adda idi maysa a lobong iti nagbaetanda.

⁴ Ket rimmuar ti maysa a camaingelan a naggapu iti pacarso dagiti Filisteos, a managan Goliat, taga Gat, a ti catayagna innem a sico ket sangadangan.

⁵ Ket isu addaan iti maysa a cabal a gambang iti olona, ket nacawesan iti maysa a cabal; ket ti dagsen ti cabalna lima a ribu a siclo a gambang.

⁶ Ket isu addaan idi cadagiti cabal a gambang iti rabaw dagiti sacana, ken maysa a gayang a gambang iti baet dagiti abagana.

⁷ Ket ti ungcay ti picana pumadpada iti adigi ti pagablan; ket ti tadem ti picana agdagsen iti innem a gasut a siclo a landoc: ket ti agawawit iti calasagna napan idi iti sangoananna.

⁸ Isu nagtacder ket pinuccawanna dagiti buybuyot ti Israel, ket kinunana cadacuada, Apayapay a rumuarcayo a mangurnos iti gubat? saanac aya a maymaysa a Filisteo, ket dacayo ad-adipen ni Saul? pumilicayo iti maysa a lalaki cadacayo, ket sumalog coma caniac.

⁹ No isu macagaway a makicabil caniac, ket papatayennac, no casta dacaminto dagiti ad-adipenyo; ngem no siac maannongac, ket isu patayec, no casta dacayto ngarud dagiti ad-adipenmi, ket agservicayto cadacami.

¹⁰ Ket daydi Filisteo kinunana, Caritec dagiti buybuyot ti Israel ita nga aldaw; iccandac iti maysa a lalaki tapno agcabilcami coma.

¹¹ Ket idi a ni Saul ken amin nga Israel nangngegda dagidi sasao ti Filisteo, nagcullayawda, ket nagbutengda iti napalalo.

¹² Ket ni David nga anac ni Efrateo ti Betlehem ti Juda, a ti naganna Isai; ket addaan idi iti walo nga annac a lallaki: ket daydi lalaki lacayen idi cadagidi al-aldaw ni Saul, napacsuyan iti kinalacayna iti tengnga dagiti tattao.

¹³ Ket dagiti tallo a calalacayan cadagiti annac ni Isai napanda simmurot ken Saul iti paggugubatan: ket ti nagan dagiti tallo nga annac a napan iti gubat isuda Eliab nga inauna nga anac, ket ti sumaganad kencuana ni Abinadab, ket ti maicatlo ni Samma.

¹⁴ Ket ni David ti caubingan; ket dagiti tallo a calalacayan simmurotda ken Saul.

¹⁵ Ngem ni David napan idi sa nagsubli nanipud ken Saul ta napanna impaarab dagiti carcarnero ni amana idiay Betlehem.

¹⁶ Ket daydi Filisteo immasideg iti bigat ken rabii, ket nagparang bayat ti uppat a pulo nga aldaw.

¹⁷ Ket ni Isai kinunana ken David, Mangalaca ita ti maipaay cadagiti cacabsatmo iti sangaefa a kinirog a bukel, ken dagitoy sangapulo a tinapay, ket ipanmo ida a madaras iti pacarso cadagiti cacabsatmo;

¹⁸ Ket ipanmo dagitoy sangapulo a queso iti capitan ti rinibuda, ket kitaem no casano ti casasaad dagiti cacabsatmo, ket mangalaca ti pacakitaan cadacuada.

¹⁹ Idi ni Saul, ken isuda, ken amin a lallaki ti Israel addada iti lobong ti Ela, a makigubgubat cadagiti Filisteos.

²⁰ Ket ni David bimmangon a nasapa iti bigat, ket imbatina dagiti carcarnero iti maysa nga agaywan, ket innalana, ket napan, cas imbilin ni Isai kencuana; ket isu dimteng iti disso dagiti luglugan idi a ti buyot a rimmuar iti gubat nagickis a maipaay iti gubat.

²¹ Ket ti Israel ken dagiti Filisteos inornosda ti gubat, ti buyot a maibusor iti buyot.

²² Ket ni David imbatina ti gargaretna iti ima ti agaywan ti gargaret, ket timmaray agingga iti buyot, ket immay ket kinablaawanna dagiti cacabsatna.

²³ Ket idi a makisasao cadacuada, adtoy, sumang-at daydi camaingelan, daydi Filisteos ti Gat, a Goliat ti naganna, a naggapu cadagiti buybuyot dagiti Filisteos, ket sinaona ti mayannurot cadagiti isu met laeng a sasao: ket ni David nangngegna ida.

