1 Ar-ari 1 - Ti Biblia (1973)

Ti kinalacay ni David. Ni Adonia panggepenna ti agari. Ti panagdawat ni Bat-seba. Ni Salomon mapulotan nga agari. Ni Adonia agbuteng, ngem ni Salomon isakitna ti biagna.

¹ Ket ni ari David lacayen ken napacsuyanen cadagiti tawenna; ket isu binongonda cadagiti luplupot, ngem saan a pimmudot.

² Gapuna a kinuna dagiti adipenna kencuana: Isapulan ti ari nga apoc iti maysa a balasang a virgen: ket isu agtacder coma iti sango ti ari, ken agservi kencuana, ket agidda iti saclotna, tapno ti ari nga apoc mapudutan.

³ Iti casta nagsapuda iti maysa a balasang a naimnas cadagiti amin a sacup ti Israel, ket nasaracanda ni Abisag a Sunamita, ket isu impanda iti ari.

⁴ Ket ti balasang naimnas unay idi; ket nagservi iti ari, ken nagannong kencuana; ngem isu saan a tinignay ti ari.

⁵ Idin ni Adonia nga anac ni Haguit intan-ocna ti bagina met laeng, a kinunana: Siac ti agari: ket nangisagana cadagiti luglugan, ken lallaki nga agcabayo, ken limapulo a lallaki nga agtaray iti sangoananna.

⁶ Ket saan a pinaliday ni amana uray caano iti panagcunana: Apayapay nga inaramidmo ti casta? Ket nataer met unay a lalaki; ket nayanac a sumaganad ken ni Absalom.

⁷ Ket nakisao cada Joab nga anac a lalaki ni Sarvia, ken Abiatar a padi; ket idinto a sinurotda ni Adonia isu ti tinulonganda.

⁸ Ngem ni Sadoc a padi, ken ni Banaya nga anac a lalaki ni Joiada, ken ni Natan a mammadto, ken ni Semei, ken ni Reihi, ken dagiti mamaingel a lallaki nga adda idi ken David saanda a kimmanunong ken Adonia.

⁹ Ket ni Adonia nagparti cadagiti carcarnero ken vacvaca ken dagiti pinalucmeg iti denna ti bato ti Zohelet, nga adda iti denna ti En-rogel; ket inawisna amin dagiti cacabsatna nga annac a lallaki ti ari, ken amin dagiti lallaki ti Juda nga ad-adipen ti ari:

¹⁰ Ngem ni Natan a mammadto, ken ni Banaya, ken dagiti mamaingel a lallaki, ken ni Salomon a cabsatna, saanna ida nga inawis.

¹¹ Idin ni Natan nakisao ken Bat-seba nga ina ni Salomon, a cunana, Dica aya nangngegan nga agari ni Adonia nga anac ni Haggit, ket ni David nga apotayo dina naammoan?

¹² Ita ngarud umayca, dawatec kenca, a palubusannac a bagbagaanca, tapno mabalinmo nga ispalen ti biagmo met laeng ken ti biag ni anacmo a Salomon.

¹³ Inca ket sumrecca ken ari David, ket cunaem kencuana, O ari nga apoc, Dica aya sinapataan iti adipenmo, a kinunam, Pudno unay a ni Salomon nga anacmo agarinto iti calpasac, ket isu agtugawto iti tronoc? apayapay ngarud a ni Adonia agari?

¹⁴ Adtoy, iti bayat nga agsasaoca pay laeng idiay iti ari, siac met sumrecacto a sumaruno kenca, ket panecnecacto dagiti sasaom.

¹⁵ Ket ni Bat-seba napan simrec iti ari iti siled: ket ti ari lacayen unay idi; ket ni Abisag a Sunamita aganannong idi iti ari.

¹⁶ Ket ni Bat-seba nagrucnoy, ket nagrucbab iti ari. Ket ti ari kinunana, Ania ti cayatmo?

¹⁷ Ket isu kinunana kencuana, Apoc sica insapatam gapu ken Jehova a Diosmo iti adipenmo, a kinunam, Pudno unay a ni Salomon nga anacmo agarinto iti calpasac, ket isu agtugawto iti tronoc.

