1 Ar-ari 10 - Ti Biblia (1973)

Ti isasarungcar ti reina sadi Saba, mayeg nga aggapu sadi Ophir. Ti kinabacnang ken kinadayag ni Salomon. Dagiti luglugan ken cabcabayona.

¹ Ket idi a ti reina sadi Saba nangngeganna ti dayaw ni Salomon a maipanggep iti nagan ni Jehova, isu napan a mangsuut kencuana cadagiti naricut a saludsud.

² Ket isu napan sadi Jerusalem agraman naruay unay a cacuyogna, agraman camcamello a nagawit cadagiti recrecado, ken adu unay a balitoc, ken napateg a batbato; ket idi isu nacagteng ken Salomon, isu impalawagna kencuana ti amin nga adda iti pusona.

³ Ket ni Salomon simmungbat kencuana cadagiti amin a saludsudna: awan ti uray-ania a nailemmeng iti ari a dina sinungbatan kencuana.

⁴ Ket idi a ti reina sadi Saba nakitana ti amin a kinasirib ni Salomon, ken ti balay a pinutarna,

⁵ Ken ti canen iti lamesaanna, ken ti panagtutugaw dagiti ad-adipenna, ken ti panagtatacder dagiti ministrona, ken dagiti cawesda, ken dagiti coperona, ken ti ulianna isu a pagnaanna a mapan iti balay ni Jehova; awanen ti bileg kencuana.

⁶ Ket kinunana iti ari, Napudno a damag ti nangngegac iti dagac met laeng a maipapan cadagiti ar-aramidmo, ken iti kinasiribmo.

⁷ Nupay casta diac pinati dagiti sasao, agpapan yaayco, ket isu ti nakita dagiti matac: ket, adtoy, ti cagudua saan a naibaga caniac; ti kinasiribmo ken ti kinarang-aymo labsanda ti dayaw a nangngegac.

⁸ Nagasat dagiti lallakim, nagasat dagitoy ad-adipenmo, a tumacder a cancanayon iti sangom, ken macangcangngeg iti kinasiribmo.

⁹ Bendito ni Jehova a Diosmo, a maparagsacan kenca, a mangisaad kenca iti trono ti Israel: gapu ta ni Jehova inayatna ti Israel nga agnanayon, gapuna nga inaramidnaca nga ari, tapno agaramidca ti kinajusticia ken kinalinteg.

¹⁰ Ket isu nangted iti ari ti sangagasut ket duapulo a talento a balitoc, ken recrecado a nagwadwad, ken napateg a batbato: uray caanoman awanen ti dimteng a recrecado a casta nagwadwad a cas cadagitoy nga inted ti reina sadi Seba ken ari Salomon.

¹¹ Ket castamet dagiti sasacayan ni Hiram, a nagawit iti balitoc a naggapu sadi Ofir, nagawitda a naggapu sadi Ofir iti dackel a kinawadwad dagiti caycayo nga almug ken napateg a batbato.

¹² Ket ti ari inaramidna dagiti caycayo nga almug nga adadigi a maipaay iti balay ni Jehova, ken maipaay iti balay ti ari, ar-arpa met ken salsalterio a maipaay cadagiti cumacanta: uray caanoman awan pay dimteng a casta a caycayo nga almug, ken awan pay a nakita, agpapan ita nga aldaw.

¹³ Ket ni ari Salomon intedna ken reina sadi Saba ti amin a kinayatna, aniaman a kiniddawna, sabali laeng daydiay naarian a parabur nga inted ni Salomon kencuana. Iti casta isu nagsubli ket napan iti bucodna a daga, isu ken dagiti adipenna.

¹⁴ Ket ti timbeng ti balitoc a dimteng ken Salomon iti macatawen innem a gasut innem a pulo ket innem a talento a balitoc,

¹⁵ Malacsid ti naggapu cadagiti agtagtagilaco, ken iti panagbiroc dagiti agbaniaga ken amin cadagiti ar-ari dagiti naglalaoc a tattao, ken cadagiti gobgobernador ti daga.

¹⁶ Ket ni ari Salomon nangaramid cadagiti dua gasut a sarapa a pinitpit a balitoc; innem a gasut a siclo a balitoc ti napan iti maysa a sarapa.

¹⁷ Ken isu nangaramid iti tallo gasut a calasag a pinitpit a balitoc; tallo a libra a balitoc ti napan iti maysa a calasag: ket ti ari incabilna ida iti balay a nabakir iti Libano.

¹⁸ Casta met a ti ari nangaramid ti maysa a dackel a trono a marfil, ket isu ti kinalupcupanna iti casusudian a balitoc.

¹⁹ Adda innem a tucad ti trono, ket ti toctoc ti trono nagbukel iti licud; ket adda im-ima iti agsinnombangir a sikigan iti pagtugawan, ken dua a sinan-leon ti nacatacder iti abay dagiti ima.

²⁰ Ken sangapulo ket dua a sinan-leon ti nacatacder idiay rabaw dagiti innem a tucad iti agsumbangir a sikigan: awan naaramid a capadana iti uray sadino a pagarian.

²¹ Ket amin dagiti al-alicamen a paginuman ni ari Salomon balitocda, ket amin dagiti al-alicamen ti balay a nabakir iti Libano pulosda a balitoc: awan ti pirac; isu ti awan aniaman a pategna cadagiti aldaw ni Salomon.

²² Ta ti ari addaan idiay baybay iti maysa a bunggoy dagiti sasacayanna sadi Tarsis a cadua dagiti bunggoy dagiti sasacayan ni Hiram: maminsan iti tallo a tawen sumangpet ti bunggoy dagiti sasacayan sadi Tarsis, a mangisangpet iti balitoc, ken pirac, marfil, ken bakes, ken pavoreal.

²³ Iti casta ni ari Salomon atiwenna amin dagiti ar-ari ti daga iti kinabacnang ken iti kinasirib.

²⁴ Ket ti amin a daga inagagawaanda a makita ti saclang ni Salomon, tapno mangngegda ti kinisiribna, nga incabil ti Dios iti pusona.

²⁵ Ket isuda nangyegda tunggal maysa cadagiti sagutna, al-alicamen a pirac, ken al-alicamen a balitoc, ken cawes, ken igam, ken recrecado, cabcabayo, ken mulmulo, tunggal kita iti tinawentawen.

²⁶ Ket ni Salomon inurnongna dagiti luglugan ken lallaki nga agcabcabayo: ket adda kencuana idi sangaribu ket uppat a gasut a luglugan, ken sangapulo ket dua a ribu a lallaki nga agcabcabayo, nga isu incabilna cadagiti ili dagiti luglugan, ken agraman iti ari idiay Jerusalem.

²⁷ Ket ti ari inaramidna a ti pirac idiay Jerusalem cas la cadagiti bato, ket dagiti cayo a cantingen isu inaramidna a cas la cadagiti caycayo a sicomoro nga adda iti nababa a daga, a gapu iti kinaruayda.

²⁸ Ket dagiti cabcabayo nga adda idi ken Salomon naalada a naggapu sadi Egipto; ket dagiti pagbaniagaen ti ari isuda dagiti nangawat cadacuada iti pinangen, tunggal pangen iti maysa a pateg.

²⁹ Ket maysa a lugan sumang-at ken rumuar sadi Egipto a gapu iti innem a gasut a siclo a pirac, ket maysa a cabayo iti sangagasut ket limapulo; ket casta ti maipaay cadagiti amin nga ar-ari dagiti Heteo, ken ti maipaay cadagiti ar-ari ti Siria, inruarda ida a gapu iti pannacaaramatda.