1 Ar-ari 11 - Ti Biblia (1973)

Dagiti assawa ni Salomon ken ti panaglabsingna. Agpungtot ti Dios, ket bangonenna dagiti cabusor a da Adad nga Edomita, ken Razon a taga Soba, ken Jeroboam. Ti padto ni Ahias.

¹ Ngem ket di ni ari Salomon nagayat iti adu a gangannaet a babbai, agraman ti babai nga anac ni Faraon, bab-bai cadagiti Moabitas, Ammonitas, Edomitas, Sidonios, ken Heteos;

² Cadagiti nasnacion a maipanggep cadacuada ti nagcunaan ni Jehova cadagiti annac ti Israel: Dicayto mapan cadacuada, uray isuda didanto umay cadacayo; ta di bumurong nga isuda pagsubliendanto ta pusoyo a sumurot cadagiti didiosda: ni Salomon nadecket ti panagayatna cadagitoy.

³ Ket isu addaan idi iti pito gasut nga assawa, a princesas, ken tallo gasut a camalala; ket dagiti assawana pinagsublida ti pusona.

⁴ Ta naaramid, idi a ni Salomon lacayen, a dagiti assawana pinagsublida ti pusona a pinasurot cadagiti sabali a didios; ket ti pusona saan a nasin-aw ken Jehova a Diosna, a cas iti puso idi ni David nga amana.

⁵ Ta ni Salomon simmurot ken Astarot a babai a diosen dagiti Sidonios, ken simmurot ken Milcom ti kinarimon dagiti Ammonitas.

⁶ Ket ni Salomon inaramidna ti dakes iti imatang ni Jehova, ket saan a simmurot a naananay ken Jehova a cas inaramid ni David nga amana.

⁷ Iti casta ni Salomon namutar iti maysa a nangato a disso a maipaay ken Cemos ti kinarimon ti Moab, iti bantay nga adda iti sango ti Jerusalem, ken maipaay ken Moloc ti kinarimon dagiti annac ni Ammon.

⁸ Ken casta met nga inaramidna a maipaay cadagiti amin a gangannaet nga assawana, isuda a nagpupuur iti incienso ken nagdaton cadagiti didiosda.

⁹ Ket ni Jehova nacaunget ken Salomon, ta ti pusona naglicud ken Jehova, a Dios ti Israel, isu a nagparang kencuana a namindua.

¹⁰ Ken imbilinna kencuana ti maipanggep itoy a banag, nga isu dinto sumurot cadagiti sabali a didios: ngem isu saanna nga inannurot ti imbilin ni Jehova.

¹¹ Gapuna a ni Jehova kinunana ken Salomon, Agsipud ta naaramid dagitoy gapu kenca, ket dica sinalimetmetan ti tulagco ken dagiti ipapaalagadco, isuda nga imbilinco kenca, di-bumurong a siac pisangecto ti pagarian manipud kenca, ket itedconto iti adipenmo.

¹² Nupay casta cadagiti al-aldawmo diacto aramiden, gapu ken David nga amam: ngem pisangecto iti ima ti anacmo.

¹³ Ngem ket di diacto pigisen ti amin a pagarian; ngem itedconto ti maysa a caputotan iti anacmo, gapu ken David nga adipenco, ken gapu iti Jerusalem isu a pinilic.

¹⁴ Ket ni Jehova namangon iti maysa a cabusor ni Salomon, ni Adad nga Edomita: isu ti putot ti ari ti Edom.

¹⁵ Ta naaramid, idi adda ni David sadi Edom, ket ni Joab a capitan ti buyot simmang-at a mangitabon cadagiti natay, ket kinabilna amin dagiti lallaki ti Edom.

¹⁶ (Ta ni Joab ken ti amin nga Israel nagyanda sadiay iti innem a bulan, agingga iti naiccatna amin dagiti lallaki sadi Edom);

¹⁷ Ni Adad nagtaray, isu ken dadduma nga Edomitas cadagiti ad-adipen ni amana, a napan sadi Egipto, idinto a ni Adad ubing pay laeng.

¹⁸ Ket isuda timmacderda nanipud Madian; ket napanda sadi Paran; ket isuda nangalada ti lallaki a caduada manipud Paran, ket napanda sadi Egipto, ken Faraon nga ari ti Egipto, isu a nangted kencuana iti maysa a balay, ken nangdutoc kencuana ti taraon, ken nangted kencuana iti daga.

¹⁹ Ket ni Adad nacasarac iti dackel a parabur iti imatang ni Faraon, iti casta nga isu intedna kencuana nga asawa ti babai a cabagis ti asawana met laeng, ti cabagis ni Tafnes a reina.

²⁰ Ket ti cabagis ni Tafnes impasngayna kencuana ni Genubat nga anacna a lalaki, isu a ni Tafnes impusingna iti balay ni Faraon; ket ni Genubat adda idi iti balay ni Faraon a maicuyog cadagiti annac a lallaki ni Faraon.

²¹ Ket idi ni Adad nangngegna sadi Egipto a ni David nakiturogen cadagiti ammana, ket ni Joab a capitan ti buyot natayen, ni Adad kinunana ken Faraon, Palubusannac, tapno mapanac iti dagac met laeng.

²² Idi casta ni Faraon kinunana kencuana, Ngem ania ti nagcurangam caniac nga, adtoy, sica masapulmo ti mapan iti dagam met laeng? Ket isu insungbatna, Awan; ngem ket di palubusannac.

