1 Cronicas 16 - Ti Biblia (1973)

Dagiti naidatag a datdaton. Ti salmo a pagyaman.

¹ Ket inyegda ti lacasa ti Dios, ket isu ti insaadda iti tengnga ti tolda a binangon ni David a maipaay kencuana: ket nagidatagda cadagiti datdaton a mapuuran, ken datdaton ti cappia iti saclang ti Dios.

² Ket idi a ni David nalpasna ti nagidatag iti daton a mapuuran ken datdaton ti cappia, binendicionanna ti umili iti nagan ni Jehova.

³ Ket binunonganna ti tunggal maysa ti Israel, lalaki ken babai agpadpadada, iti tunggal maysa maysa a tinapay, ken sangcaapag a lasag, ken sangcatipkel nga uvas a pinakebbet.

⁴ Ket tinudinganna cadagiti Levitas ti agannong iti sango ti lacasa ni Jehova, ken agakem ken agyaman ken agdayaw ken Jehova, ti Dios ti Israel:

⁵ Ni Asaf ti pangolo, ket ti maicadua kencuana da Zacarias, Jeiel, Semiramot, ken Jehiel, ken Matitias, Eliab, Benaias, ken Obed-edom, ken Jeiel, a sisasalterio ken siaar-pada; ket ni Asaf agpaaweng iti natbag cadagiti piangpiang;

⁶ Ket da Benaias, ken Jahaziel a papadi sitatangguyobda a cancanayon, iti sango ti lacasa ti tulag ti Dios.

⁷ Iti daydi nga aldaw intuyang ngarud ni David iti umuna ti panagyaman ken Jehova, iti pannacaaramat ti ima ni Asaf ken dagiti cacabsatna.

⁸ O agyamancayo ken Jehova awaganyo ti naganna; ipacaammoyo cadagiti il-ili dagiti ar-aramidna.

⁹ Isu ti icantaanyo, dagiti panagdayaw icantayo kencuana; saoenyo ti maipapan cadagiti nacascasdaaw nga ar-aramidna.

¹⁰ Agrag-ocayo iti nasantoan a naganna; agrag-o coma ti puso dagiti agsapul ken Jehova.

¹¹ Sapulenyo ni Jehova ken ti pigsana; sapulenyo a cancanayon ti rupana.

¹² Lagipenyo dagiti nacascasdaaw nga ar-aramid nga inaramidna, dagiti datdatlagna, ken dagiti panangoc-ocom ti ngiwatna.

¹³ O dacayo a putot ni Israel nga adipenna, dacayo annac ni Jacob, a pinilina.

¹⁴ Isu ni Jehova a Diostayo; dagiti panangoc-ocomna addada iti amin a daga.

¹⁵ Lagipenyo ti tulagna iti agnanayon, ti sao nga imbilinna cadagiti sangaribu a capcapounan,

¹⁶ Ti tulagna nga inaramidna ken Abraham, ken ti sapatana ken Isaac,

¹⁷ Ket pinasingkedanna daydiay met laeng ken Jacob a maysa nga ipaalagad, iti Israel a maipaay a maysa nga agnanayon a tulag,

¹⁸ A kinunana, Ti daga ti Canaan kenca itdecto, ti gasat ti tawidyo;

¹⁹ Idi dacayo bassit laeng a tattao iti bilangyo, wen, bassit unay, ket kencuana gangannaetcayo:

²⁰ Ket nagnada iti nacion ken nacion, ken iti maysa a pagarian iti sabali nga umili.

²¹ Isu dina pinalubosan ti tao a mangpadakes cadacuada; wen, tinubngarna dagiti ar-ari gapu met laeng cadacuada,

²² A kinunana, Dicayo sagiden dagiti pinulotac, dicayo ranggasan dagiti mammadtoc.

²³ Icantaanyo ni Jehova, dacayo amin a dagdaga; iparangarangyo ti panangispalna iti inaldawaldaw.

