1 Cronicas 18 - Ti Biblia (1973)

Dagiti panagballigi ni David iti Filistia, Moab, Soba, Siria, ken Edom. Dagiti pagturayen ni David.

¹ Ket iti calpasan dagitoy naaramid a ni David kinabilna dagiti Filisteos, ket pinarucmana ida, ket innalana ti Gat ken dagiti il-ilina iti ima dagiti Filisteos.

² Ket kinabilna ti Moab; ket dagiti Moabitas nagbalinda nga ad-adipen ni David, ket nangyegda iti buis.

³ Ket ni David kinabilna ni Adarezer nga ari ti Soba agingga iti Hamat, idi isu napanna pasingkedan ti pagturayanna iti denna ti carayan Eufrates.

⁴ Ket ni David nangala idi kencuana iti sangaribu a luglugan ken pito a ribu a nagcacabayo, ken duapulo a ribu a tattao a sacasaca; ket ni David pinasatanna amin dagiti cabcabayo nga agguyod ti lugan, ngem nangitidda cadagidiay ti maipaay cadagiti sangagasut a lugan.

⁵ Ket idi a dagiti Sirios ti Damasco immayda a mangtulong ken Adarezer nga ari ti Soba, nangcabil ni David cadagiti Sirios, iti duapulo ket dua a ribu a lallaki.

⁶ Sa ni David nangicabil iti buyot nga agbantay idiay Siria ti Damasco; ket dagiti Sirios nagbalinda idi nga ad-adipen ni David, ket nangyegda iti buis. Ket ni Jehova intedna ti panagballigi ken David iti uray sadinoman a napananna.

⁷ Ket ni David innalana dagiti calasag a balitoc nga adda idi cadagiti ad-adipen ni Adarezer, ket inyegna ida idiay Jerusalem.

⁸ Ket sadi Tibat, ken sadi Cun, a il-ili ni Adarezer, ni David nangala iti adu unay a gambang, isu nga inaramid ni Salomon iti baybay a ginambangan, ken cadagiti monmon, ken dagiti al-alicamen a gambang.

⁹ Ket idi a ni Tou nga ari ti Hamat nangngegna a ni David kinamat nangngegna a ni David kinabilna amin ti buyot ni Adarezer nga ari ti Soba,

¹⁰ Isu imbaonna ni Adoram nga anacna a lalaki ken ari David, a mangcablaaw kencuana, ken mangbendicion kencuana, agsipud ta nakigubat idi a maibusor ken Adarezer ket isu ti kinabilna (ta ni Adarezer naggubatda idi ken ni Tou); ket isu nangicuyog iti amin a kita ti al-alicamen a balitoc ken pirac ken gambang.

¹¹ Dagitoy met ni ari David indatonna ken Jehova, agraman cadagiti pirac ken balitoc nga innalana cadagiti amin a nacion; naggapu iti Edom, ken iti Moab, ken cadagiti annac ti Ammon, ken cadagiti Filisteos, ken iti Amalec.

¹² Casta met a ni Abisai nga anac a lalaki ni Sarvia nangcabil cadagiti Edomitas idiay Lobong ti Asin iti sangapulo ket walo a ribu.

¹³ Ket isu nangicabil iti buyot nga agbantay idiay Edom; ket amin dagiti Edomitas nagbalinda nga ad-adipen ni David. Ket ni Jehova intedna ti panagballigi ken David iti uray sadinoman a napananna.

¹⁴ Ket ni David nagari iti amin nga Israel; ket tinungpalna ti kinajusticia ken kinalinteg iti amin a cailianna.

¹⁵ Ket ni Joab nga anac a lalaki ni Sarvia isu idi ti pangolo ti buyot; ket ni Josafat nga anac a lalaki ni Ahilud isu idi ti registrador;

¹⁶ Ket ni Sadoc nga anac a lalaki ni Ahitob, ken ni Abimelec nga anac a lalaki ni Abiatar, isuda idi dagiti papadi; ket ni Sausa isu idi ti escriba;

¹⁷ Ket ni Benaias nga anac a lalaki ni Joiada isu idi ti pangolo dagiti Cereteos ken Feleteos; ket dagiti annac a lallaki ni David isuda idi dagiti pangoloen iti sibay ti ari.