1 Cronicas 4 - Ti Biblia (1973)

Dagiti caputotan da Juda ken Simeon.

¹ Dagiti annac a lallaki ni Juda: da Fares, Hesron, ken Carmi, Hur, ken Sobal.

² Ket ni Reaias nga anac a lalaki ni Sobal pinutotna ni Jaat; ket ni Jaat pinutotna da Ahumai ken Laad. Dagitoy isuda dagiti famfamilia dagiti Saratitas.

³ Ket dagitoy isuda dagiti annac a lallaki ti ama ni Etam: da Jezreel, Isma, ken Ibdar; ket ti nagan ti cabsatda a babai Haslelponi;

⁴ Ken ni Penuel nga ama ni Gedor, ken ni Ezer nga ama ni Husa. Dagitoy isuda dagiti annac a lallaki ni Hur nga inaunaan nga anac ni Efrata, nga ama ni Bet-lehem.

⁵ Ket ni Asur nga ama ni Tecoa addaan idi cadagiti dua nga assawa, da Helea ken Naara.

⁶ Ket ni Naara impasngayna kencuana da Auzam, Hefer, Temani, ken Ahastari. Dagitoy isuda dagiti annac a lallaki ni Naara.

⁷ Ket dagiti annac a lallaki ni Helea isuda da Seret, Jesoar, ken Etnan.

⁸ Ket ni Cos pinutotna da Anob, ken Sobeba, ken dagiti famfamilia ni Aharhel, nga anac a lalaki ni Arum.

⁹ Ket ni Jabes natantan-oc idi ngem cadagiti cacabsatna a lallaki: ket ingalad ni inana ti naganna a Jabes, a kinunana, Agsipud ta impasngayco a binuyog ti ladingit.

¹⁰ Ket ni Jabes inawaganna ti Dios ti Israel, a kinunana, O bendicionannac coma a pudno, ken palawaem ti beddengco, ket ta imam adda coma caniac, ket igaganac coma iti dakes, tapno di agtaeng ti ladingitco! Ket ti Dios intedna kencuana ti dinawatna.

¹¹ Ket ni Caleb a cabsat ni Sua pinutotna ni Mahir, nga ama ni Esthon.

¹² Ket ni Esthon pinutotna da Beth-rafa, ken Fasea, ken Tehinna nga ama ni Ir-naas. Dagitoy isuda dagiti lallaki ni Reca.

¹³ Ket dagiti annac a lallaki ni Cenez: da Othniel, ken Saralah. Ket dagiti annac a lallaki ni Otniel: ni Hatat.

¹⁴ Ket ni Maonati pinutotna ni Ofra: ket ni Saraia pinutotna ni Joab nga ama ni Ge-harasim: agsipud ta isuda dagiti nalaing nga agar-aramid.

¹⁵ Ket dagiti annac a lallaki ni Caleb nga anac ni Jefone: da Iru, Ela, ken Naham; ken dagiti annac a lallaki ni Ela; ken Cenez.

¹⁶ Ket dagiti annac a lallaki ni Jaleleel: da Zif, ken Zifas, Tirias, ken Asareel.

¹⁷ Ket dagiti annac a lallaki ni Ezra: da Jeter, Mered, Efer, ken Jalon; ket isu impasngayna da Miriam, ken Sammai, ken Isba nga ama ni Estemoa.

¹⁸ Ket ni asawana a Judaia impasngayna da Jered nga ama ni Gedor, ken Heber nga ama ni Soco, ken Icutiel nga ama ni Zanoa. Ket dagitoy isuda dagit annac a lallaki ni Betia nga anac a babai ni Faraon, nga innala ni Mered.

¹⁹ Ket dagiti annac a lallaki ti babai nga asawa ni Odias, cabsat a babai ni Naham isu ti ama da Keila a Garmita, ken Estemoa a Maacatita.

²⁰ Ket dagiti annac a lallaki ni Simon: da Amnon, ken Rinna, Benhanan, ken Tilon. Ket dagiti annac a lallaki ni Isi: da Zohet, ken Benzohet.

