1 Samuel 15 - Ti Biblia (1973)

Ni Jehova ibilinna ti panangcabil iti Amalec. Ni Saul dina tungpalen ti isu-amin a maipapan iti Amalec. Ni Samuel tubngarenna ket ti Dios baybay-anna ni Saul. Ni Agag napapatay.

¹ Ket ni Samuel kinunana ken Saul, Ni Jehova imbaonnac idi a nangpulot kenca nga agari iti ilina, iti Israel: ita ngarud ipangagmo ti timec dagiti sasao ni Jehova.

² Castoy ti cuna ni Jehova dagiti buybuyot, Siac tinandaanac daydi nga inaramid ti Amalec iti Israel, no casano ti panangisaadna iti bagina a maibusor kencuana iti dalan, idi simmangpet a naggapu iti Egipto.

³ Ita inca ket cabilem ti Amalec, ket dadaelem nga ikisap amin nga icutanna, ket dica isakit ida; no di ket patayem nga agpadpada ti lalaki ken babai, ubing ken agsuso, vaca ken carnero, camello ken asno.

⁴ Ket ni Saul pinaayabanna dagiti tattao ket binilangna ida idiay Telaim, dua gasut a ribu a magmagna, ken sangapulo a ribu a lallaki ti Juda.

⁵ Ket ni Saul immay iti ili ti Amalec, ket nagsaneb iti lobong.

⁶ Ket ni Saul imbagana cadagiti Cineo, Incayo, pumanawcayo, sumalogcayo manipud iti tengnga dagiti Amalecitas, di la ket ta siac dadaelencayo a maicanunung cadacuada; ta dacayo imparangyo ti kinaimbag cadagiti annac ti Israel, idi simmang-atda a naggapu sadi Egipto. Iti casta dagiti Cineo pimmanawda nanipud iti tengnga dagiti Amalecitas.

⁷ Ket ni Saul kinabilna dagiti Amalecitas, manipud Havila iti dalan nga agturong idiay Shur, nga adda iti sango ti Egipto.

⁸ Ket isu innalana ni Agag nga ari dagiti Amalecitas a sibibiag, ket dinadaelna nga inkisap ti amin nga umili iti tadem ti campilan.

⁹ Ngem ni Saul ken dagiti tattao insakitda ni Agag, ken ti casayaatan unay cadagiti carcarnero ken vacvaca, ken cadagiti napalucmeg, ken cadagiti cordero, ken amin a nasayaat idi, ket dida kinayat a dinadael nga inkisap ida: ngem isu-amin a nacas-ang ken dakes dinadaelda nga inkisap.

¹⁰ Idin immay ti sao ni Jehova ken Samuel, a kinunana,

¹¹ Pagbabawiennac ti panangisaadco idi ken Saul nga agari; ta isu timmallicod manipud iti isusurotna caniac, ket dina tinungpal dagiti bilbilinco. Ket ni Samuel nagpungtot; ket immasug ken Jehova iti nagpatnag iti daydi a rabii.

¹² Ket ni Samuel bimmangon iti nasapa a mangsarac ken Saul iti bigat; ket naibaga ken Samuel, a nacuna, ni Saul immay iti Carmelo, ket, adtoy, nangibangon kencuana iti maysa a monmon, ket nagsicco, ket nagna, ket simmalog agingga iti Gilgal.

¹³ Ket ni Samuel immay ken Saul; ket ni Saul kinunana kencuana, Benditoca coma ken Jehova: tinungpalco ti bilin ni Jehova.

¹⁴ Ket ni Samuel kinunana, Ania ti caipapanan ngarud dagitoy a panagem-emmac dagiti carcarnero cadagiti lapayagco, ken ti panagem-emmac dagiti vacvaca a mangegco?

¹⁵ Ket ni Saul kinunana, Innalada ida cadagiti Amalecitas: ta dagiti tattao incanawada ti casayaatan unay cadagiti carcarnero kenca dagiti vacvaca, nga idaton ken Jehova a Diosmo; ket ti natda dinadaelmi nga inkisap.

¹⁶ Idin ni Samuel kinunana ken Saul, Agurayca, ket ibagacto kenca no ania ti kinuna caniac ni Jehova itay a rabii. Ket isu kinunana kencuana, Agsaoca laeng.

