1 Cronicas 26 - Ti Biblia (1973)

Dagiti dasdasig dagiti agbanbantay iti ruangan. Dagiti agaywan cadagiti gamgameng ti templo.

¹ Maipaay iti pannacadasdasig dagiti agbanbantay iti ruangan: cadagiti Coraitas, ni Meselemia, nga annac a lallaki ni Core cadagiti annac a lallaki ni Asaf.

² Ket ni Meselemia addaan idi annac a lallaki: ni Zacarias ti inaunaan ni Jadiel ti maicadua, ni Zabadias ti maicatlo, ni Jatnael ti maicapat,

³ Ni Elam ti maicalima, ni Joanam ti maicanem, ni Elioneal ti maicapito.

⁴ Ket ni Obed-edom addaan idi annac a lallaki: ni Semeias ti inaunaan nga anac, ni Josabad ti maicadua, ni Joa ti maicatlo, ni Sacar ti maicapat, ket ni Natanel ti maicalima,

⁵ Ni Anmiel ti maicanem, ni Isacar ti maicapito, ni Peulletai ti maicawalo; ta isu ti binendicionan idi ti Dios.

⁶ Casta met ken ni Semeias nga anacna a lalaki nayanacda idi kencuana dagiti annac a lalaki, a nagturayda iti balay ni amada; lallakida idi a mannacabalin ken mamaingel.

⁷ Dagiti annac a lallaki ni Semeias: da Otni, Rafael, ken Obed, Elzabad, a dagiti cacabsatda mamaingelda idi a lallaki, da Eliu, ken Samakias.

⁸ Amin dagitoy nagtaudda cadagiti annac a lallaki ni Obed-edom: isuda ken annacda a lallaki ken dagiti cacabsatda bumaelda a lallaki ti pigsa maipaay iti panagservi; innem a pulo ket dua ken Obed-edom.

⁹ Ket ni Meselemia addaan idi annac a lallaki ken cacabsat, lallaki a mamaingel, sangapuloda ket walo.

¹⁰ Casta met ni Hosa, cadagiti annac ni Merari, addaan idi annac a lallaki: ni Simri ti pangolo (ta nupay no saan nga isu ti inaunaan nga anac, isu ti pinagpangolo ni amana),

¹¹ Ni Helcias ti maicadua, ni Tabelias ti maicatlo, ni Zacarias ti maicapat: amin dagiti annac a lallaki ken cacabsat ni Hosa sangapuloda ket tallo.

¹² Cadagitoy adda idi pannacadasdasig dagiti agbanbantay iti ruangan, cadagiti met laeng lallaki a pangoloen, nga addaan akem a cas cadagiti cacabsatna, tapno agannongda iti balay ni Jehova.

¹³ Ket nasggiginnasanggasatda, no casano ti bassit casta met ti dackel, a mayalubog cadagiti balbalay dagiti ammada, a maipaay iti tunggal ruangan.

¹⁴ Ket ti gasat iti agpadaya nagpaay ken ni Selemia. Sa ti maipaay ken ni Zacarias nga anacna, a maysa a manakem a consejero, pinaggiginnasatda; ket naipagasat kencuana iti agpaamianan.

¹⁵ Ket ni Obed-edom ti agpaabagatan; ken cadagiti annacna a lallaki ti balay a pagidulinan.

¹⁶ Cada Suppim ken Hosa ti agpalaud, iti ruangan ti Salleket, iti lansangan a sumang-at, agbantay iti sango ti agbantay.

¹⁷ Iti agpadaya innemda a Levitas, iti agpaamianan uppat iti maysa nga aldaw, iti agpaabagatan uppat iti maysa nga aldaw, ket maipaay iti balay a pagidulinan sagdudua.

¹⁸ Maipaay iti Pagbantayan iti agpalaud, uppat iti lansangan, ket dua idiay Pagbantayan.

¹⁹ Dagitoy idi dagiti pannacadasdasig dagiti agbanbantay iti ruangan; cadagiti annac a lallaki dagiti Coraitas, ken dagiti annac a lallaki ni Merari.

²⁰ Ket cadagiti Levitas, ni Ahias isu idi ti agaywan cadagiti gamgameng ti balay ti Dios, ken cadagiti gamgameng dagiti naipaay a banbanag.

²¹ Dagiti annac a lallaki ni Ladan, dagiti annac a lallaki dagiti Gersonitas a biang ni Ladan, dagiti pangoloen dagiti balbalay dagiti amma a biang ni Ladan a Gersonita: ni Jehieli.

²² Dagiti annac a lallaki ni Jehieli: da Zetan ken Joel a cabsatna, nga agaywan cadagiti gamgameng ti balay ni Jehova.

²³ Cadagiti Amramitas, cadagiti Isaritas, cadagiti Hebronitas, cadagiti Uzzielitas:

²⁴ Ket ni Sebuel nga anac a lalaki ni Gerson, nga anac a lalaki ni Moises, isu idi ti agturay cadagiti gamgameng.

²⁵ Ket dagiti cacabsatna: ken Eliezer immay ni Reabia nga anacna a lalaki, ken ni Jesaias nga anacna a lalaki, ken ni Joram nga anacna a lalaki ken ni Zicri nga anac na a lallaki ken ni Selomit nga anacna a lalaki.

²⁶ Daytoy a Selomit ken dagiti cacabsatna agaywanda idi cadagiti amin a gamgameng dagiti banbanag a naipaay, a ni David, ken dagiti pangoloen dagiti balbalay dagiti amma, a capcapitan cadagiti rinibu ken ginasgasut, ken capcapitan ti buyot, impaayda idi.

²⁷ Naggapu iti inabac a samsam cadagiti pagbabacalan indatonda a pangtarimaan iti balay ni Jehova.

²⁸ Ken amin nga impaay idi da Samuel a macakita iti masacbayanm ken Saul nga anac a lalaki ni Kis, ken Abner nga anac a lalaki ni Ner, ken Joab nga anac a lalaki ni Sarvia, uray asinoman a nangipaay iti uray aniaman, adda idi iti babaen ti panagaywan ni Selomit, ken dagiti cacabsatna.

²⁹ Cadagiti Isaritas, ni Kenania ken dagiti annacna a lallaki isuda idi ti agakem cadagiti akinruar a banbanag iti Israel, a maipaay nga agturturay ken oc-ocom.

³⁰ Cadagiti Hebronitas, ni Hasabias ken dagiti cacabsatna, lallaki a natured, sangaribuda ket pito a gasut inannongda ti panagimatang iti Israel iti labes ti Jordan iti agpalaud, a maipaay iti amin nga akem ken Jehova, ken maipaay iti panagservi iti ari.

³¹ Cadagiti Hebronitas, ni Jerias isu idi ti pangolo, cadagiti met laeng Hebronitas, a mayalubog cadagiti capounanda iti binalanbalay dagiti amma. Iti maicapat a pulo a tawen ti pinagari ni David nasapulda idi, ket nasaracan idi cadacuada dagiti lallaki a mannacabalin ken mamaingel idiay Jazer idiay Galaad.

³² Ket dagiti cacabsatna, lallaki a natured, dua a ribu ket pito a gasutda idi, pangpangoloen dagiti balbalay dagiti amma, isuda a pinagaywan ni David cadagiti Rubenitas, ken cadagiti Gadites, ken iti caguddua ti caputotan dagiti Manasesitas a maipaay iti tunggal banag a maipapan iti Dios, ken maipaay iti panggep ti ari.