1 Pedro 2 - Ti Biblia (1973)

Ti nangnangrona a bato iti balay.

¹ Gapuna, idianyo ti amin a kinadakes, ken amin a kinasicap ken dagiti panaginsisingpet, ken ap-apal, ken isu-amin a kita dagiti dakes a sa-sao,

² A cas ubbing a caiyanac, tarigagayanyo ti awan lalaocna a gatas a naespirituan tapno dumackelcayo gapu kencuana a maipaay iti pannacaisalacan;

³ No napadasyo a ti Apo naayat:

⁴ Dumatengcayo kencuana, isu a cas la maysa a bato a nabiag, nga imbel-leng a pudno dagiti tattao, ngem isu napili ken napateg iti Dios.

⁵ Dacayo met, cas batbato a sibibiag, maibangoncayo a maysa a templo a naespirituan, nga agbalincayo a maysa a nasantoan a kinapadi; tapno idatonyo dagiti datdaton ti cararua, a macaay-ayo iti Dios, gapu ken Jesu-Cristo.

⁶ Gapu ta adda a nailanad iti Surat: Adtoy siac isaadco idiay Sion ti nangnangrona a bato a pasuli, napili, napateg; Ket dayta mamati kencuana, saanto a maibabain.

⁷ Maipaay cadacayo ngarud a mamati isu ti napateg; ngem maipaay cadagiti saan a mamati, Ti bato nga imbel-leng dagiti agar-aramid ti balay, Isu met laeng ti naaramid a pasuli;

⁸ Ken, Bato a pacaitibcolan ken bato a pacaibabainan; ta maitublacda iti sao, idinto a nasukirda: Ket itoy met nakednganda.

⁹ Ngem, dacayo ti napili a caputotan, ti naarian a kinapadi, nasantoan a nacion, ili a cucua ti Dios; tapno ipaduyacyacyo dagiti kinatan-oc daydiay nangayab cadacayo manipud kinasipnget inggana iti nacascasdaaw a lawagna:

¹⁰ Dacayo nga idi napalabas nga aldaw saancay nga umili, ngem ita dacay ti ili ti Dios; nga idi saancayo a nacaasian ngem ita nacaasiancayon.

Dagiti nasayaat nga awid maipaay nga aramaten tapno ulidan dagiti saan a cristiano.—Panagtuloc cadagiti agturay.

¹¹ Ayayatec, dawatec cadacayo, dacayo a cas gangannaet ken agpagpagna, nga idianyo coma dagiti derderrep a linalasag, isuda a manggubat iti cararua:

¹² A patacnengenyo coma ti panagbibiagyo iti tengnga dagiti Gentil; tapno dayta pagsao-anda iti dakes cadacayo, a cas la managaramid iti dakes, gapu cadagiti nasayaat nga aramidyo a makitada, dayawenda coma ti Dios iti aldaw ti pannacaocom.

¹³ Paiturayancayo iti amin nga alalagaden dagiti agturay gapu iti Apo: uray pay iti ari, a cas cangatoan unay;

¹⁴ Wenno cadagiti gobernador a naibaon a mangdusa cadagiti agaramid ti dakes, ken mangidayaw cadagiti agaramid ti naimbag.

¹⁵ Ta castoy ti nakem ti Dios, a dacayo gapu iti panagaramidyo iti nasayaat, pagulimekenyo ti kinanengneng dagiti tattao a nacuneng:

¹⁶ A cas la agwayawayacayo, ngem ti panagwayawayayo saan coma a maaramat a pangabbong iti kinadakes, no di ket cas la ad-adipen ti Dios.

¹⁷ Padayawanyo dagiti isu-amin a tattao; ayatenyo dagiti cacabsat; agbutengcayo iti Dios; dayawenyo ti ari.

Annongen dagiti adipen a cristiano.

¹⁸ Paad-adipen agtulnogcayo a siaamac cadagiti appoyo saan laeng a cadagiti naimbag ken naanus, no di ket cadagiti pay naunget.

¹⁹ Ta daytoy macaayayo, no ti siasinoman a gapu iti pakinakemna maipuon iti Dios agitured cadagiti rangranggas, nga aglac-am a di maiparbeng.

²⁰ Ta ania ti pacaidayawan, no idinto nga agbasolcayo ket matungpacayo, ket sagabaenyo a siaanus? ngem no agaramidcayo iti naimbag ket agsagabacayo, ket ituredyo a siaanus, daytoy macaayayo iti Dios.

²¹ Ta maipaay iti daytoy naawiscayo; ta ni Cristo nagsagaba met gapu cadacayo, a nangibati cadacayo iti ulidan, tapno surutenyo dagiti addangna:

²² Isu saan a nagaramid iti basol, ket awan ti nasaracan nga al-lilaw iti ngiwatna.

²³ Isu, nga idi rinabrabngisda, saan a simmungbat iti dakes; idi nagsagaba, saan a nangam-ames, no di ket nagtalec iti daydiay mangocom a sililinteg:

²⁴ Isu met laeng a nangawit cadagiti basbasoltayo iti bagina iti rabaw di cayo, tapno idinto a nataytayo cadagiti basbasol, agbiagtayo a maipaay iti kinalinteg: gapu cadagiti sugsugatna naagasancayo.

²⁵ Ta dacayo nayawawancayo idi a cas cadagiti carnero; ngem ita nagsublicayo iti Pastor ken Obispo dagiti carcararuayo.