1 Cronicas 9 - Ti Biblia (1973)

Dagiti umuna a naed ti Jerusalem. Dagiti agaywan iti ruangan ken dagiti annongda.

¹ Iti casta nabilang idi ti Israel cadagiti pinounpoun; ket, adtoy, naisuratda iti libro dagiti ar-ari ti Israel. Ket ti Juda naipan a kinayawan sadi Babilonia gapu iti panaglabsingda.

² Dagiti immuna a nagnaed cadagiti cucuada cadagiti il-ilida isuda idi ti Israel, dagiti papadi, dagiti Levitas, ken dagiti Natineos.

³ Ket idiay Jerusalem nagnaed cadagiti annac ni Juda, ken cadagiti annac ni Benjamin, ken cadagiti annac da Efraim ken Manases:

⁴ Ni Utai nga anac a lalaki ni Amiud, nga anac a lalaki ni Omri, nga anac a lalaki ni Imrai, nga anac a lalaki ni Bani, cadagiti annac ni Fares nga anac a lalaki ni Juda.

⁵ Ket cadagiti Silonitas: ni Asaias nga inaunaan nga anac, ken dagiti annacna a lallaki.

⁶ Ket cadagiti annac a lallaki ni Zara: ni Jeuel, ken dagiti cacabsatda, innem a gasut ket siam a puloda.

⁷ Ket cadagiti annac a lallaki ni Benjamin: ni Sallu nga anac a lalaki ni Mesullam, nga anac a lalaki ni Odavia, nga anac a lalaki ni Asenua,

⁸ Ken ni Ibnias nga anac a lalaki ni Jeroham, ken ni Ela nga anac a lalaki ni Uzzi, nga anac a lalaki ni Micri, ken ni Mesullam nga anac a lalaki ni Sefatias, nga anac a lalaki ni Rehuel, nga anac a lalaki ni Ibnias.

⁹ Ken dagiti cacabsatda, a mayannurot cadagiti capcapounanda, siam a gasut ket limapuloda ket innem. Amin dagitoy a lallaki pangpangoloen idi dagiti balbalay dagiti amma cadagiti balbalay dagiti ammada.

¹⁰ Ket dagiti papadi: da Jedaia, ken Joirarib, Joakim,

¹¹ Ken Azarias nga anac ni Helcias, nga anac a lalaki ni Mesullam, nga anac a lalaki ni Sadoc, nga anac a lalaki ni Maraiot, nga anac a lalaki ni Ahitob, a turayen ti balay ti Dios;

¹² Ken Adaias nga anac a lalaki ni Jeroham, nga anac a lalaki ni Pasur, nga anac a lalaki ni Malkias, ken ni Masai nga anac a lalaki ni Adiel, nga anac a lalaki ni Jazera, nga anac a lalaki ni Mesullam, nga anac a lalaki ni Mesillemit, nga anac a lalaki ni Immer;

¹³ Ken dagiti cacabsatda, nga pangoloen dagiti balbalay dagiti ammada, sangaribu ket pito gasutda ket innem a pulo; tumutopda unay a maipaay iti aramid ti panagservi ti balay ti Dios.

¹⁴ Ket cadagiti Levitas: ni Semeias, nga anac a lalaki ni Hassub, nga anac a lalaki ni Azricam, nga anac a lalaki ni Hasabias, cadagiti annac a lallaki ni Merari:

¹⁵ Ken da Bacbaccar, Heres, ken Galal, ken Mattania, nga anac a lalaki ni Mica, nga anac a lalaki ni Zicri, nga anac a lalaki ni Asaf,

¹⁶ Ken ni Abadias nga anac a lalaki ni Semeias, nga anac a lalaki ni Galal, nga anac a lalaki ni Iditum, ken ni Berakias, nga anac a lalaki ni Asa, nga anac a lalaki ni Elcana, a nagnaed cadagiti purpuroc dagiti Nethofatitos.

¹⁷ Ket dagiti agaywan iti ruangan: da Sallum, Accub, ken Talmon, ken Ahiman, ken dagiti cacabsatda (ni Sallum isu idi ti pangolo),

¹⁸ Isuda ti nagbantay inggana ita iti ruangan ti ari iti agpadaya: isuda dagiti nagaywan iti ruangan a maipaay iti pacarso dagiti annac ni Levi.

¹⁹ Ket ni Sallum nga anac a lalaki ni Core, nga anac a lalaki ni Abiasaf, nga anac a lalaki ni Cora, ken dagiti cacabsatna, ti balay ni amana, dagiti Coraitas, isuda idi ti mangimaton iti aramid ti panagservi, nga agaywan cadagiti dapian ti tolda: ket dagiti ammada isuda idi ti mangimaton iti pacarso ni Jehova, nga agaywan iti sercan.

²⁰ Ket ni Finees nga anac a lalaki ni Eleazar isu idi ti agturay cadacuada idi nalabes a tiempo, ket ni Jehova adda idi kencuana.

