1 Ar-ari 6 - Ti Biblia (1973)

Ti panangbangon ti templo. Ti tulag ni Jehova. Ti oraculo ken dagiti querquerubinna. Ti pannacaarcos dagiti diddiding ken ruruangan.

¹ Ket naaramid iti maicapat a gasut ket walopulo a tawen iti calpasan ti ipapanaw dagiti annac ti Israel iti daga nga Egipto, iti maicapat a tawen iti panagari ni Salomon iti Israel, iti bulan a Zif, nga isu ti maicadua a bulan, nga isu inrugina a pinutar ti balay ni Jehova.

² Ket ti balay, a pinutar ni ari Salomon a maipaay ken Jehova, ti caatiddogna innem a pulo a sico, ket ti caacabana duapulo a sico, ket ti catayagna tallopulo a sico.

³ Ket ti balcon iti sango ti templo ti balay, duapulo a sico ti caatiddogna a cas iti caacaba ti balay; ket sangapulo a sico ti caacabana iti sango ti balay.

⁴ Ket inyaramidanna ti balay cadagiti tawtawa a rinejasan.

⁵ Ket iti sidiran ti diding ti balay isu namutar cadagiti tinagtagunda a cadsaaran iti agliclicmut, iti sidiran ti diding ti balay iti agliclicmut, iti templo ken iti oraculo nga agpadpada; ket isu nagaramid cadagiti sagumbi nga agliclicmut.

⁶ Ti cadsaaran nga akinbaba lima a sico ti caacaba, ket ti nagtengnga innem a sico ti caacaba, ket ti maicatlo pito a sico ti caacaba; ta iti akinruar isu nagaramid cadagiti tucad iti diding ti balay iti agliclicmut, tapno dagiti delleg saanda a maicongcong cadagiti diding ti balay.

⁷ Ket ti balay, idi a maputputar, naputar cadagiti batbato a naisaganada idiay pagalaan, ket awan ti uray martillo uray wasay uray ania nga aruaten a landoc a nangngeg iti balay, iti bayat ti pannacaputputarna.

⁸ Ti ruangan a maipaay cadagiti sagumbi a nagtengnga adda iti macanawan a sikigan ti balay: ket isuda umulida idi iti agdan a nagcusicos agingga iti nagtengnga a cadsaaran, ket manipud iti nagtengnga agingga iti maicatlo.

⁹ Iti casta pinutarna ti balay, ket lineppasna; ket inatepanna ti balay cadagiti bosoran ken tabtabla a cantingen.

¹⁰ Ket isu namutar cadagiti cadsaaran a naisidiran iti amin a balay, a tumunggal maysa lima a sico ti catayagna; ket isuda naicamangda iti balay iti pannacaaramat dagiti bosoran a cantingen.

¹¹ Ket ti sao ni Jehova immay ken Salomon, a kinunana,

¹² Maipanggep itoy a balay a bangbangonem, no magnacanto cadagiti ipaalagadco, ket aramidem dagiti linlintegco, ket salimetmetam amin dagiti bilbilinco a magnaca cadacuada; iti casta pasingkedacto ti saoc kenca, isu a sinaoc ken David nga amam.

¹³ Ket agnaedacto cadagiti annac ti Israel, ket diacto baybay-an ti ilic nga Israel.

¹⁴ Iti casta ni Salomon pinutarna ti balay, ken lineppasna.

¹⁵ Ket isu pinutarna dagiti diding iti uneg ti balay cadagiti tabla a cantingen: manipud iti cadsaaran ti balay agingga cadagiti diding iti pagatepan, isu inaccubanna ida iti cayo iti bangirda nga akinuneg; ken isu inaccubanna ti cadsaaran ti balay cadagiti tabla a parwa.

¹⁶ Ket isu pinutarna ti duapulo a sico iti akinlaem a paset ti balay cadagiti tabla a cantingen manipud cadsaaran agingga cadagiti diding iti pagatepan: isu pinutarna ida iti bangir nga akinuneg, a maipaay iti maysa nga oraculo, a iti met laeng casantoan a disso.

¹⁷ Ket ti balay, nga isu, ti templo iti sango ti oraculo, uppat a pulo a sico ti caatiddog.

¹⁸ Ket adda cantingen iti uneg ti balay, a nakitikitan cadagiti bocboco ken nagucrad a sinan-sabong: isuda amin cantingen; awan nakita a bato.

