1 Pedro 1 - Ti Biblia (1973)

Ti dackel a caasi ti Dios.

¹ Ni Pedro maysa nga apostol ni Jesu-Cristo, isuratna cadagiti napili a gangannaet iti Pannacaiwarwara idiay Ponto, Galacia, Capadocia, Asia ken Bitinia,

² A napilida cas mayannurot iti sigud a pannacaammo iti Dios Ama, babaen ti pannacapagsantoda gapu iti Espiritu a maipaay iti panagtulnog ken pannacaiwarsi ti dara ni Jesu-Cristo: Parabur ken talna ti umadu coma cadacayo.

³ Madaydayaw coma ti Dios ken Ama ni Apotayo a Jesu-Cristo, isu a mayalubog iti dackel nga asina, binaliwannatay nga inyanac a maipaay iti maysa nga inanama a sibibiag, gapu iti panagungar ni Jesu-Cristo cadagiti natay;

⁴ A maipaay iti maysa a tawid a di agrupsa, ken awan tulawna ket saan a magango, naidulin sadi langit a maipaay cadacayo,

⁵ A gapu iti pannacabalin ti Dios maaywanancayo, gapu iti pammati, a maipaay iti pannacaisalacan, a sisasagana tapno maiparangarang iti camaudianan nga aldaw.

⁶ Ket iti daytoy agragrag-ocayo unay, nupay ita iti bassit nga aldaw no isu ti masapul a napagladingitcayo gapu cadagiti nadumaduma a pannacasulisog,

⁷ Tapno ti pannacasuut ti pammatiyo a napatpateg unay ngem iti balitoc a mapucaw, uray pay no maguguran iti apuy, agparang coma a pacaidayawan ken dayag ken tan-oc, iti pannacaiparangarang ni Jesu-Cristo:

⁸ Isu nga uray no dicay nakita, ayatenyo; ket uray no ita dicay makita, patienyo ket agrag-ocayo iti di mayebcas a rag-o ken napno iti dayag:

⁹ Nga awatenyo ti pagbanagan ti pammatiyo, ti pannacaisalacan dagiti cararuayo.

¹⁰ Maipapan itoy a pannacaisalacan, dagiti mammadto a nagipadto iti maipapan iti parabur a maipaay cadacayo sinapulda ket sinukimatda a sireregta.

¹¹ A sinucsukimatda no ania wenno casano ti tiempo nga imbaga ti Espiritu ni Cristo, nga adda idi cadacuada, idi impacpacaunana a sinacsian dagiti tutuoc a maipaay ken Cristo ken dagiti daydayag a sumarunonto cadacuada.

¹² Naipacdaar cadacuada a saan a maipaay cadacuada, no di ket cadacayo, inayaywananda gapu cadagiti nangicascasaba cadacayo iti evangelio babaen ti Espiritu Santo a naibaon nanipud sadi langit: banbanag a dagiti angel tarigagayanda a kitaen.

Panagsingsingpet.

¹³ Gapuna, idinto a sibabarikes ti siket ti nakemyo, agteppelcayo, ket imaldityo ti amin nga inanamayo iti parabur a mayegto cadacayo iti pannacaiparangarang ni Jesu-Cristo;

¹⁴ Cas annac ti kinatulnog: dicay anamungan dagidi dakes a tarigagayyo, idi addacay pay iti kinanengneng:

¹⁵ No di ket cas daydiay nangayab cadacayo isu ti santo, agsantocayo met iti amin a kita ti panagbiag;

¹⁶ Ta adda a naisurat: Agsantocayo ta siac santoac.

¹⁷ Ket no awaganyo nga Ama daydiay, di mangidumduma cadagiti tattao, a mangocom cas iti aramid ti tunggal maysa, agbiagcayo a sibubuteng iti Dios iti bayat ti panaglasatyo:

¹⁸ Nga ammoyo a nasubbotcayo iti barengbareng a panagbiagyo, nga impatawid cadacayo dagidi ammayo, saan a naaramat dagiti agrupsa, a cas iti pirac ken balitoc;

¹⁹ No di ket gapu iti napateg a dara, daydi dara ni Cristo a cas dara ti maysa a cordero nga awan ti pagdacsanna ken tulawna:

²⁰ Isu a naammoan sacbay ti pannacabangon toy lubong, ngem naiparangarang iti camaudiananna maipaay, cadacayo,

²¹ A gapu kencuana mamaticayo iti Dios, a namangungar kencuana cadagiti natay, ket isu iniccanna ti dayag, tapno ti pammati ken inanamayo addada coma iti Dios.

²² Idinto a ginugoranna dagiti cararuayo iti kinatulnogyo iti pudno, a maipaay iti ayat a pudno dagiti cacabsat, agayan-ayatcayo iti nasged, a buyugen ti nadalus a puso:

²³ A nabaliwancayo a nayanac, saan nga iti bukel nga agrupsa, no di ket iti saan nga agrupsa a gapu iti sao ti Dios, isu nga agbiag ken agtaeng.

²⁴ Ta isu-amin a lasag cas la root Ket ti amin a dayagna cas la iti sabong ti root; Ti root magango, ket ti sabong agtinnag:

²⁵ Ngem ti sao ti Dios mataginayon nga awan inggana. Ket daytoy isu ti sao dagiti naimbag a damdamag a naicascasaba cadacayo.