1 Samuel 1 - Ti Biblia (1973)

Ni Elcana ken dagiti dua nga Assawana. Ni Anna agdawat iti Dios iti maysa nga anac. Ni Samuel mayanac ket maited ken Jehova.

¹ Adda idi maysa a lalaki ti Ramataim ti Sofim ti caturodan ti Efraim, a ti naganna Elcana, nga anac a lalaki ni Jeroham, nga anac a lalaki ni Eliu, nga anac a lalaki ni Tohu, nga anac a lalaki ni Suf, maysa nga Efraimita:

² Ket addaan idi iti dua nga assawa; ti ngagan ti maysa Anna; ket ti nagan di sabali Feninna: ket ni Feninna addaan idi iti dua nga annac, ngem ni Anna awanan idi iti anac.

³ Ket sumang-at idi daytoy a lalaki iti tinawentawen, manipud iti ilina tapno agcararag ken agdaton ken Jehova dagiti buybuyot idiay Silo: isu nga yan idi dagiti dua nga annac ni Eli, da Ofni ken Finees a papadi ni Jehova.

⁴ Ket idi nga immay iti aldaw, a ni Elcana nagidaton, intedna ken Feninna nga asawana, ken cadagiti amin nga annacna a lallaki ken babbai, dagiti apapagda:

⁵ Ngem ken Anna intedna dagiti dua nga papag; ta isu ayayatenna idi ni Anna, ngem ni Jehova pinunitanna idi ti tianna.

⁶ Ket ti casalisalna isu kinaritna a nacaro a pinangpapulcocna, ta ni Jehova pinunitanna idi ti tianna.

⁷ Ket gapu ta ni Elcana inaramid na casta iti tunggal tawen: idi simmang-at ni Feninna iti balay ni Jehova, isu kinaritna a casta ni Anna gapuna nga isu nagsangsangit, ken saan a nangan.

⁸ Ket ni Elcana nga asawana kinunana kencuana, Anna, apayapay nga agsangitca? Ken apayapay a dica mangan? Ket apayapay nga agladingit ta pusom? Saanac aya a naimimbag kenca ngem cadagiti sangapulo nga annac a lallaki?

⁹ Iti casta timmacder ni Anna iti calpasan ti pannanganda ken yiinumda idiay Silo. Ket ni Eli a padi adda idi a situtugaw iti rabaw ti tugawna iti denna ti baotec ti ruangan ti templo ni Jehova.

¹⁰ Ket ni Anna adda idi iti kinapait ti cararua, ket nagcararag ken Jehova, ket nagsangit iti nacaro unay.

¹¹ Ket nagaramid iti cari, a kinunana, O Jehova dagiti buybuyot, no kitaem coma ti kinaay-ay-ay ti adipenmo a babai, ket lagipennac coma ken dica malipatan ti adipenmo a babai, no di ket mangtedca coma iti adipenmo a babai ti anac a lalaki, siac idatonconto ken Jehova cadagiti amin nga al-aldaw ti panagbiagna, ket dinto umuli ti pangiskis iti rabaw ti olona.

¹² Ket naaramid idi nga isu agcarcararag idi iti sango ni Jehova, ni Eli isu sipsiputanna ti ngiwatna.

¹³ Ita ni Anna agsasao idi iti pusona, ket dagiti laeng bibigna ti naggaraw, ket saan idi a mangeg ti timecna; gapuna a ni Eli impagarupna nga isu nabartec idi.

¹⁴ Ket ni Eli kinunana kencuana, Agingga iti caano ti caaddamto a nabartec? yadayum ta aracmo kenca.

¹⁵ Ket ni Anna simmungbat ket kinunana, Saan, apoc, siac maysaac a babai a naladingit ti espirituna: diac imminum iti arac wenno iti naingel nga inumen, no di ket imbucbucco ti cararuac iti sango ni Jehova.

¹⁶ Dica coma ibilang ti adipenmo a maysa a babai a dakes, ta iti kinawadwad ti ladingitco ken ti unnoyco nagsaoac agingga ita.

¹⁷ Idin ni Eli simmungbat ket kinunana, Inca a sitatalna; ket ti Dios ti Israel itedna coma kenca ti dawatmo a dinawatmo kencuana.

¹⁸ Ket isu kinunana, Macasarac coma ti adipenmo a babai iti parabur iti saclangmo. Ket nagawid daydi babai, ket nangan; ket ti rupana saan idin a silaladingit.

¹⁹ Ket bimmangonda a nasapa iti bigat, ket nagcararagda iti sango ni Jehova, ket nagsublida, ket immayda iti balayda idiay Rama. Ket ni Elcana tinignayna ni Anna nga asawana a babai, ket ni Jehova limmagip kencuana;

²⁰ Ket naaramid nga idi nadanon ti tiempo ni Anna nagsicog, ket impasngayna ti maysa nga anac a lalaki; ket ingaladna ti nagan a Samuel, a kinunana, Gapu ta isu dinawatco ken Jehova.

²¹ Ket ni lalaki nga Elcana ken amin a balayna simmang-atda a mangirucbab ken Jehova ti daton a tinawentawen, ken daydi carina.

²² Ngem ni Anna saan a simmang-at; no di ket kinunana ken asawana, Siac diacto sumang-at agingga iti di mapusot ti ubing; ket iti casta ipanconto, tapno ti ubing agparang coma iti saclang ni Jehova, ken agbati coma idiay iti agnanayon.

²³ Ket ni Elcana nga asawana kinunana kencuana, Aramidem ti pagarupem a naimbag; agbatica agingga iti panangpusotmo kencuana; isuna laeng a ni Jehova pasingkedanna coma ti saona. Iti casta nagbati ti babai, ket tinarakenna ti anacna a lalaki, agingga iti panangpusotna kencuana.

²⁴ Ket calpasan nga isu napusotna, isu incuyogna kencuana, agraman tallo a vaca, ken maysa nga efa a macan ken sangasupot a lalat nga arac, ken isu inyegna iti balay ni Jehova idiay Silo, ket ti ubing a lalaki bassit pay laeng idi.

²⁵ Ket pinartida ti vaca, ket inyegda ti ubing ken Eli.

²⁶ Ket kinunana, O, apoc, cas sibibiag, ta cararuam, apoc, siac daydi babai nga agcarcararag ken Jehova a timmacder idi ditoy iti dennam.

²⁷ Gapu itoy nga ubing nagcararagac ket ni Jehova intedna caniac ti dawatco a dinawatco kencuana.

²⁸ Isu met ti gapuna nga isu impaayco ken Jehova; cadagiti amin nga al-aldaw ti panagbiagna cucuanto ni Jehova. Ket nagcararag idiay ken Jehova.