2 TIMOTEO 1 - Tatuyo: Dio Wadarique

Pablo escribe a Timoteo

^1-2 Yʉ Pablo ati pũuro mʉ yʉ uca joo Timoteore. Jesucristo cʉ ca-queti buio joo rotii yʉ ãa Dio cʉ ca-boorore bairo. “To cãnacã rʉmʉ catícõa aninucupere na yʉ joogʉ Jesure ca-apiʉjarãre,” ca-ĩiñupi Dio. Cʉ ca-ĩricarore bairona buio rotii yʉre ca-queti buio joo rotiwĩ. To bairi petoacã mʉ yʉ queti buiopa ati pũuro jʉgori. Yʉ macʉre bairona mʉ yʉ mai tʉjʉ. Caroa majuu mʉre cʉ joato mani Pacʉ Dio. Mani Ʉpaʉ Jesucristo mena caroare mʉre cʉ joato. Mʉre cʉ mai tʉjʉato. Caroaro ani yeri wariñuurique quenare mʉre cʉ joato.

Dando testimonio de Cristo

³ To cãnacã ni Diore jeni nʉcʉbʉgori mʉre yʉ tʉgooñanucu. Mʉre tʉgooñari, “Caroaro jãare mʉ átibojanucu,” Diore cʉ yʉ ĩinucu. Ñami, ʉmʉreco quenare Diore mʉ yʉ jenibojanucu. Yʉ ñicʉ jãa Diore na ca-nʉcʉbʉgoricarore bairo yʉ quena cʉ̃re yʉ nʉcʉbʉgo. To bairi Dio mena yʉ cá-áti aninucurije tʉgooñarique pairique manona yʉ anicõa.

⁴ Mʉre yʉ cá-aáweori paʉ mʉ ca-yapapuarore, mʉ ca-otirore yʉ tʉgooñanucu. To bairi seeto mʉ yʉ tʉjʉgacʉpʉ, cʉ tʉjʉʉ yʉ wariñuu anigʉ ĩi.

⁵ Diore cariape mʉ ca-tʉgooña nʉcʉbʉgorijere yʉ tʉgooña. Mʉ ñico Loida, mʉ paco Eunice quena mʉ jʉgoye Diore ca-tʉgooña nʉcʉbʉgoyupa. To bairi, “Cʉ paco jãare bairo Diore tʉgooña nʉcʉbʉgonucumi Timoteo quena,” yʉ ĩi maji.

⁶ To bairi Diore mʉre jeniboja, mʉre yʉ ca-ñiga peoro Jesu ye quetire buio majiriquere mʉ ca-jooyupi Dio. To bairi mʉre cʉ ca-buio majiorica wame tʉgooñari caroaro áticõa aninucuña mʉre cʉ cá-áti rotirica wamere.

⁷ Dio maca tʉgooña uwiriquere mani ca-jooquẽmi. Tʉgooña ocabʉtirique macare mani ca-joowĩ. Ame mairique quenare mani ca-joowĩ. Maja catírique quenare mani ca-joowĩ Dio.

⁸ To bairi mani Ʉpaʉ Jesu ye quetire aperãre na buio boboqueticõaña mʉa, Timoteo. Yʉ quenare Jesu ye quetire yʉ ca-buio teñarique wapa presopʉ yʉ ca-aniere bobo tʉgooñaqueticõaña. Mʉ quenare mʉ popiyeyegarãma, Jesu ye queti mʉ ca-buioro booquẽna. Mʉre na ca-popiyeyerije to ca-anibato quena Jesu ye quetire buiocõa aninucuña. To bairo mʉ cá-áto ocabʉtiriquere mʉ joogʉmi Dio.

⁹ Dio maca manire ca-netooñupi caroorã ya paʉpʉ mani ca-yajibopere. Caroaro majuu mani cá-áti anipere boʉ mani ca-tʉjʉ bejeyupi Dio cʉ yarã ca-aniparãre. Mani majuuna caroare mani cá-átie wapa mee manire ca-tʉjʉ bejeyupi. Cʉ majuuna manire mai tʉjʉri, yʉ ca-boorore bairo na ãmaro ĩi, to bairo manire ca-tʉjʉ bejeyupi Dio. Tirʉmʉpʉ ati ʉmʉrecoo átigʉ jʉgoyepʉna Jesucristo mena mani ca-anipere ca-tʉgooñañupi.