²¹ Dagiti annac a lallaki ni Sela nga anac a lalaki ni Juda: da Er nga ama ni Lecha, ken ni Laada nga ama ni Maresa, ken dagiti famfamilia ti caputotan dagiti agar-aramid ti lienzo a nalapat, ti caputotan ni Asbea;

²² Ken ni Joacim, ken dagiti lallaki ti Cozeba, ken da Joas, ken Saraf, isu a nagturay iti Moab, ken Jasubi-lehem. Ket dagiti sasao cadaananda.

²³ Dagitoy isuda idi dagiti agdamdamili, ken dagiti agnaed iti Netaim ken iti Gedera: nakipagnaedda idiay iti ari a gapu iti aramidna.

²⁴ Dagiti annac a lallaki ni Simeon: da Nemuel, Jamin, Jarib, Zera, ken Saul;

²⁵ Ni Sallum anacna a lalaki, ni Mibsam anacna a lalaki, ni Misma anacna a lalaki.

²⁶ Ket dagiti annac a lallaki ni Misma: ni Hamuel anacna a lalaki, ni Zacur anacna a lalaki, ni Simi anacna a lalaki.

²⁷ Ket ni Simi addaan idi iti sangapulo ket innem nga annac a lallaki ken innem nga annac a babbai; ngem dagiti cacabsatna awananda idi iti adu nga annac, uray dagiti amin a familia saanda nga immadu a cas cadagiti annac ni Juda.

²⁸ Ket nagnaedda idiay Beer-seba, ken Molada, ken Hasar-sual,

²⁹ Ken idiay Bala, idiay Esem, ken idiay Tolad,

³⁰ Ken idiay Betuel, idiay Horma, ken idiay Siclag,

³¹ Ken idiay Bet-marcabot, ken Hasasusim, idiay Bet-birai, ken idiay Saaraim. Dagitoy isuda idi dagiti il-ilida agingga iti panagari ni David.

³² Ket dagiti purpurocda ti Etam, ken ti Ain, ti Rimmon, ken ti Tocen, ken ti Asan, lima nga il-ili;

³³ Ken amin dagiti purpurocda a nailicmut cadagitoy met laeng nga il-ili, agingga iti Baal. Dagitoy idi dagiti pagtaenganda, ket sinalimetmetanda ti capoonanda.

³⁴ Ken da Mesobab, Jamlec, ken Josias nga anac a lalaki ni Amasias,

³⁵ Ken Joel, ken Jehu nga anac a lalaki ni Josibias, nga anac a lalaki ni Saraiah, nga anac a lalaki ni Aziel,

³⁶ Ken Elioenai, Jacoba, ken Jesohaia, Asaias, Adiel, ken Jesimiel, ken Benaias,

³⁷ Ken Ziza nga anac a lalaki ni Sifi, nga anac a lalaki ni Allon, nga anac a lalaki ni Jedaia, nga anac a lalaki ni Simri, nga anac a lalaki ni Semaias.

³⁸ Dagitoy a nainaganan isuda idi dagiti pangpangoloen dagiti famfamiliada: ket dagiti balbalay dagiti ammada immaduda iti casta unay.

³⁹ Ket napanda agingga iti wangawangan ti Gador, iti bangir nga akindaya ti lobong, nga agsapul iti pagpaaraban a maipaay cadagiti arbanda.

⁴⁰ Ket nacasaracda iti naraber a pagpaaraban ken naimbag, ket ti daga nalawa idi, ken namayengmeng, ken natalna; ta dagidi nagnaed idiay idi unana a tiempo isuda dagiti nagtaud ken Cam.

⁴¹ Ket dagitoy a naisurat iti naganda immayda cadagidi al-aldaw ni Ezekias nga ari ti Juda, ket kinabilda dagiti toltoldada, ken ti Meunim a nasaracan idi sadiay, ket tinalipupusda a dinadael agpapan ita nga aldaw, ket nagnaedda idiay iti saadda; agsipud ta adda idiay idi pagpaaraban a maipaay cadagiti arbanda.

⁴² Ket ti dadduma cadacuada, cadagiti met laeng annac a lallaki ni Simeon, a limagasutda a lallaki, napanda idiay bantay Seir, a dagiti capitanda da Pelatia, Nearias, Refaias, ken Uzziel, nga annac a lallaki ni Isi.

⁴³ Ket kinabilda ti natda cadagiti Amalecitas a nagtalaw, ket nagnaedda idiay agpapan ita nga aldaw.