1 Cronicas 12 - Ti Biblia (1973)

Dagiti gagayyem ni David idiay Siclag. Dagiti Gaditas simmurotda ken David. Dagiti sabsabali a gagayyemna. Dagidiay a nangtulong ken David tapno agbalin nga ari.

¹ Dagitoy isuda dagiti immay ken David idiay Siclag, iti bayat ti panaglemmengna pay laeng a gapu ken ni Saul nga anac ni Kis; ket isuda addada idi cadagiti mamaingel a lallaki, a catulonganna iti gubat.

² Isuda naigamanda cadagiti ba-i, ket nabalinda nga aramaten ti ima a canawan ken catigid nga agpadpada iti panagipalatibong cadagiti batbato ken iti panag-biat cadagiti batbato ken iti panagibiat cadagiti panpana iti ba-i: isuda nagtaudda cadagiti cacabsat ni Saul iti Benjamin.

³ Ti pangolo isu idi ni Ahiezer: sa ni Joas nga anac a lalaki ni Semaa a Gabaatita, ken ni Jeziel, ken ni Pelet, nga annac a lalaki ni Azmabeth, ken ni Beraca, ken ni Jehu nga Anatotita,

⁴ Ken ni Ismaias a Gabaonita, a maysa a maingel a lalaki cadagiti tallopulo, ken ngatoen dagiti tallopulo, ken ni Jeremias, ken ni Jahaziel, ken Johanan, ken Jozabad a Gederatita,

⁵ Ni Eluzai, ni Jerimot, ken ni Bealias, ni Semarias, ken ni Sefatias nga Harufita,

⁶ Ni Elcana, ni Isias, ken ni Azareel, ni Joezer, ken ni Jasobam, a Coratitas,

⁷ Ken ni Joela, ni Zebadias, nga annac a lallaki ni Jeroham a taga Gedor.

⁸ Ket cadagiti Gaditas simminada a napan ken David idiay sarikedked idiay let-ang, dagiti lallaki a mannacabalin ken mamaingel, lallaki a nasursuroan a maipaay iti gubat, a nabalinda ti nagtagicalasag ken nagtagipica, a dagiti rupada casda la cadagiti rupa dagiti leon, ken nasiglatda a casda la cadagiti kigaw iti rabaw dagiti banbantay:

⁹ Ni Eser ti pangolo, ni Abadias ti maicadua, ni Eliab ti maicatlo,

¹⁰ Ni Mismana ti maicapat, ni Jeremias ti maicalima,

¹¹ Ni Attai ti maicanem, ni Eliel ti maicapito,

¹² Ni Johanan ti maicawalo, ni Elzabad ti maicasiam,

¹³ Ni Jeremias ti maicasangapulo, ni Macbani ti maicasangapulo ket maysa.

¹⁴ Dagitoy cadagiti annac a lallaki ni Gad isuda idi dagiti capcapitan ti buyot: ti cabassitan idi pumada iti sangagasut, ket ti cadackelan iti sangaribu.

¹⁵ Dagitoy dagiti bimmallasiw iti Jordan iti umuna a bulan, idi naglupias cadagiti isu-amin a ngarngarabna; ket pinagtalawda amin dagiti taga loblobong, iti agpadaya ken iti agpalaud nga agpadpada.

¹⁶ Ket cadagiti annac da Benjamin ken Juda immayda iti sarikedked ken David.

¹⁷ Ket ni David rimmuar a simmabet cadacuada, ket simmungbat ket kinunana cadacuada, No umaycayo a sicacappia caniac tapno tulongandac, ti pusoc maitiponto cadacayo; ngem no umaycayo a mangyawat caniac cadagiti cabusorco, idinto ta awan ti biddut cadagiti imac, ti Dios dagiti ammatayo isu imatanganna ken babalawenna.

¹⁸ Idin ti Espiritu immapay ken Amasai, a pangolo idi dagiti tallopulo, ket kinunana, Cucuanacami, David, ken cadduanacami, sica anac a lalaki ni Jesse; talna, talna ti adda kenca, ken talna ti adda cadagiti catcatulongam; ta ti Diosmo tulongannaca. Idi a casta inawat ida ni David, ket inaramidna ida a capcapitan ti bunggoy.

¹⁹ Naggapu iti Manases nagtinnag met ti dadduma ken David, idi isu immay a kimmuyog cadagiti Filisteos a maibusor ken Saul iti gubat: ngem isuda dida tinulongan ida; ta iti patigmaan dagiti appo dagiti Filisteos isu pinagawidda, a kinunada, Agtinnagto ken apona a Saul iti panagpeggad dagiti ol-olotayo.