¹⁸ Ket ita, adtoy, ni Adonia agari; ket sica, O ari nga apoc, dica naammoan:

¹⁹ Ket isu nagparti cadagiti vacvaca ken cadagiti pinalucmeg ken carcarnero iti nawadwad, ket inawisna amin dagiti anac ti ari, ken ni Abiatar a padi, ken ni Joab a capitan ti buyot; ngem ni Salomon nga adipenmo dina inawis.

²⁰ Ket sica, O ari nga apoc, dagiti matmata ti amin nga Israel sikikitada kenca, tapno ibagam cadacuada no siasino ti agtugawto iti trono ti ari nga apoc iti calpasanna.

²¹ No saan mapasamacto, no ti ari nga apoc makiturogton cadagiti ammana, a siac ken ni anacco a Salomon maibilangcamto a macadadael.

²² Ket, adtoy, iti bayat nga agsasao pay laeng iti ari, ni Natan a mammadto simrec.

²³ Ket imbagada iti ari, a kinuna, Adtoy, ni Natan a mammadto. Ket idi nacastrec iti sango ti ari inrucnoyna met ti rupana iti baba iti sango ti ari.

²⁴ Ket ni Natan kinunana, O ari nga apoc, kinunam aya, Ni Adonia agarinto iti calpasac, ket isu agtugawto iti tronoc?

²⁵ Ta isu simmalog ita nga aldaw, ket nagparti cadagiti vacvaca ken dagiti pinalucmeg ken carcarnero iti nawadwad, ket inawisna amin dagiti anac ti ari, ken dagiti cacapitan ti buyot, ken ni Abiatar a padi; ket, adtoy, isuda mangmangan ken agiinumda iti sangona, ket cunada, Agbiag coma a manayon ni ari Adonia.

²⁶ Ngem siac, siac nga adipenmo, ken ni Sadoc a padi, ken ni Banaya nga anac a lalaki ni Joiada, ken ni Salomon nga adipenmo, dinacami inawis.

²⁷ Daytoy a banag naaramid aya gapu iti ari nga apoc, ket dica impakita cadagiti ad-adipenmo no siasino ti agtugaw iti trono ti ari nga apoc iti calpasanna?

²⁸ Idin ni ari David simmungbat ket kinunana: Ayabam caniac ni Bat-seba. Ket isu simrec iti sango ti ari, ket nagtacder iti sango ti ari.

²⁹ Ket ti ari nagsapata, ket kinunana, Cas ni Jehova sibibiag, isu a nanubbot ti cararuac iti amin a pacarigatan,

³⁰ Pudno unay a cas insapatac kenca gapu ken Jehova a Dios ti Israel, a kinunac, Ni Salomon nga anacmo agarinto a di bumurong iti calpasac, ket isu agtugawto iti tronoc iti saadco; pudno unay a casta ti aramidecto ita nga aldaw.

³¹ Idin ni Bat-seba inrucnoyna ti rupana iti baba, ket nagrucbab iti ari, ket kinunana, Agbiag coma ni ari David nga apoc iti agnanayon.

³² Ket ni ari David kinunana, Ayabanyo caniac ni Sadoc a padi, ken ni Natan a mammadto, ken ni Banaya nga anac a lalaki ni Joiada. Ket isuda simrecda iti sango ti ari.

³³ Ket ti ari kinunana cadacuada: Icuyogyo cadacayo dagiti ad-adipen ti apoyo, ket pasacayenyo ni Salomon nga anacco iti mulo a cucuac, ket isu isalogyo sadi Gihon:

³⁴ Ket isu ti pulotan coma sadiay ni Sadoc a padi ken ni Natan a mammadto nga agari iti Israel; ket pagunienyo ti tangguyob, ket cunayo, Agbiag coma a manayon ni ari Salomon.

³⁵ Calpasanna sumang-atcayto iti licudanna, ket umayto ket agtugawto iti tronoc; ket agarinto iti saadco; ta isu ti dinutocco a pangolo iti Israel ken iti Juda.

³⁶ Ket ni Banaya nga anac ni Joiada simmungbat iti ari, ket kinunana, Sapay coma: ni Jehova a Dios ti ari nga apoc, cunaenna coma ti casta met.

