1 Cronicas 11 - Ti Biblia (1973)

Ni David maaramid nga ari ti amin nga Israel. Cayawanna ti Sion. Dagiti namaingelan nga aramid dagiti mamaingel a lallakina.

¹ Idin nakigimong amin nga Israel ken David idiay Hebron, a kinunada, Adtoy, dacami dagiti tultulangmo ken lasagmo.

² Cadagiti nalabes a tiempo, idi met laeng pinagari ni Saul, sica ti nangidalan iti Israel a rummuar ken nangisubli: ket ni Jehova a Diosmo kinunana kenca, Sicanto ti pastor ti ilic nga Israel, ken sicanto ti pangulo ti ilic nga Israel.

³ Iti casta isu-amin dagiti lallacay ti Israel immayda iti ari idiay Hebron; ket ni David nagaramid cadacuada iti tulag idiay Hebron iti saclang ni Jehova, ket pinulotanda ni David nga ari ti Israel, a mayannurot iti sao ni Jehova iti pannacaaramat ni Samuel.

⁴ Ket ni David ken amin nga Israel napanda idiay Jerusalem (isu met laeng ti Jebus); ket dagiti Jebuseos, a naed ti daga addada idi sadiay.

⁵ Ket dagiti naed ti Jebus kinunada ken David, Dicanto sumrec ditoy. Nupay casta ni David innalana ti sarikedked ti Sion; nga isu met laeng ti ili ni David.

⁶ Ket ni David kinunana, Uray siasinoman a mangcabil nga umuna cadagiti Jebuseos isunto ti pangolo ken capitan, Ket ni Joab nga anac ni Sarvia simmang-at nga immuna, ket naaramid a pangolo.

⁷ Ket nagtaeng ni David idiay sarikedked; gapuna nga isu ti ninaganrikedked; gapuna nga isu ti ninaganda iti ili ni David.

⁸ Ket binangonna ti ili iti agliclicmut, manipud Millo nga aglicmut met laeng; ket ni Joab tinarimaanna ti natda iti ili.

⁹ Ket ni David rumang-ay la idi a rumang-ay; ta adda idi kencuana ni Jehova dagiti buybuyot.

¹⁰ Ket dagitoy dagiti pangpangoloen dagiti mamaingel a lallaki nga adda idi ken David, isuda a nangiparangarang cadagiti bagbagida a napigsa agraman kencuana iti pagarianna, agraman met amin nga Israel, tapno isu ti aramidenda nga ari, a mayannurot iti sao ni Jehova iti maipapan iti Israel.

¹¹ Ket daytoy isu ti bilang dagiti mamaingel a lallaki nga adda idi ken David: ni Jasobam nga anac ni Hacmoni, a pangolo dagiti tallopulo; intag-ayna ti gayangna a maibusor cadagiti tallo gasut ket pinatayna ida iti naminpinsan a daras.

¹² Ket ti sumaganad idi kencuana isu ni Eleazar nga anac ni Dodo, nga Ahohita, a maysa idi cadagiti tallo a mamaingel a lallaki.

¹³ Daytoy nakicaddua ken David idiay Pasdammin, ket naurnong idi idiay dagiti Filisteos iti gubat, isu a yan idi ti sangcakelleng a daga a napno iti cebada; ket dagiti tattao ti Israel intarayanda idi ti sango dagiti Filisteos.

¹⁴ Ket isuda nagtacderda iti tengnga ti kinelleng, ket incanawada, ket pinatayda dagiti Filisteos; ket ni Jehova insalacanna ida gapu iti maysa a dackel a panagballigi.

¹⁵ Ket tallo cadagiti tallopulo a panolo a lallaki simmalogda agingga iti bato ken David, idiay rukib ti Adullam: ket ti buyot dagiti Filisteos nagpacarso idi iti lobong ti Rafaim.

¹⁶ Ket adda idi ni David iti sarikedked, ket ti agbantay a buyot dagiti Filisteos adda idi idiay Bet-lehem.

¹⁷ Ket ni David nailiwan unay, ket kinunana, O daydiay a mangted coma caniac, ti danum nga inumen nga aggapu idiay bubon ti Bet-lehem, nga adda iti denna ti ruangan!

¹⁸ Ket dagiti tallo a mamaingel a lallaki simmaracusucda iti buyot dagiti Filisteos, ket nangalada iti danum iti bubon ti Bet-lehem, nga adda iti denna ti ruangan, ket nangalada; ket isu ti inyegda ken ni David: ngem ni David dina kinayat nga ininum, no di ket imbucbocna ken Jehova,

¹⁹ Ket kinunana, Ti Diosco iparitna caniac nga aramidec coma daytoy: inumecto aya ti dara dagitoy a lallaki a nangicabil cadagiti biagda iti peggad? ta iti peggad dagiti biagda isu ti inyegda. Gapuna nga isu ti dina kinayat nga ininum. Dagitoy a banag inaramid dagiti tallo a mamaingel a lallaki.

