1 Pedro 5 - Ti Biblia (1973)

Annongen dagiti panglacayen ken saan a panglacayen.— Panagpacumbaba ken panagannad.

¹ Dawatec ngarud cadagiti panglacayen, nga adda cadacayo, siac a panglacayen met, ken macasacsi cadagiti sinagaba ni Cristo, siac a mairaman met iti dayag a maiparangarangto:

² Ipastoranyo ti arban ti Dios nga adda cadacayo, nga acmenyo ti panangaywan, saan a mapilpilit, no di ket siaayat cas mayannurot iti pagayatan ti Dios: saan met nga iti naalas a panagsapul, no di ket iti nasiglat a nakem;

³ Saancayo met a cas la agturay cadagiti naicumit cadacayo, no di ket agbalincayo coma a pagulidanan dagiti arban.

⁴ Ket inton maipanayag ti catan-ocan a Pastor, awatenyonto ti balangat a nagloriaan a di agrupsa.

⁵ Casta met dacayo a saan a panglacayen, agtulnogcayo cadagiti panglacayen; ket dacay amin, agcawescayo iti kinaemma, nga agtitinnulongcayo, ta ti Dios tallicudanna dagiti natangsit, ngem iccana ti parabur dagiti napacumbaba.

⁶ Agpacumbabacayo ngarud iti mannacabalin nga ima ti Dios, tapno isu itanocnacay coma iti pannacaipaayna nga aldaw;

⁷ Nga itaclinyo kencuana ti amin a pagdanaganyo gapu ta isu aluadannacayo.

⁸ Agparbengcayo, agsalucagcayo; ti diablo a cabusoryo, cas la leon a ngumerngernger, magmagna iti sibayyo nga agsapsapul ti alun-unenna.

⁹ Isu sarangtenyo ngarud babaen iti nabileg a pammati, yantangay ammoyo a dagiti castoy a sagsagabaen madamada a mapasamac cadagiti cacabsatyo nga adda ditoy lubong.

Panangidaodawat ken panagpacada.

¹⁰ Ket ti Dios ti amin a parabur a nangawis cadacayo iti agnanayon a gloriana ken Cristo, iti calpasan ti panagsagabayo iti bassit nga aldaw, isu met laeng palaingennacayto, patibkerennacayto, papigsaennacayto.

¹¹ Maited coma kencuana ti panagturay, iti agnanayon nga awan inggana. Amen.

¹² Gapu ken Silvano, cabsattayo a matalec cas ti panangibilangco nagsuratac cadacayo iti ababa, a bagbagaancayo ket panecnecac a daytoy isu ti napaypayso a parabur ti Dios; agtalinaedcayo kencuana.

¹³ Cablaawannacayo ti Iglesia nga adda ditoy Babilonia, a napili a cas cadacayo, ken ni Marcos, nga anacco.

¹⁴ Agkikinnablaawcayo a buyugen ti agep ni ayat. Talna coma cadacay amin dacayo nga adda ken Cristo.