1 Ar-ari 9 - Ti Biblia (1973)

Ti tulag ni Jehova ken Salomon. Dagiti il-ili a maited ken Hiram. Ni Salomon polongenna dagiti tattao. Dagiti tinawentawen a datonna. Ti bunggoy ti sasacayanna.

¹ Ket naaramid, idi a ni Salomon nalpasna ti pannacabangon ti balay ni Jehova, ken ti balay ti ari, ken amin a tarigagay ni Salomon a kinayatna nga aramiden,

² A ni Jehova nagparang ken Salomon iti maicadua a daras, a cas iti pinagparangna kencuana sadi Gabaon.

³ Ket ni Jehova kinunana kencuana, Siac mangngegco ti cararagmo ken ti ararawmo, nga inaramidmo iti sangoc. Siac sinantificarco daytoy a balay, isu a binangonmo, tapno maicabil ti naganco sadiay iti agnanayon; ket dagiti matac ken ti pusoc addadanto sadiay nga agnanayon.

⁴ Ket no maipapan kenca, no magnaca iti sangoc, a cas pannagna ni David nga amam iti kinatarnaw ti puso, ken kinasingpet, nga aramidem amin ti cas imbilinco kenca, ket salimetmetam dagiti ipapaalagadco ken dagiti linlintegco;

⁵ Iti casta isaadconto ti trono ti pagariam iti Israel nga agnanayon, a cas incaric ken David nga amam, a kinunac, Saanto nga agcurang kenca ti maysa a lalaki iti trono ti Israel.

⁶ Ngem no sumiasicayto iti isusurot kaniac, dacayo wenno dagiti annacyo, ket dicayo tungpalen dagiti bilbilinco ken dagiti ipapaalagadco nga incabilco iti sangoyo, no di ket incayonto ket agservicayo cadagiti sabali a didios, ket agrucbabcayo cadacuada;

⁷ Iti casta siac ipusayconto ti Israel iti daga nga intedco cadacuada; ket daytoy a balay isu a sinantificarco a maipaay iti naganco, ibellengconto iti ruar ti imatangco; ket ti Israel agbalinto a maysa a proverbio ken maysa a barengbareng a balicas cadagiti amin a tattao.

⁸ Ket nupay no daytoy a balay naipangato unay, nupay casta tunggal lumabas iti arrubayanna masdaawto, ket agsanamticto; ket isuda cunadanto, Apayapay nga inaramid ni Jehova ti castoy iti daytoy a daga ken iti daytoy a balay?

⁹ Ket sumungbatdanto, Agsipud ta binay-anda ni Jehova a Diosda, a nangaon cadagiti ammada iti daga ti Egipto, ket nangalada iti sabasabali a didios, ket nagrucbabanda ida, ken nagservianda ida: gapuna a ni Jehova inyegna cadacuada amin daytoy a dakes.

¹⁰ Ket naaramid iti paggibusan ti duapulo a tawen, a panangbangon ni Salomon cadagiti dua a balay, ti balay ni Jehova ken ti balay ti ari,

¹¹ (Ni Hiram nga ari ti Tiro nagited idi ken Salomon cadagiti caycayo a cantingen ken caycayo a parwa, ken balitoc, a mayannurot iti amin a calicagumna), a ni ari Salomon iniccanna ngarud ni Hiram iti duapulo nga il-ili iti daga ti Galilea.

¹² Ket ni Hiram nagluas idiay Tiro tapno kitaenna dagiti il-ili a ni Salomon intedna kencuana; ket saanda a nacaayayo kencuana.

¹³ Ket isu kinunana, Ania nga il-ili dagitoy nga intedmo caniac, cabsatco? Ket isu ninagananna ida iti daga ti Cabul inggana itoy nga aldaw.

¹⁴ Ket ni Hiram nangibaon ken Salomon iti sangagasut ket duapulo a talento a balitoc.

¹⁵ Ket daytoy isu ti gapu ti panagpapulong nga inaramid ni ari Salomon, tapno maputar ti balay ni Jehova, ken ti bucodna a balay, ken ti Millo, ken ti bacud ti Jerusalem, ken ti Hasor, ken ti Megiddo, ken ti Gezer.

¹⁶ Ni Faraon nga ari ti Egipto simmang-at, ket innalana ti Gezer, ket isu ti pinuuranna iti apuy, ket pinatayna dagiti Cananeo nga agnaed iti ili, ket isu ti intedna a cas pannacabiang ti anacna, nga asawa ni Salomon.

¹⁷ Ket ni Salomon binangonna ti Gezer, ken ti Bet-horon iti baba,

¹⁸ Ken ti Baalat, ken ti Tadmor iti let-ang, iti daga,

¹⁹ Ken amin dagiti il-ili a pagidulinan ni Salomon, ken dagiti il-ili a maipaay cadagiti lugluganna, ken dagiti il-ili a maipaay cadagiti tattaona nga agcacabayo ken amin dagidiay a ni Salomon kinayatna a pinutar a maipaay iti pagayatanna sadi Jerusalem, ken sadi Libano, ken iti amin a daga a pagturayanna.

²⁰ No maipapan cadagiti amin a tattao a natda cadagiti Amorreo, dagiti Heteo, dagiti Perezeo, dagiti Heveo, dagiti Jebuseo, a saan a nagtaud cadagiti annac ti Israel;

²¹ Dagiti annacda a natda cadacuada iti daga, isuda a saan a nabalin a dinadadael nga intalipupus dagiti annac ti Israel, cadacuada ti namangonan ni Salomon iti maysa a pannacapolong cadagiti bag-en inggana itoy nga aldaw.

²² Ngem ni Salomon saanna a pinagbalin dagiti annac ti Israel a bag-en; no di ket isuda dagiti lallaki ti gubat, ken ad-adipenna, ken pangpanguloenna, ken cacapitanna, ken agtuturay cadagiti lugluganna ken tattaona nga agcacabayo.

²³ Dagitoy isuda dagiti cangatoan nga agtuturay nga addada cadagiti aramid ni Salomon, limagasut ket limapulo, a mangituray cadagiti tattao nga agaramid iti trabajo.

²⁴ Ngem ti babai nga anac ni Faraon simmang-at a naggapu iti ili ni David, agingga iti balayna a pinutar ni Salomon a maipaay kencuana: idin impatacderna ti Millo.

²⁵ Ket mamitlo iti macatawen a nangidatag ni Salomon cadagiti datdaton a mapuuran ken datdaton ti cappia iti rabaw ti altar isu a binangonna ken Jehova, pinuuranna met a naigiddan cadacuada ti incienso, iti rabaw ti altar nga adda idi iti sango ni Jehova. Iti casta lineppasna ti balay.

²⁶ Ket ni ari Salomon nangaramid iti maysa a bunggoy dagiti sasacayan sadi Ezion-geber, nga adda iti denna ti Elot, iti igid ti Baybay a Nalabaga, iti daga ti Edom.

²⁷ Ket ni Hiram imbaonna cadagiti sasacayan dagiti ad-adipenna a marinero a mannacaammo iti taaw, a caduada dagiti ad-adipen ni Salomon.

²⁸ Ket isuda napanda sadi Ofir, ket nangalada sadiay iti balitoc nga uppat a gasut ket duapulo a talento, ket isu ti impanda ken ari Salomon.