²⁰ Idi a mapmapan idiay Siclag, nagtinnag kencuana ti naggapu iti Manases, da Adnas, Jozabad, ken Jediael, ken Micael, Jozabad, Eliu, ken Silletai, a capcapitan dagiti rinibribu a naggapuda iti Manases.

²¹ Ket isuda tinulonganda ni David a maibusor iti bunggoy dagiti agbariw-as: ta isuda amin lallakida a mannacabalin ken mamaingel, ken capcapitanda idi iti buyot.

²² Ta inaldawaldaw idi nga umay ken David dagiti lallaki tapno tulonganda, agingga iti adda idi maysa a dackel a buyot, a cas iti buyot ti Dios.

²³ Ket dagitoy dagiti bilang dagiti pangoloen dagiti naigaman a maipaay iti gubat, nga immay ken David idiay Hebron, a naglisi iti pagarian ni Saul a mayannurot iti sao ni Jehova.

²⁴ Dagiti annac ni Juda a nagtagicalasag ken nagtagipica innem a ribu ket walogasutda, a naigaman a maipaay iti gubat.

²⁵ Cadagiti annac ni Simeon, lallaki a mannacabalin ken mamaingel a maipaay iti gubat, pito a ribu ket sangagasutda.

²⁶ Cadagiti annac ni Levi uppat a ribu ket innem a gasutda.

²⁷ Ken ni Joiada a mangidalan idi iti balay ni Aaron; ket kencuana adda idi tallo a ribu ket pito a gasut,

²⁸ Ken ni Sadoc, a maysa a lalaki nga agtutubo a mannacabalin ken maingel, ken iti balay ni amana duapuloda ket dua a capcapitan.

²⁹ Ket cadagiti annac ni Benjamin, a cacabsat ni Saul, tallo a ribuda: ta agingga idi ti caaduan sinalimetmetanda ti rebbengda iti balay ni Saul.

³⁰ Ket cadagiti annac ni Efraim duapulo a ribuda ket walo a gasut, lallaki a mannacabalin ken mamaingel, lallaki nga agdindinamag cadagiti balbalay dagiti ammada.

³¹ Ket iti caguddua ti caputotan ni Manases sangapuloda ket walo a ribu, a nainaganan, tapno umayda ken pagarienda ni David.

³² Ket cadagiti annac ni Issacar, lallaki a mannacaawat cadagiti tiempo, tapno ammoenda no ania ti rebbeng nga aramiden ti Israel, dagiti pangoloen dagidiay duagasutda idi; ket amin a cacabsatda addada idi cadagiti panagbilinda.

³³ Iti Zabulon, a macabael a rumuar iti buyot, a nacabalin a mangornos iti gubat, iti amin a kita ti gamigam ti gubat, limapulo a ribuda, ken dagiti nacabalin a nangornos iti gubat, ket saanda idi a nagrutap a puso.

³⁴ Ket iti Neftali sangaribu a capcapitan, ket caduada dagiti sicacalasag ken sipipica a tallopulo ket pito a ribu.

³⁵ Ket cadagiti Danitas a nacabalin a mangornos iti gubat, duapulo ket walo a ribuda ket innem a gasut.

³⁶ Ket iti Aser, a macabael idi a rumuar iti buyot, a nacabalin a mangornos iti gubat, uppat a pulo a ribu.

³⁷ Ket iti sabali a bangir ti Jordan, cadagiti Rubenitas, ken cadagiti Gaditas, ken iti guddua ti caputotan ni Manases, a siigamda iti amin a kita ti igam ti gubat a maipaay iti bacal, sangagasut ket duapulo a ribuda.

³⁸ Amin dagitoy, idinto a lallaki ti gubat, a nabalinda nga ornosen ti bacal, immayda a binuyog ti napalongdo a puso idiay Hebron, tapno pagarienda ni David iti isu-amin nga Israel: ket amin a matda ti Israel sangsangcanakemda a mamagari ken David.

³⁹ Ket isuda nakiaddada idiay ken David bayat iti tallo nga aldaw, a nangnangan ken immininum; ta dagiti cacabsatda nagsaganada iti maipaay cadacuada.

⁴⁰ Maysa pay dagiti asideg idi cadacuada, agingga met laeng iti Issacar ken iti Zabulon, ken iti Neftali, nangyegda iti tinapay nga inawit dagiti as-asno ken dagiti camcamello, ken dagiti mulmulo, ken dagiti vacvaca, balbalon a macan, cancancanen nga higos, ken raraay dagiti pinakebbet nga uvuvas, ken arac, ken lana, ken vacvaca, ken carcarnero a nawadwad: ta adda idi rag-o iti Israel.