²³ Ket ti Dios namangon ti sabali a cabusor ni Salomon isu ni Rezon nga anac a lalaki ni Eliada, isu a nagtalaw ken apona nga Adad-ezer nga ari ti Soba.

²⁴ Ket isu nangurnong cadagiti lallaki, ket nagcapitan iti maysa a buyot, idi ni David pinatayna dagiti taga Soba: ket isuda napanda sadi Damasco, ket nagyanda sadiay, ken nagari sadi Damasco.

²⁵ Ket isu ti maysa a cabusor ti Israel cadagiti amin nga aldaw ni Salomon, sabali laeng ti kinadakes nga inaramid ni Adad: ket isu binusorna ti Israel, ket nagari sadi Siria.

²⁶ Ket ni Jeroboam nga anac a lalaki ni Nabat, a maysa nga Efraimita a taga Sereda, a maysa nga adipen ni Salomon, a ti nagan ti inana Serva, a maysa a balo, isu met intag-ayna ti imana a maibusor iti ari.

²⁷ Ket daytoy isu ti gapu ti nangitagayanna iti imana a maibusor iti ari: Ni Salomon binangonna ti Millo, ket tinarimaanna ti dadael ti ili ni David nga amana.

²⁸ Ket ti lalaki a ni Jeroboam isu ti maysa a lalaki a mannacabalin ken maingel; ket ni Salomon nakitana ti bumaro a lalaki nga isu ti nagaget, ket isu iniccanna iti akem iti amin a trabajo ti balay ni Jose.

²⁹ Ket naaramid idi a tiempo, a ni Jeroboam rimmuar sadi Jerusalem, nga isu nasaracan ni mammadto nga Ahias a Silonita iti dalan; ket ni Ahias insibbona ti maysa a baro a cawes; ket isuda a dua agwaywayasda iti away.

³⁰ Ket ni Ahias kinapetna ti baro a cawes nga adda kencuana, ket isu ti pinigisna iti sangapulo ket dua a carigis.

³¹ Ket isu kinunana ken Jeroboam, Alaem ti sangapulo a carigis; ta castoy ti kinuna ni Jehova, a Dios ti Israel, Adtoy, siac pigisecto ti pagarian iti ima ni Salomon, ket itedconto ti sangapulo a caputotan kenca.

³² (Ngem addanto kencuana ti maysa a caputotan, a gapu ken adipenco a David ken gapu iti Jerusalem, ti ili a pinilic cadagiti amin a caputotan ti Israel);

³³ Agsipud ta isuda binaybay-andac, ket nagrucbabda ken ni Astarot a babai a diosen dagiti Sidonios, ken ni Cemos a diosen ti Moab, ken ni Milcom a diosen dagiti annac ni Ammon: ket isuda saanda a nagna cadagiti daldalanco, tapno aramidenda ti nalinteg cadagiti matmatac, ken tapno salimetmetanda dagiti ipapaalagadco ken dagiti linlintegco, a cas inaramid ni David nga amana.

³⁴ Nupay casta diacto alaen ti amin a pagarian iti imana; ngem isu aramidecto a principe cadagiti amin nga aldaw ti panagbiagna, gapu ken adipenco a David isu a pinilic, a nangsalimetmet cadagiti bilbilinco ken cadagiti ipapaalagadco;

³⁵ Ngem alaecto ti pagarian iti ima ti anacna, ket itedconto kenca, isu dagiti sangapulo a caputotan.

³⁶ Ket iti anacna itedconto ti maysa a caputotan, tapno ni David nga adipenco adda maysa a pagsilawanna nga agnanayon iti sangoc sadi Jerusalem, ti ili a pinilic tapno icabilco ti naganco sadiay.

³⁷ Ket sica ti alaecto, ket agaricanto a cas iti amin a tarigagayan ti cararuam, ket agaricanto iti Israel.

³⁸ Ket castoyto, no ipangagmonto ti amin nga ibilinco kenca, ket magnacanto cadagiti daldalanco, ket aramidem ti nalinteg cadagiti matac, a salimetmetam dagiti ipapaalagadco ken dagiti bilbilinco, a cas inaramid ni David nga adipenco; a siac addaacto kenca, ket ibangonancanto iti maysa a namayengmeng a balay a cas panamangonco ti maipaay ken David, ket itedconto ti Israel kenca.

³⁹ Ket siac gapu itoy parigatecto ti putot ni David, ngem saan nga agnanayon.

⁴⁰ Ni Salomon inagawaanna ngarud a papatayen ni Jeroboam; ngem ni Jeroboam timmacder, ket nagtaray sadi Egipto, ken ni Sisac nga ari ti Egipto, ket adda sadi Egipto inggana iti ipapatay ni Salomon.

⁴¹ Ket ti nabati cadagiti ar-aramid ni Salomon, ken amin ti inaramidna, ken ti kinasiribna, saanda aya a naisurat iti libro dagiti ar-aramid ni Salomon?

⁴² Ket ti bayat ti panagari ni Salomon iti amin nga Israel uppat a pulo a tawen.

⁴³ Ket ni Salomon nakiturog cadagiti ammana, ket isu naitabon iti ili ni David nga amana: ket ni Roboam nga anacna nagari iti saadna.