²⁴ Ket isu-amin a tattao ti Israel no makitada idi daydi lalaki, isu intarayanda, ket nagbutengda iti napalalo.

²⁵ Ket dagiti tattao ti Israel kinunada, Nakitayo daytoy lalaki a sumang-at? pudno a ti panangcaritna. Iti Israel isu ti sang-atanna: ket castoyto, a ti lalaki a mangpatay kencuana, ti ari pabacnangennanto daydiay cadagiti naruay a sanicua, ken iyasawananto kencuana ti anacna a babai, ken pagwayawayaennanto ti balay ni amana iti Israel.

²⁶ Ket ni David nagsao cadagiti lallaki a sitatacder iti sibayna, a kinunana, Ania ti maaramidto iti lalaki a mangpatay itoy a Filisteo, ket iccatenna ti pannacalais iti Israel? ta asino daytoy di nacugit a Filisteo, tapno caritenna coma dagiti buybuyot ti Dios a sibibiag?

²⁷ Ket dagiti tattao simmungbatda kencuana a mayannurot itoy a kita, a cunada, Casta ti maaramidto iti lalaki a mangpatay kencuana.

²⁸ Ket ni Eliab a cabsatna nga inaunaan nangngegna idi nga isu agsasao cadagiti lallaki: ket ti pungtot ni Eliab simged a maibusor ken David, ket kinunana, Apayapay a simmalogca? ket asino ti nangibatiam cadagidiay bassit a carcarnero idiay let-ang? ammoc ti kinapalangguadmo, ken ti kinadakes ta pusom; ta simmalogca tapno agbuyaca coma iti gubat.

²⁹ Ket ni David kinunana, Ania aya ti inaramidco itatta? awan aya ti pacaigapuananna?

³⁰ Ket isu immadayo nanipud kencuana a nagturong iti sabali, ket nagsao mayalubog iti isu met laeng a kita: ket dagiti tattao insungbatda kencuana manen ti mayannurot idi immuna a kita.

³¹ Ket idi a nangngeg dagiti sasao a sinao ni David, inulitda ida iti sango ni Saul; ket isu pinaalana.

³² Ket ni David kinunana ken Saul, Saan coma nga agcullayaw ti puso ti lalaki a gapu kencuana; ti adipenmo mapanto ken makicabilto itoy a Filisteo.

³³ Ket ni Saul kinunana ken David, Dica macabael a mapan a maibusor itoy a Filisteo a makicabil kencuana; ta maysaca laeng a bumbumaro, ket isu maysa a lalaki ti gubat nanipud kinaubingna.

³⁴ Ket ni David kinunana ken Saul, Ti adipenmo agayaywan idi cadagiti carcarnero ni amana; ket idi immay ti maysa leon, wenno oso, ket mangala idi iti maysa a cordero iti pangen,

³⁵ Rimmuarac a sumurot kencuana, ket isu kinabilco ket isu insalacanco iti ngiwatna; ket idi timmacder a bumusor caniac, iniggamac ti imingna, ket kinabilco, ken isu pinatayco.

³⁶ Ti adipenmo agpadpada a kinabilna ti leon ken oso: ket daytoy a di nacugit a Filisteo isunto ti cas maysa cadacuada, idinto a makitana a carcaritenna dagiti buybuyot ti Dios a sibibiag.

³⁷ Ket ni David kinunana, Ni Jehova a nangisalacan caniac iti cammauna ti leon, ken iti cammauna ti oso, isu isalacannacto iti ima daytoy a Filisteo. Ket ni Saul kinunana ken David, Inca, ket ni Jehova addanto kenca.

³⁸ Ket ni Saul incawesna ken David daydi pagan-anayna, ket incabilna ti maysa a gambang a cabal iti rabaw ti olona, ket isu kinawesanna iti maysa a cabal.

³⁹ Ket ni David imbarikesna daydi campilanna iti rabaw dagiti pagan-anayna, ket pinadasna ti magna; ta dina pay pinadas idi. Ket ni David kinunana ken Saul, Diac mabalin ti mapan agraman cadagitoy; ta diac pay napadasan ida. Ket ni David iniccatna ida kencuana.

⁴⁰ Ket isu innalana nga iniggaman daydi sarucodna, ket nangpili iti lima a batbato a nalinis a naggapu iti waig, ket incabilna ida idi supot ti agpaspastor nga adda kencuana, a iti met laeng supotna; ket daydi pallatibongna adda idi iti imana: ket immasideg idi Filisteo.

