1 Ar-ari 7 - Ti Biblia (1973)

Ti balay ni Salomon met laeng. Dagiti aramid ni Hiram a taga Tiro iti templo: dagiti ad-adigi; ti sinocog a baybay; dagiti batbatay a gambang; dagiti bacbacca a gambang.

¹ Ket ni Salomon pinutarna ti balayna met laeng iti sangapulo ket tallo a tawen sana nalpas ti amin a balayna.

² Ta isu pinutarna ti balay a nagtaud iti bakir ti Libano; ti caatiddogna sangagasut a sico, ket ti caacabana limapulo a sico, ket ti catayagna tallopulo a sico, iti rabaw dagiti uppat a cabatog nga ad-adigi a cantingen, nga adda awawanan a cantingen iti rabaw dagiti adigi.

³ Ket naatepan iti cantingen iti ngato iti rabaw dagiti uppat a pulo ket lima nga awawanan, nga addada iti rabaw dagiti ad-adigi; sangapulo ket lima iti tumunggal cabatog.

⁴ Ket adda dagiti baotec iti nagcatlo a cabatog, ket ti tawa naibatog iti tawa iti nagcatlo a caunda.

⁵ Ket amin dagiti rikep ken baotec naaramidda a cuadrado cadagiti cayo; ket ti tawa naibatog iti tawa iti nagcatlo a caunda.

⁶ Ket isu nangaramid ti balcon cadagiti ad-adigi, ti caatiddogna limapulo a sico, ket ti caacabana tallopulo a sico; ken maysa a balcon iti sangoda; ken ad-adigi ken maysa a dapian iti sangoda.

⁷ Ket isu nangaramid ti balcon ti trono nga isu ti yanna a mangocom isu ti balcon ti pangocoman: ket inaccubanna ida iti cantingen manipud iti cadsaaran agingga iti cadsaaran,

⁸ Ket ti balayna a pagnaedanna, ti sabali a paraangan, iti uneg ti balcon, capadana idi iti pannacaaramid. Isu nangaramid met iti maysa a balay a maipaay iti anac ni Faraon, (nga innala ni Salomon nga asawana), a capadpada daytoy a balcon.

⁹ Amin dagitoy nanginada a batbato, dagiti met laeng bato a tinicapan, a mayannurot iti rucod, naragadida cadagiti ragadi, iti uneg ken iti ruar, ken manipud iti puon agingga iti toctoc, ken casta iti ruar agingga iti paraangan a dackel.

¹⁰ Ket ti puon isu ti naaramid cadagiti napateg a batbato, dagiti met laeng dadackel a bato, batbato a sagsangapulo a sico, ken batbato a sagwawalo a sico.

¹¹ Ket iti rabaw adda batbato a napateg, dagiti met laeng bato a tinicapan, a mayannurot iti rucod, ken cayo a cantingen.

¹² Ket ti dackel a paraangan iti agliclicmut adda tallo cadasig a batbato a tinicapan, ken sangcadasig nga awawanan a cantingen; a cas iti adda iti paraangan nga akinuneg ti balay ni Jehova, ken ti balcon ti balay.

¹³ Ket ni ari Salomon nagbaon ket pinaalana ni Hiram manipud Tiro.

¹⁴ Isu ti anac ti maysa a babai a balo iti caputotan ni Neftali, ket ti amana maysa a lalaki a taga Tiro, maysa a mammanday iti gambang; ket isu napno iti kinasirib ken pannacaawat ken kinalaing nga agaramid iti amin nga aramid iti gambang. Ket napan ken ari Salomon, ket inaramidna amin ti aramidna.

¹⁵ Ta inaramidna dagiti dua nga adigi a gambang, a sangapulo ket walo a sico ti catayag ti tunggal maysa: ken maysa a tali a sangapulo ket dua a sico a naipulipol iti aglawlaw iti tunggal maysa cadacuada.

¹⁶ Ket isu nangaramid cadagiti dua a paratoc a gambang a sinocog a maicabil iti toctoc dagiti adigi: ti catayag ti maysa a paratoc lima a sico, ket ti catayag ti sabali a paratoc lima a sico.

¹⁷ Adda idi ic-iket nga inaramid a kinelleng, ken balangat a kinawar, a maipaay cadagiti paratoc nga adda cadagiti toctoc dagiti adigi; pito ti maipaay iti umuna a paratoc, ken pito ti maipaay iti sabali a paratoc.

