1 Pedro 4 - Ti Biblia (1973)

Ibalacadna ti kinasanto ken ti panagtalinaed.

¹ Idinto ngarud ta nagsagaba ni Cristo iti lasag, dacayo met agigamcayo iti cas di met a panunot, ta ti nagsagaba iti lasag, simmardeng iti basol;

² Tapno ti tiempoyo a natda pay iti lasag, dicay agbiag a maipaay cadagiti derrep dagiti tattao, no di ket maipaay iti pagayatan ti Dios.

³ Ta ti aldaw a napalabas immanayen a panagaramid iti pagayayatan dagiti Gentil, a panagbiag iti kinaderrep, dagiti tarigagay nga aglablabes, dagiti panagbarbartec, dagiti kinabuklis, dagiti aglablabes a daydaya ken dagiti macarimon a panagrucbab cadagiti ladladawan a didiosen:

⁴ Ket cadagitoy a banbanag masmasdaawda gapu ta dicay makitimpuyogen cadacuada iti panaglablabes iti kinadakes, ket ab-abienda cayo:

⁵ Isuda idatagdanto daytoy iti daydiay adda a sisasagana a mangocom cadagiti nabiag ken natay.

⁶ Ta gapu itoy naicascasaba ti evangelio uray pay cadagiti natay tapno maocomda a pudno cas mayannurot cadagiti tattao no maipapan iti lasag, ngem agbiagda coma a cas mayannurot iti Dios no maipapan iti espiritu.

⁷ Ngem ti tungpal dagiti isu-amin a banag asidegen; agparbengcay ngarud ken agsalucagcayo iti cararag:

⁸ Ket nangnangrona ngem amin adda coma cadacayo met laeng ti nasged nga ayat ta ti ayat abbunganna dagiti adu unay a basbasol:

⁹ Nga agpipinnadaguscayo nga awan tantanabutob:

¹⁰ Tunggal maysa cas iti sagut nga inawatna tumulong coma cadagiti sabali, cas naimbag a mapagtalcan cadagiti adu a kita ti parabur ti Dios.

¹¹ No ti siasinoman nga agsao, agsao coma cas cadagiti sasao ti Dios; no ti maysa agservi cas coma iti pannacabalin nga inted ti Dios: tapno ti Dios madaydayaw coma cadagiti isu-amin a banbanag, gapu ken Jesu-Cristo; isu a makincua iti dayag ken iti panagturay iti agnanayon nga awan inggana. Amen.

¹² Ay-ayatec, dicay panunuten a nacascasdaaw dagiti nabara a rigrigat a maar-aramid cadacayo nga umay mangsuut cadacayo, a cas la adda maysa a banag a nacascasdaaw a mapasamac cadacayo:

¹³ No di ket agragsaccayo, gapu ta mairamancayo cadagiti panagsagaba ni Cristo; tapno iti pannacaiparangarang ti dayagna, agrag-o cayo met iti rag-o a nagdanunan.

¹⁴ No maumsicayo gapu iti nagan ni Cristo, nagasatcayo; ta ti Espiritu ti dayag ken ti Dios agtaeng cadacayo.

¹⁵ Ta awan coma ti agsagaba cadacayo a cas nacapapatay, wenno cas la mannanacaw wenno cas la managdacdakes, wenno cas la bumibiang cadagiti sabali a tattao:

¹⁶ Ngem no adda agsagaba a cas cristiano, saan coma nga agbain, no di ket dayawenna coma ti Dios itoy a nagan.

¹⁷ Ta dimteng ti tiempo a ti panangocom mangrugi iti balay ti Dios: ket no mangrugi cadatayo anianto ti tungpal dagiti saan nga agtulnog iti evangelio ti Dios?

¹⁸ Ket no ti nalinteg narigat ti pannacaisalacanna sadino ti pagparangan dagiti nasukir ken managbasol.

¹⁹ Gapuna, dagiti agsagaba a mayannurot iti pagayatan ti Dios, italecda coma dagiti cararuada iti mapagtalcan a Namarsua, babaen ti panagaramidda iti naimbag.