⁴¹ Ket ti Filisteo immay ket immasideg ken David; ket ti lalaki a nagawawit iti calasagna napan iti sangoananna.

⁴² Ket idi a ti Filisteo kimmita, ket naimatanganna ni David, isu inumsina; ta isu maysa laeng a bumbumaro, ken lumabaga, ken agraman iti nataer a langana.

⁴³ Ket ti Filisteo kinunana ken David, Maysaac aya nga aso, tapno umayca caniac agraman sarucod? Ket ti Filisteo inlunodna ni David babaen cadagiti didiosna.

⁴⁴ Ket ti Filisteo kinunana ken David, Umayca caniac, ket itedconto ta lasagmo cadagiti tumatayab dagiti langlangit, ken cadagiti an-animal ti tay-ac.

⁴⁵ Idin kinuna ni David idi Filisteo, Sica umayca caniac a sicacampilan ken agraman maysa a pica, ken maysa a gayang: ngem siac umayac kenca iti nagan ni Jehova dagiti buybuyot, ti Dios dagiti buybuyot ti Israel, a sica kinaritmo.

⁴⁶ Ita nga aldaw ni Jehova yawatnacanto iti imac: ket cabilencanto, ket putolecto dayta olom; ket itedconto dagiti bangcay a natay ti buyot dagiti Filisteos ita nga aldaw cadagiti tumatayab dagiti langlangit, ken cadagiti atap nga an-animal ti daga; tapno isu-amin a daga ammoenna coma nga adda ti Dios iti Israel,

⁴⁷ Ket isu-amin daytoy a gimong ammoenna coma a ni Jehova saan a mangisalacan a maaramat ti campilan ken ti pica: ta ti gubat cucua ni Jehova, ket yawatnacayto iti imami.

⁴⁸ Ket naaramid, nga idi a ti Filisteo timmacder, ket immay ken immasideg a sumabet ken David, ni David nagdaras, ket timmaray a timmurong iti buyot a simmabet idi Filisteo.

⁴⁹ Ket ni David incautna ti imana idi supotna, ket nangaon idiay iti maysa a bato, ket isu ti impallatibongna, ket kinabilna ti Filisteo idi mugingna; ket ti bato nailumlom iti mugingna, ket napacleb a naiparabaw ti rupana iti daga.

⁵⁰ Iti casta ni David inabacna daydi Filisteo iti pannacaaramat ti maysa a pallatibong ken maysa a bato, ket kinabilna daydi Filisteo, ket isu pinatayna; ngem awan idi ti campilan iti ima ni David.

⁵¹ Idin ni David timmaray, ket nagtacder iti rabaw ti Filisteo, ket innalana ti campilanna, ket inasutna idi ba-inana, ket isu pinatayna, ken iti daydiay ti panangputolna idi olona. Ket idi a dagiti Filisteos nakitada a ti camaingelanda natay, nagtarayda.

⁵² Ket dagiti lallaki ti Israel ken ti Juda timmacderda, ket dimmir-ida, ken kinamatda dagiti Filisteos, agingga ti pacagtengan iti Gai, ken cadagiti ruangan ti Ecron. Ket dagiti nasugat cadagiti Filisteos napasagda iti dalan nga agpa-Saraim, agingga iti Gat met laeng, ken agingga iti Ecron.

⁵³ Ket dagiti annac ti Israel nagsublida iti panagcamatda cadagiti Filisteos, ket sinamsamba ti pacarsoda.

⁵⁴ Ket ni David innalana ti olo ti Filisteo, ket isu inyegna iti Jerusalem; ngem incabilna ti cabalna idi toldana.

⁵⁵ Ket idi a ni Saul nakitana ni David a rumuar idi a maibusor iti Filisteo, kinunana ken Abner, a capitan ti buyot, Abner, asino ti akinanac itoy a bumbumaro? Ket ni Abner kinunana, Cas sibibiag ta cararuam, O ari, diac mabalin nga ibaga.

⁵⁶ Ket ti ari kinunana, Tontonem no asino ti akinanac iti ubing.

⁵⁷ Ket idi a ni David nagsubli a naggapu iti panangpapatay iti Filisteo, isu innala ni Abner ket inyegna iti sango ni Saul agraman iti olo ti Filisteo nga igiggamanna.

⁵⁸ Ket ni Saul kinunana kencuana, Asino ti akinanac kenca, sica agtutubo a lalaki? Ket ni David simmungbat, Anacnac ni adipenmo a Isai a Betlehemita.