1 Juan 1 - Ti Biblia (1973)

Ti Verbo ti Biag naipakita iti lasag.

¹ Ti adda nanipud idi ugma, ti nangngegmi, ti nakitami cadagiti matami, dagiti binuybuyami, ken ti naaricap dagiti im-imami, a maipapan iti Sao ti biag.

² (Ket ti biag naiparangarang, ket nakitami, ket panecnecanmi, ket ipacaammomi cadacayo ti biag, daydiay biag nga agnanayon, nga adda idi iti Ama, ket naipakita cadacami):

³ Ti nakitami ken ti nangngegmi, isuda dagiti ipacaammomi cadacayo, tapno dacayo adda pacaicadcadduaanyo cadacami; wen, ket pudno a ti pannakicadcadduatayo adda iti Ama ken iti Anacna, a Jesu-Cristo:

⁴ Ket dagitoy a banbanag isuratmi cadacayo tapno maananay ti ragotayo.

Ti Dios isu ti silaw: ti saan a magmagna iti lawag, saan a sumurot iti Apo.

⁵ Ket daytoy ti damag a nangngegmi kencuana ket ipacaammomi cadacayo. A ti Dios isu ti silaw, ket awan kencuana ti aniaman a sipnget.

⁶ No cunaentayo nga adda pannakicadcadduatayo kencuana ket magnatayo iti kinasipnget, agulbodtayo, ket saantayo nga aramiden ti pudno:

⁷ Ngem no magnatayo iti lawag, cas isu adda iti lawag, adda pannakicadcadduatayo iti maysa ken maysa, ket ti dara ni Jesus nga Anacna ugasannatayo iti amin a basol.

Panangipudno cadagiti basbasol, ken ti pammacawan ni Cristo.

⁸ No cunaentayo nga awan ti basoltayo, allilawentayo ti bagitayo met laeng, ket ti pudno awan cadatayo.

⁹ No ipudnotayo dagiti basbasoltayo, isu ti mapagtalcan ken nalinteg a mamacawan cadagiti basbasoltayo, ken mangugas cadatayo iti amin a kinakillo.

¹⁰ No cunaentayo a ditay nagbasol, isu pagbalinentayo a naulbod, ket ti saona awan cadatayo.