²⁰ Ket ni Abisai a cabsat ni Joab, isu idi ti pangolo dagiti tallo; ta isu intag-ayna ti picana a maibusor cadagiti tallogasut ket pinatayna ida, ket nainaganan cadagiti tallo.

²¹ Cadagiti tallo, isu natantan-oc idi ngem cadagiti dua, ket naaramid a capitanda: ngem nupay casta saanna a nagun-odan dagiti immuna a tallo.

²² Ni Benaias nga anac ni Joiada, nga anac ti maysa a lalaki a maingel a taga Cabseel, a nangaramid cadagiti namainglan nga ar-aramid, a pinatayna dagiti dua nga annac a lallaki ni Ariel a taga Moab: simmalog met ket pinatayan ti maysa tengnga ti maysa a bito idi tiempo ti nieve.

²³ Ket isu pinatayna ti maysa nga Egipcio, maysa a lalaki a dackel ti panagbagbagina, a lima a sico ti catayagna; ket adda idi iti ima ti Egipcio maysa a pica a cas maysa a paglucutan ti pangablan; ket isu simmalog kencuana a sisasarucod, ket rinabsutna ti pica iti ima di Egipcio, ket iti daydi met laeng picana ti pinagngpapatayna kencuana.

²⁴ Dagitoy a banag inaramid idi ni Benaias nga anac ni Joiada, ket nainaganan cadagiti tallo a mamaingel a lallaki.

²⁵ Adtoy, isu natantan-oc idi ngem cadagiti tallopulo, ngem saanna a nagun-odan dagiti immuna a tallo: ket isu ti insaad ni David a pangolo ti guardiana.

²⁶ Casta met dagiti mamaingel a lallaki dagiti buybuyot: ni Asael a cabsat ni Joab, ni Elhanan nga anac a lalaki ni Dodo a taga Bet-lehem,

²⁷ Ni Samot nga Arorita, ni Helles, a Pelonita,

²⁸ Ni Ira nga anac a lalaki ni Acces a Tecoita, ni Abiezer nga Anatotita,

²⁹ Ni Sibbecai nga Husatita, ni Ilai nga Ahohita,

³⁰ Ni Maharai a Netofatita, ni Heled nga anac a lalaki ni Baana a Netofatita,

³¹ Ni Itai nga anac a lalaki ni Ribai a taga Gabaat, cadagiti annac ni Benjamin, ni Benaias a Piratita,

³² Ni Hurai a taga wawaig sadi Gaas, ni Abiel nga Arbatonita,

³³ Ni Azmavet a Baharumita, ni Eliaba a Saalbonita,

³⁴ Dagiti annac a lallaki ni Asem a Gezonita, ni Jonatan nga anac ni Saje nga Hararita,

³⁵ Ni Ahiam nga anac a lalaki ni Sacar nga Hararita, ni Elifal nga anac a lalaki ni Ur,

³⁶ Ni Hefer a Mekeratita, ni Ahia a Pelonita,

³⁷ Ni Jesro a Carmelita, ni Naharai nga annac a lalaki ni Ezbai,

³⁸ Ni Joel a cabsat a lalaki ni Natan, ni Mibar nga anac a lalaki ni Agrai,

³⁹ Ni Selec nga Ammonita, ni Naharai a Berotita, nga agaw-awit iti igam ni Joab nga anac a lalaki ni Sarvia,

⁴⁰ Ni Ira a Itreotita, ni Yared a Itreotita,

⁴¹ Ni Uria a Heteo, ni Zabad nga anac a lalaki ni Ahli,

⁴² Ni Adina nga anac a lalaki ni Siza a Rubenita, a pangolo dagiti Rubenitas, ken tallopulo a caduana,

⁴³ Ni Hanan nga anac a lalaki ni Maaca, ken ni Josafat a Mitnita,

⁴⁴ Ni Uzzias nga Astarotita, da Samma ken Jehiel nga annac a lallaki ni Hotam nga Arorita.

⁴⁵ Ni Jediael nga anac a lalaki ni Simri, ken ni Joha a cabsatna, a Tisaita,

⁴⁶ Ni Eliel a Mahavita, ken ni Jeribai, ken ni Josabia, nga anac a lalaki ni Elnaam, ken ni Itma, a Moabita,

⁴⁷ Ni Eliel, ken ni Obed, ken ni Jaasiel a Mosobiatita.