¹⁸ Casta ti panangaramidna cadagiti adigi; ket adda dua a cadasig iti aglawlaw iti rabaw ti maysa nga iket nga inaramid a panangabbong cadagiti paratoc nga adda iti toctoc dagiti adigi: ket casta met ti inaramidna iti sabali a paratoc.

¹⁹ Ket dagiti parparatoc nga adda iti toctoc dagiti ad-adigi iti balcon isuda ti lirio nga inaramid, nga uppat a sico.

²⁰ Ket adda parparatoc iti rabaw met dagiti dua nga adigi, nga asideg iti pannaca-tian nga adda iti denna ti iniket: ket dagiti granada dua gasut, a binnatog iti agliclicmut iti sabali a paratoc.

²¹ Ket isu pinatacderna dagiti ad-adigi iti balcon ti templo: ket isu pinatacderna ti akincanawan nga adigi, ket ginaladanna iti nagan a Jaquin; ket isu pinatacderna ti akincatigid nga adigi ket ginaladanna iti nagan a Boaz.

²² Ket iti rabaw ti toctoc dagiti ad-adigi adda lirio nga inaramid: casta ti pannacalpas ti pannacaaramid dagiti dua nga adigi.

²³ Ket isu nangaramid iti maysa a sinocog a baybay a sangapulo a sico iti ngarab ken ngarab, a nagbucbukel ti panaglicmutna, ket ti catayagna lima a sico; ken maysa a tali a tallopulo a sico ti nailawlaw iti agliclicmut.

²⁴ Ket iti baba ti ngarabna iti agliclicmut adda bocboco isuda a nanglicmut kencuana, a sangapulo iti tunggal sico, a nailicmut iti baybay iti aglawlaw: dagiti bocboco dua a cabatog a nasucog idi a nasucogda.

²⁵ Isu nagbatay iti sangapulo ket dua a sinan-vaca, ti tallo simmango iti amianan, ket ti tallo simmango iti laud, ket ti tallo simmango iti abagatan, ket ti tallo simmango iti daya; ket ti baybay naisaad iti rabawda, ket amin a pasetda a camaudi addada iti uneg.

²⁶ Ket sangadangan iti capuscolna; ket ti ngarabna naaramid a cas iti ngarab ti maysa a tagayan, a cas sabong ti maysa a lirio: isu launenna ti duaribo a bat.

²⁷ Ket isu nangaramid ti sangapulo a batay a gambang; uppat a sico ti caatiddug ti tunggal batay, ket uppat a sico ti caacabana, ket tallo a sico ti catayagna.

²⁸ Ket ti pannacaaramid dagiti batbatay castoy: adda limlimbangda; ket dagiti limbang addada iti nagbaetan dagiti ngarab;

²⁹ Ket cadagiti limbang nga adda iti baet dagiti ngarab, adda sinanleon, vacvaca, ken querquerubin; ket iti rabaw dagiti ngarab adda maysa a pagibatayan iti ngato; ket iti baba dagiti leon ken dagiti vaca adda aramid nga inayubo a naibitin.

³⁰ Ket tunggal batay adda uppat a pilidna a gambang, ken burayongan a gambang; ket dagiti uppat a sacada adda pasawasawda: iti baba ti bacca adda paspasawasaw a sinocog agraman inayayubo iti bacrang ti tunggal maysa.

³¹ Ket ti ngiwatna iti uneg ti paratoc ken iti cangatona isu ti maysa a sico: ket ti ngiwatna nagbukel a cas pannacaaramid iti maysa a pagibatayan, a maysa a sico ket gudua; ket iti rabaw ti ngiwatna adda met kitkitikit, ket dagiti limbangda cuadradoda, saanda a nagbukel,

³² Ket dagiti uppat a pilid addada iti baba dagiti limbang; ket dagiti burayongan dagiti pilid addada idi iti batay: ket ti catayag ti maysa a pilid maysa a sico ket gudua.

³³ Ket ti pannacaaramid dagiti pilid cas iti pannacaaramid ti pilid ti maysa a lugan: dagiti burayonganda, ken dagiti antasda, ken dagiti rayosda, ken dagiti cuboda, nasucogda amin.

³⁴ Ket adda idi uppat a pasawasaw cadagiti uppat a suli ti tunggal batay: ket dagiti pasawasawda agcacanayonda iti batay met laeng.

