1 Ar-ari 5 - Ti Biblia (1973)

Ti panagnomo da Salomon ken ari Hiram maipapan iti pannacabangon ti templo. Dagiti agtrabajo.

¹ Ket ni Hiram nga ari ti Tiro imbaonna dagiti ad-adipenna ken Salomon; ta isu nangngeganna nga isu ti pinulotanda nga ari iti saad ni amana: ta ni Hiram managayat a cancanayon ken David.

² Ket ni Salomon nagbaon ken Hiram, a kinunana,

³ Sica ammom no casano a ni David nga amac saanna a nabalin a binangon ti maysa a balay a maipaay iti nagan ni Jehova a Diosna gapu cadagiti gubat nga adda kencuana iti amin a sikigan, inggana iti panangicabil ni Jehova cadacuada iti baba dagiti dapan dagiti sacsacana.

⁴ Ngem ita ni Jehova a Diosco iniccannac iti talna iti amin a sikigan; awan cabusor, ken dakes a mapasamac.

⁵ Ket, adtoy, siac panggepec ti mangbangon iti maysa a balay a maipaay iti nagan ni Jehova a Diosco, a cas ni Jehova insaona ken David nga amac, a kinunana, Ti anacmo, isu a pagtugawecto ti tronom iti saadmo, isu bangonennanto ti balay a maipaay iti naganco.

⁶ Ita ngarud ibilinmo nga ipucanandac cadagiti cantingen ti Libano; ket dagiti ad-adipenco caduadanto dagiti ad-adipenmo; ket itedconto kenca ti tangdan dagiti ad-adipenmo a cas iti amin nga ibagamto: ta sica ammom nga awan cadacami ti macaammo nga agpucan cadagiti caycayo a cas cadagiti Sidonio.

⁷ Ket napasamac, idi a nangngeg ni Hiram dagiti sasao ni Salomon, nga isu nagragsac iti casta unay, ket kinunana, Bendito coma ni Jehova iti daytoy nga aldaw, isu a nangted ken David iti maysa a masirib nga anac iti daytoy nagdackelan nga umili.

⁸ Ket ni Hiram nagbaon ken Salomon, a kinunana, Siac nangngegco ti pinaibagam caniac: siac aramidecto amin a tarigagayam a maipanggep iti cayo a cantingen, ken maipanggep iti cayo a parwa.

⁹ Dagiti ad-adipenco isalugdanto ida nga igapu iti Libano agingga iti baybay; ket parakitconto ida nga aglasat iti taaw agingga iti disso a tudingamto caniac, ket paiwaracto ida sadiay; ket sica awatemto ida; ket sica aramidemto ti tarigagayac, iti panangtedmo ti taraon a maipaay iti balayco.

¹⁰ Iti casta ni Hiram nagited ken Salomon ti cayo a cantingen ken cayo a parwa a mayannurot iti amin a calicagumna.

¹¹ Ket ni Salomon nangted ken Hiram iti duapulo a ribu a casucat a trigo a taraon ti balayna, ken duapulo a casucat ti napulpulos a lana. Daytoy inted ni Salomon ken Hiram iti tinawen.

¹² Ket ni Jehova iniccanna ni Salomon iti kinasirib, a cas incarina kencuana; ket adda idi cappia cada Hiram ken Salomon; ket isuda a dua nagnomoda.

¹³ Ket ni ari Salomon pinolongna ti nagtaud iti amin nga Israel; ket dagiti napolong tallupoloda a ribu a lallaki.

¹⁴ Ket isu imbaonna ida sadi Libano, a sangapulo ribu iti binulan nga agsusublat; macabulan nga addada sadi Libano, ket dua a bulbulan iti balay: ket ni Adoniram isu idi ti pangolo dagiti lallaki nga agtrabajo iti nadagsen.

¹⁵ Ket ni Salomon addaan idi iti pitopulo a ribu nga agbunbunag iti awiten, ken walopulo a ribu nga agtagtaga idiay banbantay;

¹⁶ Malacsid dagiti pangoloen a pagturayen ni Salomon nga agaywan iti trabajo, adda tallo a ribu ket tallogasut, nga isuda nga agturay cadagiti tattao nga agaramid iti trabajo.

¹⁷ Ket ti ari nagbilin, ket isuda nagtagada cadagiti batbato a dadackel, batbato a napateg, tapno maisaad ti puon ti balay cadagiti batbato a tinagaan.

¹⁸ Ket dagiti managputar ni Salomon ken dagiti managputar ni Hiram ken dagiti Gibleo isuda dagiti nangtaga cadacuada, ken insaganada ti cayo ken dagiti batbato a pangbangon ti balay.