¹⁹ Ket isu nangisagana iti maysa nga oraculo iti tengnga ti uneg ti balay, tapno maisaad sadiay ti lacasa ti tulag ni Jehova.

²⁰ Ket iti uneg ti oraculo adda lengngaw a duapolo a sico ti caatiddogna, ken duapolo a sico ti caacabana, ken duapulo a sico ti cangatona; ket isu ti kinalupcupanna iti pulpulos a balitoc: ken isu inaccubanna ti altar iti cantingen.

²¹ Iti casta ni Salomon kinalupcupanna ti uneg ti balay iti pulpulos a balitoc: ken isu imbantengna ti tanicala a balitoc iti sango ti oraculo: ken isu ti kinalupcupanna met iti balitoc.

²² Ket ti sibubukel a balay isu kinalupcupanna iti balitoc, agingga iti nalpas ti amin a balay: castamet ti amin nga altar a maipaay iti oraculo kinalupcupanna iti balitoc.

²³ Ket iti oraculo isu nangaramid ti dua a querubin iti cayo nga olivo, a ti tumunggal maysa sangapulo a sico ti catayagna.

²⁴ Ket lima a sico ti maysa a payac ti querubin, ket lima a sico ti bangir a payac ti querubin: manipud iti akinmurdong a paset ti maysa a payac agingga iti akinmurdong a paset ti sabali adda sangapulo a sico.

²⁵ Ket ti sabali a querubin sangapulo a sico: isuda a dua a querubin sangsangcasucog ken sangsangcakitada.

²⁶ Ti catayag ti maysa a querubin sangapulo a sico, ket casta met ti sabali a querubin.

²⁷ Ket isu incabilna dagiti querubin iti uneg ti akinuneg a paset ti balay; ket dagiti paypayac dagiti querubin nacaucradda, iti casta a ti payac ti maysa sinagidna iti maysa a diding, ket ti payac ti maysa a querubin sinagidna iti sabali a diding; ket dagiti paypayacda nagsinnagidda iti tengnga ti balay.

²⁸ Ket isu kinalupcupanna dagiti querubin iti balitoc.

²⁹ Ket kinitikitanna dagiti amin a diding ti balay nga agliclicmut cadagiti ladawan dagiti querubin a naikitikit ken dagiti palma, ken nagucrad a sabsabong, iti uneg ken iti ruar.

³⁰ Ket ti cadsaaran ti balay isu kinalupcupanna iti balitoc, iti uneg ken iti ruar.

³¹ Ket maipaay iti sesercan iti oraculo isu nangaramid cadagiti rikrikep iti cayo ti olivo: ti dapian ken dagiti baotec dagiti ruangan apagcalima a paset ida ti diding.

³² Iti casta isu nangaramid cadagiti dua a rikep iti cayo nga olivo; ket isu inkitikitna cadacuada dagiti naikitikit a querubin ken dagiti palpalma ken nagucrad a sabsabong, ket kinalupcupanna ida iti balitoc; ket isu inyucradna ti balitoc cadagiti querquerubin, ken cadagiti palpalma.

³³ Casta met a nangaramid ti maipaay iti sesercan iti templo cadagiti baotec a cayo ti olivo, iti apagcapat a paset ti diding.

³⁴ Ken dua a rikep a cayo a parwa: dagiti dua a bulong ti maysa a rikep agcupinda idi, ket dagiti dua a bulong ti sabali a rikep agcupinda idi.

³⁵ Ket nangikitikit cadacuada cadagiti querquerubin ken palpalma ken nagucrad a sabsabong; ket isu kinalupcupanna ida iti balitoc a naipagisu cadagiti aramid a naikitikit.

³⁶ Ket isu pinutarna ti paraangan nga akinuneg iti tallo cadasig a tinicapan a bato, ken sangcadasig a patapaya a cantingen.

³⁷ Iti maicapat a tawen isu ti pannacaicabil ti pamuon ti balay ni Jehova, iti bulan a Zif.

³⁸ Ket iti maicasangapulo ket maysa a tawen, iti bulan a Bul, nga isu ti maicawalo a bulan, isu ti pannacaleppas ti balay iti amin a pasetna, ken mayannurot iti amin a pannacayuritna. Iti casta pito a tawen ti panangputarna.