1 Juan 5 - Ti Biblia (1973)

Ti panamati ken Cristo ken dagiti bungana:—Dagiti tal-lo a sacsi.

¹ Siasinoman a mamati a ni Jesus isu ti Cristo, nabukel iti Dios; ket siasinoman nga agayat iti nangbukel, ayatenna met ti nabukel kencuana.

² Daytoy ti pacaammoantayo nga ayatentayo dagiti annac ti Dios, no ayatentayo ti Dios, ket salimetmetantayo dagiti bilbilinna.

³ Ta daytoy ti ayat ti Dios, a tungpalentayo coma dagiti bilbilinna; ket dagiti bilbilinna saanda a macapadagsen.

⁴ Ta ti aniaman a mabukel iti Dios, parucmaenna ti lubong ket daytoy ti panagbal-ligi a pangparucma iti lubong isu ti pammatitayo.

⁵ Ket siasino ti mangparmec iti lubong, no di daydiay mamati a ni Jesus isu ti Anac ti Dios?

⁶ Daytoy daydi immay gapu iti danum ken dara, nga isu ni Jesu-Cristo: saan nga iti danum laeng, no di ket iti danum ken dara.

⁷ Ket ti Espiritu ti mangted ti pangpanecnec, gapu ta ti Espiritu ti pudno.

⁸ Ket tal-lo dagiti mangsacsi, ti Espiritu ken ti danum ken ti dara, ket dagitoy tal-lo agdadangayda iti maymaysa a panangsacsi.

⁹ No awatentayo ti pammanecnec dagiti tattao, ti pammanecnec ti Dios dacdackel; ta daytoy ti pammanecnec ti Dios, nga pinanecnecanna nga Anacna.

¹⁰ Ti mamati iti Anac ti Dios addaan ti pammanecnec: ti saan a mamati iti Dios, isu pinagbalinna nga ulbod, ta saanna a pinati ti pammanecnec nga inted ti Dios a maipapan iti Anacna.

¹¹ Ket daytoy isu ti pammanecnec: A ti Dios iniccannatayo iti biag nga agnanayon, ket daytoy a biag adda iti Anacna.

¹² Ti agicut iti Anac, adda biagna; ti saan nga mangupicup iti Anac ti Dios, awan kencuana ti biag.

Ti Dios ipangagnatayto, no ti dawatentayo mayannurot iti pagayatanna.

¹³ Dagitoy a banbanag insuratco cadacayo, tapno maammoanyo nga addaancayo ti biag nga agnanayon: cadacayo a mamati iti nagan ti Anac ti Dios.

¹⁴ Ket daytoy ti adda cadatayo a panagtalec kencuana, a no adda aniaman a dawatentayo a mayannurot iti pagayatanna, isu denggennatayo:

¹⁵ Ket no ammotayo a denggennatayo iti isu-amin a dawatentayo kencuana, ammotayo nga awatentayo dagiti dinawattayo kencuana.

¹⁶ No ti maysa a tao makitana ni cabsatna nga agbasbasol iti maysa a basol a saan a maipaay iti ipapatay, rebbengna nga idawdawat, ket ti Dios iccannanto ti biag; cayatna a sao-en, dagiti agbasol a saan a maipaay iti ipapatay. Adda basol a maipaay iti ipapatay saan a daytoy ti cunac nga idawdawatto.

¹⁷ Isu-amin a kinakil-lo basol; ket adda basol a saan a maipaay iti ipapatay.

¹⁸ Ammotayo a ti siasinoman a nabukel iti Dios, saan nga agbasol no di ket, ti nabukel iti Dios agannad, ket ti dakes saan a sumagid kencuana.

¹⁹ Ammotayo a datayo tattaonatayo ti Dios, ket ti isu-amin a lubong adda iti babaen ti dakes.

²⁰ Ket ammotayo a ti Anac ti Dios immay, ket iniccannatay ti pannacaawat, tapno mabigbigtayo daydiay a napudno; ket datayo agtaengtayo iti daydiay a napudno nga isu ni Anacna a Jesu-Cristo. Daytoy isu ti pudno a Dios ken ti biag nga agnanayon.

²¹ Annacco a dongdongngoen, igagayo dagiti bagbagiyo cadagiti didiosen.