²¹ Ket ni Zacarias nga anac ni Meselemia isu idi ti agaywan iti ruangan ti tolda ti gimong.

²² Amin dagitoy a napili isuda ti agaywan iti ruangan cadagiti dapian duagasut ket sangapuloda ket dua idi. Dagitoy nabilangda iti pinounpoun cadagidiay purpurocda a da David ken Samuel a macakita iti masacbayan inornosda idi ti annongda a matalec.

²³ Iti casta isuda ken dagiti annacda annongda idi iti panangimaton cadagiti ruruangan ti balay ni Jehova, a ti met laeng balay ti tolda, iti sinacunsacup.

²⁴ Adda idi agay-aywan iti ruangan cadagiti uppat a sikigan, iti agpadaya, agpalaud, agpaamianan, ken agpaabagatan.

²⁵ Ket dagiti cacabsatda, cadagiti purpurocda, umayda idi iti tunggal pito nga aldaw iti binnatangbatang tapno makiaddada cadacuada:

²⁶ Ta dagiti uppat a turayen dagiti agaywan iti ruangan, a Levitasda idi, addada idi iti maysa nga annong a matalec, ken isuda idi ti mangimaton cadagiti sagumbi ken cadagiti paggamengan ti balay ti Dios.

²⁷ Ket agyanda idi iti agliclicmut iti balay ti Dios, agsipud ta ti panangaluad iti dayta adda idi cadacuada; ket cadacuada naipabiang ti pannacalucatan iti biniganbigat.

²⁸ Ket dadduma cadacuada ti panangaywan cadagiti al-alicamen ti panagservi; ta mabilangda dagitoy no mayunegda ken mabilangda no mairuarda.

²⁹ Dadduma met cadacuada nadutocanda nga agaywan iti arruaten, ken cadagiti al-alicamen ti santuario, ken iti namayecmec a harina, ken iti arac, ken iti lana, ken iti incienso, ken cadagiti recrecado.

³⁰ Ket dadduma cadagiti annac a lallaki dagiti papadi agsaganada idi iti panaglalaoc dagiti recrecado.

³¹ Ket ni Matatias, a maysa cadagiti Levitas, nga inaunaan nga anac ni Sallum a Coraita, addaan idi iti annong a matalec cadagiti linuto cadagiti parparioc.

³² Ket dadduma cadagiti cacabsatda, cadagiti annac a lallaki dagiti Coatitas, agaywanda idi iti tinapay ti pamarang, tapno isu ti saganaenda iti tunggal aldaw ti panaginana.

³³ Ket dagitoy dagiti cumacanta, a pangpangoloen dagiti balbalay dagiti amma dagiti Levitas, a nagnaedda cadagiti sagumbi ket saanda a mairamraman idi cadagiti sabsabali a panagservi; ta naisaadda iti aramidda iti aldaw ken iti rabii.

³⁴ Dagitoy idi dagiti pangoloen dagiti balbalay dagiti amma dagiti Levitas, cadagiti capounanda, lallaki a pangoloen: dagitoy nagnaedda idiay Jerusalem.

³⁵ Ket idiay Gabaon nagnaed ti ama ni Gabaon, ni Jehiel, a ti nagan ti babai nga asawana Maaca;

³⁶ Ket ti inaunaan nga anacna a lalaki ni Abdon, ni Sur, ken ni Kis, ken ni Baal, ni Ner, ken ni Nadab.

³⁷ Ken ni Gedor, ni Ahio, ken ni Zacarias, ken ni Miclot.

³⁸ Ket ni Miclot pinutotna ni Samaan. Ket isuda met nakipagnaedda cadagiti cacabsatda idiay Jerusalem, iti sangoanan dagiti cacabsatda.

³⁹ Ket ni Ner pintuotna ni Kis; ket ni Kis pinutotna ni Saul; ket ni Saul pinutotna da Jonatan, Malkisua, Abinadab, ken Esbaal.

⁴⁰ Ket ti anac a lalaki ni Jonatan isu ni Merib-baal; ket ni Merib-baal pinutotna ni Mica.

⁴¹ Ket dagiti annac a lallaki ni Mica: da Piton, ken Melec, ken Tarea, ken Ahaz.

⁴² Ket ni Ahaz pinutotna ni Jara; ket ni Jara pinutotna da Alemet, Asmavet, ken Zimri; ket ni Zimri pinutotna ni Mosa;

⁴³ Ket ni Mosa pinutotna ni Binea; ket ni Refaia anacna a lalaki, ni Elasa anacna a lalaki, ni Asel anacna a lalaki.

⁴⁴ Ket ni Asel addaan idi cadagiti innem nga annac a lallaki, a dagiti nagnaganda isuda dagitoy: Azricam, Bocru, ken Ismael, Seraia, Obadias, ken Hanan: dagitoy isuda idi dagiti annac a lallaki ni Asel.