1 Samuel 16 - Ti Biblia (1973)

Ni Samuel pulotanna ni David; mapili a mamaragsac ken Saul; agbalin nga agawawit cadagiti igam ni Saul.

¹ Ket ni Jehova kinunana ken Samuel, Casano ti cabayag ti panangdungdung-awmo ken Saul, idinto nga isu binaybay-ac manipud iti panagarina iti Israel? punnoem ta saram iti lana, ket inca: ibaoncanto ken Isai a Betlehemita; ta nangisaganaac iti maysa nga ari cadagiti annacna a lallaki.

² Ket ni Samuel kinunana, Casano ti ipapanconto? No ni Saul matimudna, papatayennacto. Ket ni Jehova kinunana, Mangicuyogca kenca iti maysa a bumalasang a vaca, ket cunam, Umayac nga agdaton ken Jehova.

³ Ket ayabam ni Isai iti panagidaton, ket iparangconto kenca no ania ti aramidemto: ket pulotamto caniac daydiay nga inaganac kenca.

⁴ Ket ni Samuel inaramidna daydi imbaga ni Jehova ket immay iti Betlehem. Ket dagiti lallacay ti ili immayda simmabet kencuana nga agpigpigergerda, ket kinunada, Umayca a sicacappia?

⁵ Ket isu kinunana, Sicacappia; umayac agdaton ken Jehova, santificarenyo dagiti bagbagiyo, ket umaycayo cumuyog caniac iti panangidaton. Ket isu sinantificarna da Isai ken dagiti annacna a lallaki, ket inayabanna ida iti panangidaton.

⁶ Ket naaramid, idi immayda, nga isu kinitana ni Eliab, ket kinunana, Awan duadua ti pinulotan ni Jehova adda iti sangona.

⁷ Ngem ni Jehova kinunana ken Samuel, Dica kitaen ti langana, wenno iti cangato ti kinatayagna: agsipud ta isu saanco nga awaten; ta ni Jehova saan a cumita a cas iti ikikita ti tao; ta ti tao kitaenna iti akinruar a panagparang, ngem ni Jehova kitaenna ti puso.

⁸ Idin ni Isai inayabanna ni Abinadab, ket isu pinalasatna iti sango ni Samuel. Ket isu kinunana, Uray daytoy saan a pinili ni Jehova, saan a pinili ni Jehova.

⁹ Idin ni Isai pinalasatna ni Samma. Ket isu kinunana, Uray daytoy ni Jehova saanna a pinili.

¹⁰ Ket ni Isai pinaglasatna ti pito cadagiti annacna iti sango ni Samuel. Ket ni Samuel kinunana ken Isai, Ni Jehova dina pinili dagitoy.

¹¹ Ket ni Samuel kinunana ken Isai, Addadan ditoy dagiti isu-amin nga annacmo? Ket isu kinunana, Adda pay laeng ti caubingan, ket, adtoy, isu aywananna dagiti carcarnero. Ket ni Samuel kinunana ken Isai, Agbaonca, ket isu paalam; ta ditayto tumugaw agingga iti macaay ditoy.

¹² Ket isu nagbaon, ket isu inyegna. Isu lumabaga idi, ken addaan pay nataer a langa ket napintas ti buyana. Ket ni Jehova kinunana, Tumacderca, isu pulotam; ta isu daytoy.

¹³ Idin ni Samuel innalana ti sara ti lana, ket isu pinulotanna iti tengnga dagiti cacabsatna: ket ti Espiritu ni Jehova immay a sipipigsa unay ken David nanipud iti daydi nga aldaw ken calpasanna. Iti casta ni Samuel timmacder, ket napan idiay Rama.

¹⁴ Ngem ti Espiritu ni Jehova pimmanaw ken Saul, ket maysa nga espiritu a dakes a gapu ken Jehova ti nangriribuc kencuana.

¹⁵ Ket dagiti ad-adipen ni Saul kinunada kencuana, Adtoy ita, maysa nga espiritu a dakes a gapu ken Jehova ti mangriribuc kenca.

¹⁶ Bilinen coma ni apomi dagiti ad-adipenmo, nga addada iti sangom, tapno mangsapulda iti maysa a lalaki, isu a nalaing nga agtocar iti arpa: ket maaramidto, a no ti dakes nga espiritu a gapu ken Jehova rumabaw kenca, nga isu agtocarto iti pannacaaramat ti imana, ket sumayaatcanto.

¹⁷ Ket ni Saul kinunana cadagiti adipenna, Isapulandac iti maysa a lalaki a macabalin nga agtocar a nalaing, ket isu yegyo caniac.

¹⁸ Idin simmungbat ti maysa cadagiti agtutubo a lallaki, ket kinunana, Adtoy nakitac ti maysa nga anac a lalaki ni Isai a Betlehemita, nga isu ti maysa a nalaing iti panagtocar, ken maysa a lalaki a mannacabalin ken maingel, ken maysa a lalaki ti gubat, ken manakem iti panagbitla, ken maysa a nataer a tao, ket ni Jehova adda kencuana.

¹⁹ Gapuna a ni Saul nangibaon cadagiti babaonen ken Isai, ket kinunana, Ibaonmo caniac ni David nga anacmo, nga adda cadagiti carnero.

²⁰ Ket ni Isai nangala iti maysa nga asno a napaawitan iti tinapay, ken sangasupot a lalat nga arac, ken maysa a calding a bassit, ket impawitna ida ken Saul iti ima ni David nga anacna.

²¹ Ket ni David immay ken Saul, ket nagtacder iti sangona: ket ni Saul inayatna iti casta unay; ket nagbalin nga agawawit cadagiti igamna.

²² Ket ni Saul nagbaon ken Isai, a kinunana, Agdawatac kenca, palubosam coma ni David nga agtacter iti sangoanac; ta nacasarac iti parabur iti imatangco.

²³ Ket naaramid, a no ti dakes nga espiritu gapu iti Dios napataud ken Saul, a ni David innalana ti arpa, ket nagtocar babaen cadagiti imana: iti casta ni Saul nabangaran, ken simmayaat, ket ti dakes nga espiritu pimmanaw kencuana.