²⁴ Ket ipalawagyo ti dayagna iti tengnga dagiti nasnacion, dagiti nacascasdaaw nga ar-aramidna iti tengnga dagiti amin nga inilin-ili.

²⁵ Ta ni Jehova dackel, ken sidadaeg a madaydayaw: isu met a mapagbutngan a nangnangrona ngem cadagiti amin a didios.

²⁶ Ta amin dagiti didiosen dagiti inilin-ili ladladawanda: ngem ni Jehova inaramidna dagiti langlangit.

²⁷ Kinatan-oc ken kinadaeg addada iti sangona: kinapigsa ken kinaragsac addada iti taengna.

²⁸ Ipaayyo ken Jehova, dacayo nga agcacabagian cadagiti il-ili, ipaayyo ken Jehova ti dayag ken kinapigsa;

²⁹ Ipaayyo ken Jehova ti dayag a rumbeng iti naganna; mangyegcayo iti maysa a daton, ket umaycayo iti saclangna: iti nasantoan nga ornos agrucbabcayo ken Jehova.

³⁰ Agkintayegcayo iti saclangna, dacayo amin a daga: ti lubong mapasingkedan met, tapno di mabalin a magaraw.

³¹ Agragsac coma dagiti langlangit, ket agrag-o coma ti daga; saoenda coma iti tengnga dagiti nasnacion, Agari ni Jehova.

³² Agungor coma ti baybay, ken ti pannacapunnona; agrag-o coma ti away ken amin nga adda kencuana;

³³ Iti casta agcantanto dagiti caycayo iti bakir gapu iti rag-o iti sango ni Jehova; ta umay a mangocom iti daga.

³⁴ O agyamancayo ken Jehova; ta isu naimbag; ta ti naayat a kinaimbagna agibtur iti agnanayon.

³⁵ Ket saoenyo, Isalacannacami, O Dios ti pannacaisalacami, ket urnongennacami ken isalacannacami cadagiti nasnacion, tapno agyamancami iti nasantoan a naganmo, ken tapno agballigicami iti pannacaidayawmo.

³⁶ Mabendito coma ni Jehova, ti Dios ti Israel, manipud iti agnanayon agingga iti agnanayon. Ket isu-amin a tattao kinunada, sapay coma, ket dinaydayawda ni Jehova.

³⁷ Iti casta imbatina idiay, iti sango ti lacasa ti tulag ni Jehova, da Asaf ken dagiti cacabsatna, tapno agannongda a cancanayon, iti sango ti lacasa cas sapulen ti aramid iti inaldaw;

³⁸ Ken ni Obed-edom agraman cacabsatna, innem a puloda ket walo; castamet ni Obed-edom nga anac a lalaki ni Jedutun, ken ni Hosa, tapno agbantayda iti ruangan;

³⁹ Ken ni Sadoc a padi, ken dagiti cacabsatna a papadi, iti sango ti tabernaculo ni Jehova iti nangato a disso nga adda idi idiay Gabaon,

⁴⁰ Ken tapno idatagda ken Jehova dagiti datdaton a mapuuran iti rabaw ti altar ti daton a mapuuran a cancanayon iti bigat ken iti malem, a mayannurot met laeng iti amin a naisurat iti linteg ni Jehova, nga imbilinna iti Israel;

⁴¹ Ket caduada da Heman ken Jedutun, ken ti matda a napili idi, a nainagananda idi, tapno agyamanda ken Jehova, agsipud ta ti naayat a kinaimbagna agtaeng iti agnanayon;

⁴² Ket caduada da Heman ken Jedutuan agraman tangtangguyob ken piangpiangpiang ta isuda ti agaweng iti natbag, ken agraman ar-arwaten a maipaay iti cancanta ti Dios; ken dagiti annac a lallaki ni Jedutum tapno agyanda iti ruangan.

⁴³ Ket amin a tattao pimmanawda tunggal lalaki a napan iti balayna: ket ni David nagsubli tapno bendicionanna ti balayna.