1 Ar-ari 12 - Ti Biblia (1973)

Ni Roboam agari; surotenna ti dakes a patigmaan. Ti yaalsa ti Israel. Ni Jeroboam maaramid nga arida. Ti Dios iparitna ti panaggubat ti Israel ken Juda. Dagiti dakes a panagdayaw nga intuyang ni Jeroboam.

¹ Ket ni Roboam napan sadi Siquem: ta amin nga Israel napan sadi Siquem tapno isu ti aramidenda nga ari.

² Ket naaramid, idi a ni Jeroboam nga anac ni Nabat nangngeganna (ta isu adda pay laeng sadi Egipto, isu a nagtarayanna idi a naggapu iti sango ni ari Salomon, ket ni Jeroboam nagyan sadi Egipto,

³ Ket isuda nagbaonda ken isu inayabanda), a ni Jeroboam ken ti amin a gimong ti Israel napanda, ket nagsaoda ken Roboam, a kinunada,

⁴ Ni amam inaramidna ti sangolmi a nadagsen: ita ngarud aramidem a nalaglag-an ti nadagsen a panagservi ken amam, ken ti nabantut a sangolna isu nga insangolna cadacami, ket dacami agservicamto kenca.

⁵ Ket isu kinunana cadacuada, Pumanawcayo pay iti tallo nga aldaw, calpasanna umaycayo manen caniac. Ket dagiti tattao pimmanawda.

⁶ Ket ni ari Roboam nakiuman cadagiti lallacay a nagtacder iti sango ni Salomon nga amana idi a sibibiag pay laeng, a kinunana, Ania a patigmaan ti itedyo caniac tapno maited a sungbat iti daytoy nga ili?

⁷ Ket isuda nagsaoda kencuana, a kinunada, No sica ti maysa nga adipen iti daytoy nga umili ita nga aldaw, ket agservicanto cadacuada, ket sungbatam ida, ket agsaoca cadagiti naimbag a sasao cadacuada, ti casta isudanto ti adipenmo nga agnanayon.

⁸ Ngem isu binay-anna ti patigmaan dagiti lallacay isu nga intedda, ket nakiuman cadagiti agtutubo a lallaki isuda a dimmackel a caduana, isuda a nagtacder iti sangona.

⁹ Ket isu kinunana cadacuada, Ania a patigmaan ti itedyo, tapno maisublitayo coma ti sungbat iti daytoy nga umili, isu a nagsao caniac a kinunana, Aramidem a nalaglag-an ti sangol isu a ni amam insangolna cadacami?

¹⁰ Ket dagiti agtutubo a lallaki isuda a dimmackel a caduana nagsaoda kencuana, a kinunada, Castoy ti cunaem itoy nga umili a nagsao kenca, a kinunana, Ni amam inaramidna ti sangolmi a nabantut, ngem isu ti aramidem a nalaglagan cadacami; castoy ti masaomto cadacuada, Ti kikitco napuspuscol ngem dagiti lomo ni amac.

¹¹ Ket nupay no ni amac pinarabawannacayo iti maysa a nadagsen a sangol, siac nayonacto ti sangolyo: ni amac sinaplitnacayo cadagiti pagbaot, ngem saplitencayto cadagiti manggagama.

¹² Iti casta ni Jeroboam ken ti amin nga ili napanda ken Roboam iti maicatlo nga aldaw, a cas imbilin ti ari, a kinunana, Umaycayo caniac manen iti maicatlo nga aldaw.

¹³ Ket ti ari simmungbat iti umili iti nagubsang unay, ket binay-anna ti patigmaan nga inted dagiti lallacay kencuana,

¹⁴ Ket sinaona cadacuada ti cas ti patigmaan dagiti agtutubo a lallaki, a kinunana, Ni amac inaramidna ti sangolyo a nadagsen, ngem siac nayonacto ti sangolyo: ni amac sinaplitnacayo cadagiti pagbaot, ngem siac saplitencayto cadagiti manggagama.

¹⁵ Iti casta ti ari dina impangag ti umili; ta isu ti maysa a banag a gapu ken Jehova, tapno mapasingkedanna ti saona, isu a ni Jehova sinaona iti pannacaaramat ni Ahias a Silonita ken ni Jeroboam nga anac ni Nabat.

¹⁶ Ket idi makita ti amin nga Israel a ti ari dina impangag ida, ti umili simmungbat iti ari, a kinunana, Ania ti bagimi ken David? awan met ti tawidmi iti anac ni Jesse: cadagiti toltoldayo, O Israel: ita kitaem ti bucbucodmo a balay, David. Iti casta ti Israel napan cadagiti toltoldada.