¹⁷ Ket ni Samuel kinunana, Nupay sica bassitca idi iti imatangmo met laeng, saanca aya a naaramid nga olo dagiti capcaputotan ti Israel? Ket ni Jehova pinulotannaca nga agari iti Israel;

¹⁸ Ket ni Jehova imbaonnaca iti maysa a pannagna, ket kinunana, Inca, ket dadaelem nga ikisap dagiti managbasol nga Amalecitas, ket makigubatca a maibusor cadacuada agingga iti maibusda.

¹⁹ Apayapay ngarud a dica tinungpal ti timec ni Jehova, no di ket timmarayca a nagala iti samsam, ket inaramidmo daydi a dakes iti imatang ni Jehova?

²⁰ Ket ni Saul kinunana ken Samuel, Wen, nagtulnogac iti timec ni Jehova, ket nagnaac iti dalan a nangibaonan caniac ni Jehova, ket innalac ni Agag nga ari ti Amalec, ket dinadaelco nga inkisap dagiti Amalecitas.

²¹ Ngem dagiti tattao innalada a naggapu iti samsam, dagiti carcarnero ken vacvaca, ti cangronaan cadagiti banbanag a naipaay, tapno idatonda ken Jehova a Diosmo idiay Gilgal.

²² Ket ni Samuel kinunana, Addaan aya ni Jehova iti dacdackel a ragsac cadagiti daton a mapuuran ken sacrificio, ngem iti panagtulnog iti timec ni Jehova? Adtoy, ti panagtulnog naim-imbag ngem iti sacrificio, ken panangipangag ngem iti kinalucmeg dagiti carcarnero a lallaki.

²³ Ta ti kinasukir isu ti cas iti basol a panangcuculam, ket ti kinasungit isu ti cas panagrucbab cadagiti ladladawan ken didios. Agsipud ta sica binaybay-am ti sao ni Jehova, isu binaybay-annaca met manipud iti kinaarim.

²⁴ Ket ni Saul kinunana ken Samuel, Siac nacabasolac, ta linabsingco ti bilin ni Jehova, ken dagiti sasaom, agsipud ta nagbutengac cadagiti tattao, ken nagtulnogac iti timecda.

²⁵ Gapuna ita, dawatec kenca, pacawanem ti basolco, ket makipagsublica manen caniac, tapno agcararagac coma ken Jehova.

²⁶ Ket ni Samuel kinunana ken Saul, Diacto makipagsubli kenca; ta sica binaybay-am ti sao ni Jehova, ket ni Jehova binaybay-annaca manipud iti kinaarim iti Israel.

²⁷ Ket idi a ni Samuel timmallicud a pumanaw, ni Saul kinapetna ti pingil ti lambonna, ket napigis.

²⁸ Ket ni Samuel kinunana kencuana, Ni Jehova pinigisna ti pagarian ti Israel manipud kenca ita nga aldaw, ket isu intedna iti maysa a caarrobam, a naim-imbag ngem sica.

²⁹ Ken castamet ti Kinabileg ti Israel dinto agulbod ken dinto met agbabawi; ta isu saan a maysa a tao, tapno agbabawi coma.

³⁰ Idin isu kinunana, Nacabasolac: nupay casta dawatec kenca, padayawannac coma ita; iti sango dagiti lallacay ti ilic, ken iti sango ti Israel, ket makipagsublica caniac, tapno, agcararagac coma ken Jehova a Diosmo.

³¹ Iti casta ni Samuel nakipagsubli manen ken Saul; ket ni Saul nagcararag ken Jehova.

³² Iti casta kinuna ni Samuel, Yegco caniac ditoy ni Agag nga ari dagiti Amalecitas. Ket ni Agag immay a siraragsac kencuana. Ket ni Agag kinunana, Awan duadua nalasat ti kinapait ni patay.

³³ Ket ni Samuel kinunana, No casano ti panangaramid idi ta campilanmo cadagiti babbai a naawanan annac, casta met ni inam maawananto iti anacna iti nagtengngaan dagiti babbai. Ket ni Samuel rinangcayna ni Agag iti sango ni Jehova idiay Gilgal.

³⁴ Idin ni Samuel napan idiay Rama; ket ni Saul simmang-at iti balayna idiay Gabaa ni Saul.

³⁵ Ket ni Samuel saan nga immayen a kimmita ken Saul agingga iti aldaw ti ipapatayna; ta ni Samuel nagdungdung-aw gapu ken Saul: ket ni Jehova nagbabawi iti panangaramidna ken Saul nga agari iti Israel.