1 Cronicas 10 - Ti Biblia (1973)

Ti pannacatay ni Saul ken dagiti annacna a lallaki.

¹ Ket dagiti Filisteos nakigubatda a maibusor iti Israel: ket dagiti lallaki ti Israel intarayanda ti sangoanan dagiti Filisteos, ket napasagda a natay idiay bantay Gilboa.

² Ket dagiti Filisteos kinamatda da Saul ken dagiti annacna a lallaki: ket dagiti Filisteos pinatayda da Jonatan, Abinadab, ken Malkisua, nga annac a lallaki ni Saul.

³ Ket ti gubat bimmara a maibusor ken Saul, ket isu nacamacam dagiti panaan; ket isu nariribuc a gapu cadagiti panaan.

⁴ Idin kinuna ni Saul idi agaw-awit iti igamna, Asutem ta campilanmo, ket isu ti pangsalputmo, caniac, di la ket ta dagitoy di nacugit umayda ket pagpalaloandac. Ngem ti agaw-awit iti igamma nagmadi; ta nagbuteng iti napalalo. Gapuna a ni Saul innalana di campilanna, ket isu ti rinugmaanna.

⁵ Ket idi a ti agaw-awit iti igamna naimatanganna a natay ni Saul, isu rinugmaanna met di campilanna, ket natay.

⁶ Iti casta natay ni Saul, ken dagiti tallo nga annacna a lallaki; ken ti amin a balayana natay a naicanonong kencuana.

⁷ Ket idi nga amin a lallaki ti Israel nga adda idi iti lobong naimatanganda a nagtarayda, ket natay ni Saul ken dagiti annacna a lallaki, isuda binaybay-anda dagiti il-ilida, ket nagtarayda; ket dagiti Filisteos immayda ket nagnaedda cadacuada.

⁸ Ket naaramid iti bigat, idi a dagiti Filisteos immayda manglabus cadagiti napapatay, a nasaracanda ni Saul ken dagiti annacna a lallaki a napasagda idiay bantay Gilboa.

⁹ Ket isu linabusanda, ket innalada ti olona, ken ti cabalina, ket nagbaonda iti daga dagiti Filisteos iti agliclicmut, a nagpaipan cadagiti damdamag agingga cadagiti ladladawanda, ken cadagiti tattao.

¹⁰ Ket incabilda ti cabalna iti balay dagiti didiosda, ket imbitinda ti olona iti balay ni Dagon.

¹¹ Ket idi a ti amin a Jabes-galaad nangngegda ti amin nga inaramid dagiti Filisteos ken Saul.

¹² Amin dagiti mamaingel a lallaki timmacderda, ket innalada ti bangcay ni Saul, ken dagiti bangcay dagiti annacna a lallaki, ket inyegda ida iti Jabes, ket intabonda dagiti tultulangda iti siroc ti lugo idiay Jabes, ket nagayunarda bayat iti pito nga aldaw.

¹³ Iti casta ni Saul natay gapu iti panaglabsingna a naaramidna a maicaniwas ken Jehova, gapu iti sao ni Jehova, a dina sinalimetmetan; ken gapu met iti panagsapulna iti patigmaan iti maysa a baglan, tapno umuman babaen kencuana,

¹⁴ Ket saan nga immuman ken Jehova: gapuna nga isu ti pinatayna, ket imbalicna ti pagarian ken David nga anac ni Jesse.