³⁷ No casano ti caadda idi ni Jehova iti ari nga apoc, casta met coma ti caaddana ken Salomon, ket aramidenna coma ti tronona a dacdackel ngem iti trono ti apoc nga ari David.

³⁸ Iti casta ni Sadoc a padi, ken ni Natan a mammadto, ken ni Banaya nga anac ni Joiada, ken dagiti Cereteos ken dagiti Peleteos, simmalogda, ket pinasacayda ni Salomon iti mulo ni ari David, ket isu impanda sadi Gijon.

³⁹ Ket ni Sadoc a padi nangala iti sangasara a lana iti Tabernaculo, ket pinulotanna ni Salomon. Ket isuda pinagunida ti tangguyob; ket amin dagiti tattao kinunada, Agbiag coma a manayon ni ari Salomon.

⁴⁰ Ket amin dagiti tattao simmang-atda iti licudanna, ket dagiti tattao nagpagunida cadagiti flauta, ken nagragragsacda iti dackel a ragsac, iti casta ti daga nagrengngat gapu iti unida.

⁴¹ Ket ni Adonia ken amin dagiti naawis nga adda kencuana nangngegda idi a lepleppasda a nangan. Ket idi nangngeg ni Joab ti aweng ti tangguyob, kinunana: Ania ti gapuna nga adda daytoy nga aweng ti ili nga agariwawa?

⁴² Iti bayat nga agsasao pay laeng, adtoy, ni Jonatan nga anac ni Abiatar a padi dimteng: ket ni Adonia kinunana, Sumrecca; ta lalakica a maicari, ket mangyegca cadagiti naimbag a damdamag.

⁴³ Ket ni Jonatan simmungbat ket kinunana ken Adonia, Pudno unay a ni ari David nga apotayo pinagarina ni Salomon:

⁴⁴ Ket ti ari imbaonna a caduana ni Sadoc a padi, ken ni Natan a mammadto, ken ni Banaya nga anac ni Joiada, ken dagiti Cereteos ken dagiti Paleteos; ket isu ti pinasacayda iti mulo ti ari;

⁴⁵ Ket ni Sadoc a padi ken ni Natan a mammadto isu pinulotanda nga ari; idiay Gihon ket manipud sadiay simmang-atda a siraragsac, iti casta a ti ili nagcallangugan. Daytoy ti aweng a nangngegyo.

⁴⁶ Ket ni Salomon met agtugtugaw iti trono ti pagarian.

⁴⁷ Ket maysa pay dagiti adipen ti ari immayda tapno bendicionanda ni ari David nga apotayo, a kinunada, Ti Diosmo aramidenna coma ti nagan ni Salomon a naimimbag ngem iti naganmo, ken aramidenna coma ti tronona a dacdackel ngem iti tronom: ket ti ari nagrucob iti pagiddaan.

⁴⁸ Ket castoy met ti kinuna ti ari, Madaydayaw coma ni Jehova a Dios ti Israel, isu a nangted ti maysa nga agtugaw iti tronoc ita nga aldaw, nga isu ti makita dagiti matac met laeng.

⁴⁹ Ket amin dagiti inawis ni Adonia nagkigtotda, ket timmacderda, ket napan ti tunggal lalaki iti dalanna.

⁵⁰ Ket ni Adonia nagbuteng gapu ken Salomon; ket timmacder, ket napan, ket kimpet cadagiti sarsara ti altar.

⁵¹ Ket naibaga ken Salomon, a nacuna, Adtoy, ni Adonia sibubuteng ken ari Salomon; ta adtoy, isu kimpet cadagiti sarsara ti altar, a cunana, Isapata coma caniac ni ari Salomon nga umuna a dinanto papatayen ti adipenna iti campilan.

⁵² Ket ni Salomon kinunana, No isu agparangto a maicari a lalaki, awanto ti matnag a maysa a boocna iti daga; ngem no masaracan ti kinadakes kencuana, matayto.

⁵³ Iti casta ni ari Salomon nagbaon, ket isu inyulogda manipud iti altar. Ket isu napan ket nagrucbab ken ari Salomon; ket ni Salomon kinunana kencuana, Inca iti balaymo.