1 Cronicas 20 - Ti Biblia (1973)

Cayawan ni Joab ti Rabba. Macabil dagiti Filisteos.

¹ Ket naaramid iti panagbaliw ti tawen, iti tiempo idi a dagiti ar-ari rimmuarda iti gubat, a ni Joab inruarna ti buyot, ket dinadaelna ti daga dagiti annac ti Ammon, ket immay ket linacubna ti Rabba. Ngem ni David nagtactac idiay Jerusalem. Ket ni Joab kinabilna ti Rabba, ket isu ti rineb-bana.

² Ket ni David innalana ti balangat ti arida iti olona, ket isu nasaracanna nga iti timbengna maysa a talento a balitoc, ket naibutac kencuana dagiti batbato a napateg; ket isu ti naisaad iti olo ni David; ket isu nangala iti sinamsam ti ili iti casta unay a nagadu.

³ Ket innalana dagiti tattao nga adda idi ili, ket pinutedna ida cadagiti ragadi, ken cadagiti pasaratsat a landoc, ken cadagiti wasay. Ket castoy ti inaramid ni David cadagiti isu-amin nga il-ili dagiti annac ti Ammon. Ket ni David ken amin a tattao nagsublida idiay Jerusalem.

⁴ Ket naaramid iti calpasan daytoy, a nabangon ti gubat idiay Gezer cadagiti Filisteos: idin ni Sibbecai nga Husatita pinatayna ni Sippai, cadagiti annac a lallaki ti gigante; ket isuda naparmecda.

⁵ Ket adda idi manen gubat cadagiti Filisteos; ket ni Elhanan nga anac a lalaki ni Jair pinatayna ni Lami a cabsat a lalaki ni Goliat a Geteo, ti orongan ti picana cas la iti paglucutan ti pagablan.

⁶ Ket adda idi manen gubat idiay Get, isu nga adda idi maysa a lalaki a dackel ti catayagna, a dagiti ramay ti imana ken sacana duapoloda ket uppat, innem tunggal ima ken innem iti tunggal saca: ket isu nayanac met iti gigante.

⁷ Ket idi a nakidangadang iti Israel, isu ti pinatay ni Jonatan nga anac ni Samaa a cabsat ni David.

⁸ Dagitoy nayanacda idi iti gigante idiay Get; ket napasagda gapu iti ima ni David, ken gapu iti ima dagiti ad-adipenna.