1 Ar-ari 3 - Ti Biblia (1973)

Ti panagcasar ni Salomon. Ti cararagna idiay Gabaon ken ti sungbat ti Dios. Ti nainsiriban a panangocom ni Salomon.

¹ Ket ni Salomon nakicabagian ken Faraon nga ari ti Egipto; ket innalana nga asawa ti anac ni Faraon, ket isu ti incuyogna iti ili ni David idi a nalpasnan a pinutar ti bucodna a balay, ken ti balay ni Jehova, ken ti bacud ti Jerusalem iti agliclicmut.

² Isuna laeng a dagiti tattao nagidatonda cadagiti nangato a disdisso, ta awan ti balay a naputar iti nagan ni Jehova agingga cadagita nga aldaw.

³ Ket ni Salomon inayatna ni Jehova a nagnagna cadagiti al-alagaden ni David nga amana: isuna laeng nga isu nagidaton ken nagpuur ti incienso cadagiti nangato a disdisso.

⁴ Ket ti ari napan sadi Gabaon a mangidaton sadiay; ta daydiay isu ti cangronaan a nangato a disso: sangaribu a datdaton a napuuran ti indatag ni Salomon iti rabaw daydiay nga altar.

⁵ Idiay Gabaon ni Jehova nagparang ken Salomon iti maysa a tagtagainep iti rabii; ket ti Dios kinunana, Kiddawem ti itedconto kenca.

⁶ Ket ni Salomon kinunana, Sica impakitam ken adipenmo a David nga amac ti dackel a kinaimbag, a mayalubog iti pannagnana iti sangom iti kinapudno, ken iti kinalinteg, ken iti kinasingpet ti puso a kimmuyog kenca; ket inicutam a maipaay kencuana daytoy dackel a kinaimbag, ta isu ti iniccam iti maysa nga anac nga agtugaw iti tronona, a cas ita nga aldaw.

⁷ Ket ita, O Jehova a Diosco, sica inaramidmo ti adipenmo iti saad ni David nga amac; ket maysaac nga ubing laeng; diac ammo no casano ti iruruar wenno iseserrec.

⁸ Ket ti adipenmo adda iti tengnga ti ilim a pinilim, a maysa nga ili a dackel, nga isu ti saan a mabilangen ken mapocpoc agsipud iti kinaruay.

⁹ Iccam ngarud ti adipenmo iti maysa a mannacaawat a puso nga agocom iti ilim, tapno mabalinco nga ilasin ti naimbag ken ti dakes; ta siasino ti macabalin ita nga aldaw nga agocom iti daytoy dackel nga ilim?

¹⁰ Ket ti bitla inayat ti Apo, ta ni Salomon kiniddawna daytoy a banag.

¹¹ Ket ti Dios kinunana kencuana, Agsipud ta kiniddawmo daytoy a banag, ket dica dinawat a maipaay kenca met laeng ti atiddug a biag, ken dica dinawat a maipaay kenca met laeng dagiti sanicua, ken dica dinawat ti biag dagiti cabusormo, no di ket dinawatmo a maipaay kenca met laeng ti pannacaawat tapno mailasinmo ti kinalinteg;

¹² Adtoy, siac inaramidco ti cas ti saom: adtoy iniccanca iti maysa a masirib ken mannacaawat a puso; iti casta nga awan pay ti cas kenca nga immuna ngem sica, uray iti calpasam awan tumacderto a capadam.

¹³ Ken iniccanca pay ti dica kiniddaw, ti sanicua ken dayaw nga agpadpada, iti casta nga awanto cadagiti ari ti cas kenca, cadagiti amin nga aldawmo.

¹⁴ Ket no magnacanto cadagiti daldalanco, a salimetmetam dagiti linlintegco ken dagiti bilbilinco, a cas pannagna idi ni David nga amam, iti casta paatiddugecto dagiti aldawmo.

¹⁵ Ket ni Salomon nagriing; ket adtoy, isu ti maysa a tagtagainep: ket isu nagsubli sadi Jerusalem, ket nagtacder iti sango ti lacasa ti tulag ni Jehova, ket nangidatag cadagiti datdaton a mapuuran, ken nangirucbab cadagiti datdaton ti cappia, ket nangaramid ti maysa a rambac cadagiti amin nga ad-adipenna.

¹⁶ Idi idiay napan ti dua a babai a balangcantis iti ari, ket nagtacderda iti sangona.

¹⁷ Ket ti maysa a babai kinunana, O, apoc, siac ken daytoy a babai agnaedcami iti maysa a balay; ket isu caduac idi iti balay idi a nangipasngayac iti maysa nga anac.

¹⁸ Ket napasamac iti maicatlo nga aldaw iti calpasan ti panagpasngayco, daytoy a babai nagpasngay met; ket dacami agcaduacami; awan ti sabali iti balay, malacsid cadacami a dua iti balay.

¹⁹ Ket ti anac daytoy a babai natay iti rabii, ta isu ti naaddaganna.

²⁰ Ket isu bimmangon iti tengnga ti rabii, ket innalana ti anacco a lalaki iti dennac, iti bayat a matmaturog ti adipenmo, ket isu ti impaiddana iti saclotna ket impaiddana ti anacna a natay iti saclotco.

²¹ Ket idi bimmangonac iti agsapa tapno pasusoec ti anacco, adtoy, natayen; ngem idi namingmingacon iti bigat, adtoy, saan nga isu idi ti anacco nga impasngayco.

²² Ket ti maysa a babai kinunana, Saan; no di ket ti anacco ti nabiag, ket ti natay isu ti anacmo. Ket daytoy kinunana, Saan; no di ket ti natay isu ti anacmo, ket ti nabiag isu ti anacco, castoy ti panagsaoda iti sango ti ari.

²³ Idin kinuna ti ari, Ti maysa cunana, Daytoy nabiag isu ti anacco, ket ti anacmo isu ti natay: ket ti sabali cunana, Saan; no di ket ti anacmo isu ti natay, ket ti anacco isu ti nabiag.

²⁴ Ket kinuna ti ari, Yalaandac iti maysa a campilan: ket nangipanda iti maysa a campilan iti sango ti ari.

²⁵ Ket kinuna ti ari, Gudduaem ti ubing a nabiag, ket itedmo ti gudua iti maysa, ket ti gudua iti sabali.

²⁶ Idin nagsao ti babai nga akin-anac idi ubing a nabiag iti ari, ta ti pusona naibuyog iti anacna, ket isu kinunana, O apoc, itedmo kencuana ti nabiag nga ubing, iti uray casano dica patayen. Ngem ti sabali kinunana, Saanto nga agpaay caniac wenno kenca; isu gudduaem.

²⁷ Idin ti ari simmungbat ket kinunana, Itedyo kencuana ti nabiag nga ubing, ket uray casano dica papatayen: isu ti inana.

²⁸ Ket ti amin nga Israel nangngegna ti maipapan iti panangocom nga inkeddeng ti ari; ket isuda nagbutnganda ti ari: ta isuda nakitada ti sirib ti Dios nga adda kencuana, nga agaramid iti kinajusticia.