¹⁷ Ngem no maipanggep cadagiti annac ti Israel nga agnaed cadagiti il-ili ti Juda, ni Roboam nagari cadacuada.

¹⁸ Idi a casta ni ari Roboam imbaonna ni Adoram, nga adda iti ngatoen dagiti lallaki a mapolong; ket ti amin nga Israel isu inuborda a pinatay cadagiti batbato. Ket ni ari Roboam nagdardaras a limmugan iti luganna, tapno agtaray sadi Jerusalem.

¹⁹ Iti casta ti Israel immalsa a maibusor iti balay ni David inggana ita nga aldaw.

²⁰ Ket naaramid, idi nga amin nga Israel nangngegda a ni Jeroboam nagsubli, nga isuda nagbaonda ket isu pinaayabanda iti gimong, ket isu ti inaramidda nga ari iti amin nga Israel: awan simmurot iti balay ni David, no saan laeng a ti caputotan ni Juda.

²¹ Ket idi a ni Roboam napan sadi Jerusalem, isu tiniponna ti amin a balay ni Juda, ken ti caputotan ni Benjamin, a sangagasut walopulo a ribu a napili a lallaki, nga isuda dagiti gumugubat, tapno gubatenda ti balay ti Israel, tapno maisublida manen ti pagarian ken Roboam nga anac ni Salomon.

²² Ngem ti sao ni Jehova immay ken Semeias a lalaki ti Dios, a kinunana,

²³ Saoem ken Roboam nga anac ni Salomon, nga ari ti Juda, ken iti amin a balay ti Juda ken Benjamin, ken ti matda iti umili, a cunam,

²⁴ Castoy ti cuna ni Jehova, Dicayto sumang-at, ken dicayo met gubaten dagiti cacabsatyo nga annac ti Israel: agsubli ti tunggal lalaki iti balayna ta daytoy a banag gapu caniac. Iti casta isuda impangagda ti sao ni Jehova, ket nagsublida ket napanda iti dalanda, a mayannurot iti sao ni Jehova.

²⁵ Idin ni Jeroboam binangonna ti Siquem iti caturodan ti Efraim, ket nagnaed sadiay; ket isu rimmuar sadiay, ket binangonna ti Penuel.

²⁶ Ket ni Jeroboam kinunana iti pusona, Ita ti pagarian agsublinto iti balay ni David:

²⁷ No daytoy nga umili sumang-at a mangisaclang cadagiti datdaton iti balay ni Jehova sadi Jerusalem, iti casta ti puso daytoy nga umili agsublinto manen iti apoda, ken Roboam met laeng nga ari ti Juda: ket isuda papatayendacto, ket agsublidanto ken Roboam nga ari ti Juda.

²⁸ Gapuna a ti ari nakiuman, ket nangaramid ti dua a sinan-urbon a balitoc; ket isu kinunana cadacuada, Napalalo unay cadacayo ti isasang-at sadi Jerusalem: adtoy, dagiti didiosmo, O Israel, isuda a nangaon kenca iti daga ti Egipto.

²⁹ Ket isu incabilna ti maysa sadi Bet-el, ket ti sabali incabilna sadi Dan.

³⁰ Ket daytoy a banag naaramid a maysa a basol; ta ti umili napan tapno agrucbab iti sango ti maysa, agingga met laeng iti Dan.

³¹ Ket isu namutar cadagiti balbalay cadagiti nangato a disso, ket nangaramid cadagiti papadi a nagtaud iti amin nga umili, nga isuda dagiti saan nga annac ni Levi.

³² Ket ni Jeroboam nangornos iti maysa a fiesta iti maicawalo a bulan, iti maicasangapulo ket lima nga aldaw iti bulan, a cas iti fiesta nga adda iti Juda, ket isu simmang-at agingga iti altar; casta ti inaramidna sadi Bet-el, a nagdatdaton cadagiti sinan-urbon nga isu inaramidna: ket isu insaadna sadi Bet-el dagiti papadi dagiti nangato a disso nga inaramidna.

³³ Ket isu simmang-at agingga iti altar nga inaramidna sadi Bet-el iti maicawalo a bulan, iti bulan nga isu pinarbona iti pusona met laeng: ket isu nangornos iti maysa a fiesta a maipaay cadagiti annac ti Israel, ket simmang-at agingga iti altar, a nagpuur iti incienso.