1 Juan 4 - Ti Biblia (1973)

Dagiti saan a pudno a mammadto.

¹ Ayayatec, dicay patien dagiti amin nga espiritu, no di ket suutenyo dagiti espiritu, no nagtaudda iti Dios; ta adu dagiti saan a pudno a mammadto a rimmuar ditoy lubong.

² Daytoy ti pacaammoanyo iti espiritu ti Dios: isu-amin nga espiritu nga umanamong a ni Jesu-Cristo immay a naglasag, nagtaud iti Dios:

³ Ket amin nga espiritu a di mangipudno ken Jesus, saan a cucua ti Dios; ket daytoy ti espiritu ni Anticristo, a nangngegyo nga umay; ket ita addan ditoy lubong.

⁴ Dacayo tattaonacayo ti Dios, annacco a dongdongngoen, ket inabacyo ida; ta dacdackel daydiay adda cadacayo, ngem ti adda iti lubong.

⁵ Isuda tattao ida ti lubong: gapu itoy agsaoda iti maipapan iti lubong, ket ti lubong denggenna ida.

⁶ Datayo tattaonatayo ti Dios: ti macaammo iti Dios, denggennatayo; ti saan a tao ti Dios, saannatay a denggen: gapu itoy maammoantayo ti espiritu ti pudno ken ti espiritu ti ulbod.

Ti Dios isu ti ayat: ayatentay ti Dios ken dagiti cacabsat.

⁷ Ayayatec, agdidinnungngotayo, ta ti ayat nagtaud iti Dios, ket tunggal maysa nga agayat nabukel iti Dios ket ammona ti Dios.

⁸ Ti saan nga agayat, saanna nga ammo ti Dios, ta ti Dios isu ti ayat.

⁹ Daytoy ti nacaiparangarangan ti ayat ti Dios cadatayo, nga imbaon ti Dios ti Anacna a bugbugtong ditoy lubong, tapno agbiagtayo gapu kencuana.

¹⁰ Ket daytoy ti ayat, saan a gapu ta ayatentayo ti Dios, no di ket gapu ta isu inayatnatayo, ket imbaonna ti Anacna a daton a subbot cadagiti basbasoltayo.

¹¹ Ay-ayaten, no casta unay ti pinagayat ti Dios cadatayo, rebbengtay met ti agayanayat.

¹² Awan ti tao a nacakita iti Dios uray caano; no agayanayattayo, ti Dios agtaeng cadatayo, ket ti ayatna nagdanunan cadatayo:

¹³ Daytoy ti pacakitaantayo nga agnaedtay kencuana ket isu cadatayo, agsipud ta iniccannatayo iti Espirituna.

¹⁴ Ket dacami nakitami ket sacsianmi a ti Ama imbaonna ti Anac a Manangisalacan iti lubong.

¹⁵ Uray siasino a mangipaduyacyacto a ni Jesus isu ti Anac ti Dios, agtaeng kencuana ti Dios, ket isu agtaeng iti Dios.

¹⁶ Ket dacami naammoanmi ket pinatimi ti ayat ti Dios nga adda cadatayo. Ti Dios isu ti ayat; ket ti agtalinaed iti ayat, agtaeng iti Dios ket ti Dios agtaeng kencuana.

¹⁷ Daytoy ti pacatungpalan ti ayat cadatayo, tapno adda panagtalectayo iti aldaw ti pannacaocom; ta no casano ti kinaisuna, casta tayo met ditoy lubong.

¹⁸ Awan ti buteng ken ayat, no di ket ti ayat a nagdanunan pacsiatenna ti buteng; agsipud ta ti buteng addaan dusa: ti agbuteng saan pay a naaramid a nagdanunan iti ayat.

¹⁹ Datayo agayattayo, agsipud ta isu inayatnatayo nga immuna.

²⁰ No adda agcuna: Siac ayatec ti Dios, ket guraenna ni cabsatna, isu ti maysa a naulbod ta ti saan nga agayat iti cabsatna, isu a nakitana, saanna a mabalin nga ayaten ti Dios, isu a dina nakita.

²¹ Ket daytoy a bilin a naadda cadatayo nagtaud kencuana: Nga ti agayat iti Dios, ayatenna met coma ni cabsatna.