1 Juan 2 - Ti Biblia (1973)

Maysa a manangibabaet iti sangoanan ti Ama. Panagtungpal cadagiti bilbilin.

¹ Annacco a dongdongoec, isuratco cadacayo dagitoy a banbanag tapno dicay coma agbasol. Ket no addanto siasinoman a macabasol, addaantayo ti Manangibabaet iti Ama, nga isu ni Jesu-Cristo a nalinteg:

² Ket isu ti daton ti cappia gapu cadagiti basbasoltayo; ket saan laeng a gapu cadagiti basbasoltayo no di pay ket gapu iti isu-amin a lubong.

³ Ket gapu itoy, maammoantayo nga isu am-ammotayo, no salimetmetantayo dagiti bilbilinna.

⁴ Ti agcuna nga: Isu ammoc, ket dina met tungpalen dagiti bilbilinna, isu ti naulbod ket awan ti pudno kencuana:

⁵ Ngem ti siasinoman a mangsalimetmet iti saona, pudno a nagdanunan kencuana ti ayat ti Dios, ket daytoy ti pacaammoantayo nga addatay kencuana:

⁶ Ti agcuna nga agtalinaed kencuana, rebbengna met ti magna a cas iti pannagnana idi.

⁷ Ay-ayatec awan ti baro a bilin nga isuratco cadacayo, no saan a daydi bilin a daan a nangngegyo nanipud idi damo: daydi bilin a daan isu ti sao a nangngegyo.

⁸ Maysa pay a baro a bilin ti isuratco cadacayo, banag a napudno kencuana ken cadacayo: ta ti kinasipnget aglabasen, ket ti silaw a pudno agraniagen.

⁹ Ti agcuna nga adda iti lawag ket guraenna ni cabsatna, adda pay laeng iti kinasipnget agingga ita.

¹⁰ Ti agayat iti cabsatna, agtalinaed iti lawag, ket awan kencuana ti aniaman a pacaiculboan.

¹¹ Ngem ti gumura iti cabsatna, adda iti kinasipnget ket magmagna iti sipnget, ket dina ammo no sadino ti papananna, agsipud ta ti sipnget kinullaapanna dagiti matana.

¹² Isuratco cadacayo, annacco a dongdongngoen, agsipud ta dagiti basbasolyo napacawandan gapu iti pateg ti naganna.

¹³ Agsuratac cadacayo, amma ta ammoyo daydiay adda a nanipud idi ugma, agsuratac cadacayo, agtutubo a lallaki ta inabacyo ti dakes. Nagsuratac cadacayo, ububbing ta ammoyo ti Ama.

¹⁴ Nagsuratac cadacayo, amma, ta ammoyo daydiay adda a nanipud idi punganay. Nagsuratac cadacayo, agtutubo a lallaki gapu ta dacay ti napigsa, ket ti sao ti Dios agtalinaed cadacayo ket inabacyo ti dakes.

¹⁵ Dicay ayaten ti lubong, uray dagiti banbanag nga adda ditoy lubong. No ti siasinoman a tao agayat iti lubong, ti ayat ti Ama awan kencuana.

¹⁶ Ta isu-amin nga adda ditoy lubong, ti derrep ti lasag, ken ti derrep dagiti mata, ken ti kinapalangguad ti panagbiag, saanda nga aggapu iti Ama, no di iti lubong.

¹⁷ Ket ti lubong aglabas, ken ti dakes a tarigagayna; ngem ti agaramid iti pagayatan ti Dios mataginayon.

Dagiti Anti-cristo.

¹⁸ Annacco a dongdongngoen, isu ti camaudiananen nga horas; ket cas iti nangngegyo nga umay ni Anti-cristo, uray ita timmacderdan dagiti adu nga anti-cristo; ket daytoy ti pacaammoantayo nga isu ti camaudiananen nga horas.

¹⁹ Rimmuarda cadatayo, ngem ditay ida caddua; ta no cadduatay coma ida, nakipagtaengda coma cadatayo; ngem tapno iparangarangda a saan nga isuda amin, cadcaduatay ida.

²⁰ Ngem cadacayo adda ti maysa a pananglana di Santo, ket ammoyo dagiti isu amin a banbanag.

²¹ Saanac a nagsurat cadacayo gapu ta dicay ammo ti pudno, no di ket gapu ta ammoyo, ken gapu ta awan ti ulbod nga agtaud iti pudno.

²² Asino ti naulbod, no di daydiay mangilibac a ni Jesus isu ti Cristo? Daytoy isu ti anti-cristo, daydiay mangilibac iti Ama ken iti Anac.

²³ Siasinoman a mangilibac iti Anac, awan met ti Ama kencuana: ti mangipudno iti Anac, adda met kencuana ti Ama.

²⁴ No maipapan cadacayo, mataginayon coma cadacayo ti nangngegyo nanipud idi damo. No mataginayon cadacayo daydi nangngegyo nanipud idi punganay, agtalinaedcayto met iti Anac ken iti Ama.

²⁵ Ket daytoy ti cari nga incarina cadatayo, ti biag nga agnanayon.

²⁶ Insuratco cadacayo dagitoy a banbanag a maipuon cadagiti mangyawawan cadacayo.

²⁷ Ket no maipapan cadacayo, ti pananglana nga inawatyo kencuana, mataginayon cadacayo ket awan ti pacasapulanyo iti uray siasino a mangisuro cadacayo; ngem cas ti pananglanana isuronacayo iti maipapan cadagiti isu-amin a banbanag, ket isu ti pudno ket saan nga ulbod, ket cas insuronacayo, casta met agtalinaedcayo kencuana.

²⁸ Ket ita annacco a dongdongngoen, agtaengcay kencuana: tapno inton maiparangarang, addanto panagtalectayo, ket saantay a mabainan iti sangoananna inton yaayna.

²⁹ No ammoyo nga isu nalinteg, ammoenyo met nga isu-amin nga agaramid iti kinalinteg, naipasngayda kencuana.