¹⁰ To bairi ati yʉteapʉre manire ca-majioñupi Dio manire cʉ ca-mai tʉjʉrijere. Cʉ Macʉ Jesucristore ati yepapʉ cʉ ca-joorije jʉgori manire ca-majioñupi Dio manire cʉ ca-mai tʉjʉrijere. To bairi manire ca-netoo catíopaʉre cʉ ca-jooyupi Jesucristore. To bairi Jesu maca caroorã na ca-ãnopʉ mani ca-bai yajibopere ca-netoobojayupi manire. To bairona rooro ca-bairã nare cʉ ca-netoobojapere, cʉ mena mani ca-anicõa aninucupe caroa quetire mani ca-cũñupi. To bairi noa una Jesucristore ca-tʉgooña nʉcʉbʉgorã yajiquetigarãma yua.

¹¹ Tie quetire yʉ ca-buio teña rotiwĩ Dio. To bairo ácʉ apóstol, Jesu cʉ ca-buerã ca-ãnana mena macacʉre yʉre ca-cũwĩ, cʉ ye quetire ca-buio teñapaʉre.

¹² Tie jʉgori popiye yʉ tamʉo. To bairo popiye tamʉobacʉ quena ato presopʉ yʉ ca-aniere yʉ tʉgooña boboquẽe. Yʉ ca-apiʉja nʉcʉbʉgoricʉ Jesu ca-ñuu netoʉ ãmi, cá-áti majii ãmi, yʉ ĩi maji. To bairi yʉre ca-cote majii ãmi Jesu. To bairo yʉre coteri cʉ ca-tunu atíparo jʉgoye caroaro yʉ ca-bairo yʉre átigʉmi.

¹³ Caroa quetire, mʉre yʉ ca-queti buiorica wame jetorena mʉ quena aperãre na buiocõa aninucuña mʉa Timoteo. To cãnacã rʉmʉ Jesucristore cʉ tʉgooña nʉcʉbʉgoya. Cʉ̃re ca-tʉgooña nʉcʉbʉgoʉ aniri camaja quenare na maiña.

¹⁴ Dio mʉre cʉ ca-queti buio cũriquere caroaro buiocõa aninucuña. Espíritu Santo, mani mena ca-ãcʉ̃ mʉre cʉ cá-átinemoro mena cariape queti buioriquere caroaro aperãre buiocõa aninucuña.

¹⁵ Asia yepa macana yʉ mena ca-anibatana nipetirã yʉre cá-aáweocoama. Tiere mʉ majitʉgaʉ meere. Na mena macana Fijelo, to bairi Emójenes ca-wamecʉna quena yʉ cá-aáweocoama.

¹⁶ To bairo yʉre na cá-aáweobato quena Onesíforo ca-wamecʉcʉ maca yʉre cá-átinemowĩ. Presopʉ yʉ ca-aniere ca-tʉgooña boboquẽmi. Yʉre ca-tʉgooña ocabʉtiowĩ presopʉ yʉ ca-ãno, yʉre tʉjʉʉ ejaʉ. To bairi caroare cʉ joato mani Ʉpaʉ Dio Onesíforore, cʉ ya wii macana quenare.

¹⁷ Onesíforo ati maca Romapʉ ejaʉ nemoona yʉ ca-macañupi. To bairo yoaro yʉre maca, yʉ ca-bʉgacõawĩ.

¹⁸ To bairi caberopʉ mani Ʉpaʉ Dio camajare na tʉjʉ cõoñari nare cʉ ca-tʉjʉ bejeri paʉ ca-ãnopʉ caroare cʉ joato Onesíforore, caroaro yʉre cʉ cá-átinemorique jʉgori. To bairona Efeso na ca-ĩri macapʉ mani ca-ãno quena mani cá-átinemowĩ Onesíforo. Topʉ caroaro cʉ cá-átajere mʉ quena mʉ majii mere.