1 Pedro 3 - Ti Biblia (1973)

Dagiti rebbengen dagiti agaassawa.

¹ Casta met dacayo a babbai, agtulnogcayo cadagiti assawayo; ta, uray pay dagiti dadduma saanda nga agtulnog iti sao, mapatulnogda nga awan ti sao, gapu iti cababalin dagiti assawada;

² No mapaliwda ti nanacman a panagbiagyo a buyugen ti pammadayaw.

³ A ti arcosyo saan coma a ti arcos iti ruar, ti pannagsallapid iti booc ken ti panangicapet cadagiti alhajas a balitoc wenno ti naarcos a pagan-anay;

⁴ Ngem ti tao a makin-uneg iti puso maarcosan coma iti cawes a mataginayon ti maysa a nakem a naemma ken natalna, isu a dackel ti pategna iti imatang ti Dios.

⁵ Ta castoy met idi unana nga aldaw, ti panagcawes dagiti nasantoan a babbai, a nanginanama iti Dios, kinawesanda dagiti bagbagida met laeng idinto nga nagtulnogda cadagiti assawada:

⁶ Cas ken Sara nagtulnog ken Abraham, ket ninaganna nga apo; ket dacayo dagiti annacna, no agaramidcay iti naimbag, ket dicay agbuteng gapu iti aniaman a pagkigtotan.

⁷ Casta met dacayo a lallaki makipagnaedcayo cadagiti assawayo a mayalubog iti kinasirib, a padayawanyo ida a cas iti vaso a narasrasi ken cas makipagtawid met iti parabur ti biag; tapno dagiti carcararagyo saanda coma a malappedan.

Panagcacabsat; panagitured cadagiti ranggas a cas iti ulidan ni Cristo.

⁸ Camaudiananna agmaymaysacay coma amin iti nakem, naayat, agdidinnungngocayo a cas la agcacabsat, manangngaasi, naemma:

⁹ A dicay supapacan ti dakes iti dakes, ti lunod iti lunod, no di ket icararaganyo ida; ta gapu itoy naawiscayo, tapno tawidenyo ti pannacabendicion.

¹⁰ Ta, ti agtarigagay nga agayat iti biag, Ken macakita cadagiti nasayaat nga al-aldaw, Igawidna ti dilana iti dakes, Ken dagiti bibigna, tapno dida agsao ti ulbod:

¹¹ Umadayu coma iti dakes, ket agaramid iti naimbag; Sapulenna coma ti talna, ket isu ti surutenna.

¹² Ta dagiti mata ti Apo sikikitada cadagiti nalinteg, Ket dagiti pagdengngegna sititimudda cadagiti arararawda; Ngem ti rupa ti Apo sisasango cadagiti agaramid iti dakes:

¹³ Ket siasino dayta mangranggasto cadacayo, no regtaanyo ti naimbag?

¹⁴ Ngem uray no agsagabacayo gapu iti kinalinteg, nagasatcayto, ket dicay pagbutngan ti amac a pataudenda ket dicay met aglagaw;

¹⁵ No di ket patgenyo ni Cristo a cas Apo cadagiti puspusoyo, a madadaancayo a sumungbat iti isu-amin a mangintuudto cadacayo ti gapu ti inanama nga adda cadacayo; ngem sipapacumbaba ken sidadayaw:

¹⁶ Nga adda nasayaat a nakemyo; tapno iti daydiay met laeng a pangsao-anda ti dakes cadacayo, mabainan dagiti manguyaw iti nasayaat a panagbiagyo ken Cristo.

¹⁷ Ta nasaysayaat, no casta ti pagayatan ti Dios, ti agsagaba nga agaramid iti naimbag, ngem iti agaramid iti dakes.

¹⁸ Ta ni Cristo nagsagaba met gapu cadagiti basbasol, iti naminpinsan daydi nalinteg gapu cadagiti nakil-lo, tapno iragpatnatayo iti Dios, idi napapatay no maipapan iti lasag, ngem sibibiag no maipapan iti espiritu:

¹⁹ Ket babaen ti espiritu napan met ket nangascasaba cadagiti espiritu a sibabalud,

²⁰ Dagidiay nga nasukirda idi unana nga aldaw idi agururay ti atiddug nga anus ti Dios, cadagidi aldaw ni Noe, idi maisagsagana pay di daong; isu a nacaisalacanan dagiti bassit, gapu iti danum, cayatna a saoen, walo a cararua;

²¹ Isu a napaypayso a caasping ti pammautizar, a mangisalacan ita cadatayo met a saanna nga iccaten cadatayo ti rugit ti lasag, no di cas la dawat ti maysa a nasayaat a nakem iti Dios, gapu iti panagungar ni Jesu-Cristo;

²² Isu, nga idinto nga immuli sadi langit adda iti macanawan ti Dios, a paiturayanda kencuana dagiti angel ken dagiti kinaturay ken dagiti pannacabalin.