³⁵ Ket iti ngato ti batay adda maysa a nagbukel nga aglicmut a cagudua ti sico ti catayagna; ket iti ngato ti batay dagiti ngarabna ken dagiti limbangna sangsangcanayonda met laeng.

³⁶ Ket cadagiti dalumpinas dagiti ngarabna, ken cadagiti limbangna, naikitikit dagiti querubin, leon ken palma, a mayannurot iti calawa ti tunggal maysa, agraman cadagiti inayubo iti aglawlaw.

³⁷ Cas itoy nga wagas isu inaramidna dagiti sangapulo a batay: isuda amin sangsangcapada iti pannacasocog, ken sangsangcarucodda, ken sangsangcakitada.

³⁸ Ket isu nangaramid iti sangapulo a bacca a gambang: maysa a bacca launenna idi ti uppat a pulo a bat; ket tunggal bacca uppat a sico; ket iti rabaw ti tunggal maysa cadagiti sangapulo a batay maysa a bacca.

³⁹ Ket isu incabilna dagiti batay, lima iti akincanawan a bangir ti balay ket lima iti akincatigid a bangir ti balay: ket incabilna ti baybay iti akincanawan a bangir ti balay, iti bangirna ti daya, a sumango iti abagatan.

⁴⁰ Ket ni Hiram inaramidna dagiti bacca, ken dagiti soplad, ken dagiti malocong. Casta ti panangleppas ni Hiram iti amin nga aramid nga inaramidna a maipaay ken ari Salomon iti balay ni Jehova:

⁴¹ Dagiti dua nga adigi, ken dagiti dua a malocong dagiti paratoc nga adda iti toctoc dagiti adigi; ken dagiti dua nga iket nga inaramid a nayabbong cadagiti dua a malocong dagiti paratoc nga adda cadagiti toctoc dagiti adigi;

⁴² Ken dagiti uppat a gasut a granada a maipaay cadagiti dua nga iket nga inaramid; dua cabatog a granada maipaay iti tunggal iket nga inaramid, a pangabbong cadagiti dua a malocong dagiti paratoc nga adda idi iti rabaw dagiti adigi;

⁴³ Ken dagiti sangapulo a batay, ken dagiti sangapulo a bacca iti rabaw dagiti batay;

⁴⁴ Ken ti maysa a baybay, ken ti sangapulo ket dua a vaca iti baba ti baybay;

⁴⁵ Ken dagiti banga, ken dagiti soplad, ken dagiti malocong: dagup amin dagitoy nga ar-aruaten, nga inaramid ni Hiram a maipaay ken ari Salomon, iti balay ni Jehova, isuda dagiti pinasileng a gambang.

⁴⁶ Iti tanap ti Jordan ti nagpasocogan cadacuada ti ari, iti daga a pila iti nagbaetan ti Soccot ken Sartan.

⁴⁷ Ket ni Salomon binay-anna amin dagiti ar-aruaten a saanna a tinimbeng, gapu iti kinaruayda: ti dagsen ti gambang saan a nasukimat.

⁴⁸ Ket ni Salomon inaramidna amin dagiti ar-aruaten nga adda iti balay ni Jehova; ti balitoc nga altar, ken ti lamesaan a balitoc a yan ti tinapay ti pamarang;

⁴⁹ Ken dagiti candelero a pulos a balitoc, lima iti macanawan, ken lima iti macatigid, iti sango ti oraculo: ken dagiti sabong, ken dagiti pagsilawan, ken dagiti sipit, a balitoc;

⁵⁰ Ken dagiti tagayan, ken dagiti pangarsang, ken dagiti malocong, ken dagiti cuchara, ken dagiti pagiccan iti apuy a pulos a balitoc: ken dagiti bisagra a balitoc, a maipaay cadagiti rikep iti akinuneg a balay, iti disso a casantoan, ken maipaay cadagiti rikep ti balay, cayatna a saoen, ti templo.

⁵¹ Castoy ti pannacalpas ti amin nga aramid a ni ari Salomon inaramidna iti balay ni Jehova. Ket ni Salomon inserrecna dagiti banbanag nga inconsagrar ni David nga amana, a ti met laeng, pirac, ken ti balitoc, ken dagiti al-alicamen, ket incabilna ida cadagiti paggamengan iti balay ni Jehova.