Yohana 9 - Sumu Yedi ya Isa Masiya 1906 Kitamo 1897 Malumbo 1905

¹ Ekivetia akawona mundu ebajikameso to kuwonwa.

² Wakambujanya waanaloshwa wakwe, wakateta, Rabbi, niani etekwie, uu kana wambona wakwe, awonwe ebajikameso.

³ Akatalwa Isa, Uu tetekwie, kana wambona wakwe, kake ti vindu vya Izuwa viwonwe hakwe.

⁴ Kiniwe kuareha vindu vyakwe eniingija, ikioka hemusi; kio kyaza esikaidima mundu kuhira.

⁵ Nikioka ghati ya masanga, ni changaji cha masanga.

⁶ Ekiteta ama akatufa mate, akaareha itondo na mate, akamwira meso ebajikameso na itondo.

⁷ Akamburra, Tonga, uoje ghati ya idingirri la Siloam (amu ichi Eingijwa). Akatonga akaoja akahunduka ekiwona.

⁸ Walatya wakwe, nawo wembonie kai ekioka mwomba, wakateta, Siye uu eikee ekiomba.

⁹ Weingi wakateta, Niye; weingi, Efwanana naye: ye akateta, Nimi.

¹⁰ Wakamburra, Meso mako mawonaze kuawija?

¹¹ Akatalwa akateta, Mundu eitangwa Isa akaareha itondo, akaniwira meso, akaniwurra, Tonga mtano idingirri la Siloam na uoje; nikatonga nikaoja nikawona.

¹² Wakamburra, Ehohi uu? Akateta, Sitisiwemi.

¹³ Wakamwete hena Mafarisayo ula eokie kuwoka ebajika meso.

¹⁴ Ukaoka musi wa Sabato ekinaarehe itondo Isa, akamjuwua meso.

¹⁵ Wakambujanyawa Mafarisayo nikini awonaze. Akawawurra, Enigere itondo mesoni, nikaoja, nawona.

¹⁶ Wakateta weingi wa Mafarisayo, Mundu uu si wa Izuwa, amu teigura Sabato. Weingi wakateta, Eidimaze mundu mwenye kutekwa kuareha maluano sa ama? Wakakughawa.

¹⁷ Wakamburrawa Wayahudi ebajikameso, We umtetiaze, ti ekujuwua meso? Akateta, Niye nabii.

¹⁸ Wayahudi tewaitikija ti eokie ebajikameso, akawona, mtano wakawaitanga wambona wakwe ula ewonie kuwona.

¹⁹ Wakawabujanya, wakateta, Uu niye mwana wenyu, mumteta ti ewonwie ebajika meso? awonaze ngeriaha kuawija?

²⁰ Wakatalwa wambona wakwe, wakateta tumtisiwe uu ti niye mwana wetu na ti ewonwie ebajikameso.

²¹ Ewonaze kuwona, totutisiwe, kana nani emjuue mesa, uswi totutisiwe: mundu mbaha uu; mbujanyeni, ang’ole mwenye mburi jakwe.

²² Wakateta ama wambona wakwe, amu wakawaondoka Wayahudi. Amu musi ula weghambie Wayahudi ti ula emratera Masiya eneng’olwa ghati ya sunagogi.

²³ Amu ii wambona wakwe wakateta, Mundu mbaha uu, Mbujanjeni.

²⁴ Wakamwitanga keri mundu eokie ebajikameso, wakamburra, Mwisise Izuwa, tumtisiwe mundu uu ni mwenye kutekwa.

²⁵ Akatalwa uu, Ti mwenye kutekwa sitisiwemi, kiteko kimwe nakitisiwa ti nikioka ebajika meso, nawona.

²⁶ Wakamburrawa, Ekuareheze? ekujuueze meso?

²⁷ Akatalwa, Namburra ngeriahaichi na tomusikia, nikiniwa mkundie kusikia? Na unwi mkunda kuoka waanaloshwa wakwe?

²⁸ Wakamrigha, wakateta, We mwanaloshwa wakwe, uswi waanaloshwa wakwe Musa.

²⁹ Tutisiwa ti na Musa etetie Izuwa, uu totumtisiwa eoho.

³⁰ Akatalwa mundu, akawawurra, Ii ni kuitalwa, ti unwi tomumtisiwe eoho, naye enijuuie meso.

³¹ Tutisiwa ti Izuwa tewasikie wenye kutekwa, kake mundu ekioka emwondoka Izuwa, ekiviareha evikundie, uu emsikia.

³² To kai teisikiwa ti mundu emjuua meso ewonwie ebajikameso.

³³ Idje teokie uu wa Izuwa idje teiidima kuareha kiteto.

³⁴ Wakatalwa wakamburra, Ghati ya kutekwa tiki uwonwie we, nawe utuelosha uswi? Wakamng’ola some.

³⁵ Akasikia Isa ti wemng’ola some, akamtorana, akamburra, Umwitikija Mwana wakwe Izuwa?

³⁶ Akatalwa uu, akateta, Niani, Bwana, nimwitikije?

³⁷ Akamburra Isa, Umbonie, naye eteta nawe niye.

³⁸ Akateta, Naitikija, Bwana, akamsemba.

³⁹ Akateta Isa, Hena uchili naza ghati ya masanga, ama, wesiwona wawone, na wewona weoke webajikameso.

⁴⁰ Wakamasikia ama Mafarisayo weoho naye, wakamburra, Na uswi tubajikameso?

⁴¹ Akawawurra Isa, Idje muokie wabajikameso, idje tomokioka na kutekwa; ngeriaha muteta ti Tuwona, na kutekwa kwenyu tekuwushijiwa.