Yohana 8 - Sumu Yedi ya Isa Masiya 1906 Kitamo 1897 Malumbo 1905

¹ Isa akatonga nduwi ya zeituni.

² Mtano heyawo kerre akaza hekaluni, wandu wose wakamzia akaikaasi, akawalosha.

³ Wakamwetia wetama na Mafarisayo mche eguriwa ekishinda, wakamwika ghati,

⁴ Wakamburra, Mlosha, mche uu eguriwa ghati ya kushinda.

⁵ Haya, ghati ya torati Musa etuwurre tuwabigie mabwi wala sa uu: we wetetaze?

⁶ Wakateta ama wemwugheshe, wewone kumlinganya. Isa akainama akatama na kichaa si.

⁷ Wekiikaa wekimbujanya akakuwushija, akawawurra, Ula wenyu esitekwa amgere ibwe la kuwoka.

⁸ Akainamawa, akatamasi.

⁹ Wala wekisikia, wekichiliwa na ngoro, wakafuma mwe mwe, kuoka wala waghosi mtano wa kuidiwa, wakamshiga Isa mwenye na mche ekioka ghati.

¹⁰ Akakuwushija Isa, esiwone mundu nde mche, akamburra, Wehohi wala wekulinganye? tehena ekuchilia?

¹¹ Akateta, Tehena, Bwana. Akamburra Isa, Na mi sikuchilia, tonga usitekwewa.

¹² Isa akaghamba nawo, ekiteta, Mi ni changaji cha masanga, eniratera tesela kijeni kake enewona changaji cha moo.

¹³ Wakamburra Mafarisayo, Ukuwondjia mburi, mburi yako si ya kididi.

¹⁴ Akatalwa Isa, akawawurra, Mi nikikuwondjia mburi, mburi yangu ya kididi: amu natisiwa handu nifumie na nitonga; unwi tomtisiwe handu nifumie nete nitonga.

¹⁵ Unwi mchilia na muri; mi simchilia mundu.

¹⁶ Mtano nikichilia mi, nchili wangu una kididi, amu mi si mwenye tiki, kake mi na Apa eniingija.

¹⁷ Ghati ya torati yenyu itamiwe, ti wandu weri wekiwondja mburi, mburi yawo ya kididi.

¹⁸ Mi nakuwondjia mburi mwenye, na Apa eniingija eniwondjia mburi.

¹⁹ Wakamburra, Wawee wako ehohi? Akatalwa Isa, Tomnitisiwe mi kana Apa wangu; idje munitisiwe mi idje munitisiwe na Apa wangu.

²⁰ Viteto ivi akaviteta ghati ya wodjiwo wa fetha, ekilosha hekaluni: na mundu temgurie amu saa yakwe teimezayo.

²¹ Akawawurrawa, Natonga hangu, na unwi mnenienda, mnefwa hena kutekwa kwenyu, nitongaho mi, unwi tomuidima kuza.

²² Wakateta Wayahudi, Enekukoma? amu ateta, Nitongaho mi, unwi tomuidima kuza.

²³ Akawawurra, Unwi wa si; mi wa wanga, unwi wa masanga ama; mi si wa masanga ama.

²⁴ Namburra, ti mnefwa hena kutekwa kwenyu: msikaitikija ti mi niye, mnefwa hena kutekwa kwenyu.

²⁵ Wakamburra, Niani we? Akawawurra Isa, Ula sandu kuwoka nitetie henyu.

²⁶ Nivyo vingi nina nimtetie, nichile: kake eniingija niye wa kididi; nami vila nivisikia hakwe, ivi niviteta masangeni.

²⁷ Tewatisiwe ti ewatetie Apa.

²⁸ Akawawurra Isa, Mnekamkweja Mwana wa Adamu, niho mnenitisiwa nimi niye, na siareha kiteto na mburi yangu mi, nde sandu eniloshie Apa wangu, huwo nateta.

²⁹ Naye eniingija eoho hamwe nami: Apa tenishiga mwenye, amu mi naviareha misi ose vindu vimwizihiria.

³⁰ Ekimateta ama wengi wakamwitikija.

³¹ Akawawurra Isa Wayahudi wala wemwitikija, Mkiikaa ghati ya viteto vyangu, mwoka waanaloshwa wangu wa kididi.

³² Mnevitisiwa viokie kididi, na viokie kididi vinemwareha huru.

³³ Wakamtalwa, Uswi wawonwa wakwe Ibrahimu, na totuokie pia wazoro wa mundu, wetetaze, ti mneoka huru?

³⁴ Akawatalwa Isa, Amin, amin, namburra, Ula etekwa ni esinga la kutekwa.

³⁵ Esinga teikaa nyumbani tendarasi: mwana eikaa tendarasi.

³⁶ Mwana ekimbika huru mneoka huru kididi.

³⁷ Namtisiwa ti wawonwa wakwe Ibrahimu; kake mkundie kunikoma, amu kiteto changu tekina handu henyu.

³⁸ Mi naviteta vila niviwonie hena Apa wangu, na unwi tomuviareha vila mviwonie hena wawawee wenyu.

³⁹ Wakatalwa wakamburra, Apa wetu niye Ibrahimu. Akamburra Isa, Idje mweokie waana wakwe Ibrahimu, idje mviareha vindu vyakwe Ibrahimu.

⁴⁰ Ngeriaha mkunda kunikoma, mundu nimburrie voikie vya kididi, nivisikia hena Izuwa, tearehe huwo Ibrahimu.

⁴¹ Unwi mviareha vindu vya wawaweeo wenyu. Wakamburra, Uswi si waana wa mbuya, tuna Apa mwe, niye Izuwa.

⁴² Akawawurra Isa, Idje Izuwa eokie waweeo wenyu, idje mwanikunda mi, amu nafuma hakwe Izuwa, na sizie hena mburi yangu mi, kake yake eniingije.

⁴³ Nikini tomtisiwa vila niviteta? Amu tomuidima kusikia kiteto changu.

⁴⁴ Unwi wa waweeo Shetani, mkunda kumaareha maluso ma waweeo wenyu. Ula to kuwoka ni mkoma, na teikee ghati ya kididi, amu kididi tekioho ndeni hakwe. Ekiteta maongo eteta kiokie chakwe, amu ni maongo na wawee wakwe.

⁴⁵ Mi nikiteta kididi, tomniitikija.

⁴⁶ Niani wenyu eniwona mwenye kutekwa? Nikiteta kididi, nikini unwi tomniitija?

⁴⁷ Eokie wa Izuwa evisikia vila eviteta Izuwa; amu ii tomsikia amu si unwi wa Izuwa.

⁴⁸ Wakatalwa Wayahudi, wakamburra, Totuteta nezo, ti Msamaria we, na una luhungu?

⁴⁹ Akatalwa Isa, Mi sina luhungu; kake namguria nganyi Apa wangu, na unwi tomniguria nganyi mi.

⁵⁰ Mi sikundiemi niisiswe, eoho ekundie na echila.

⁵¹ Amin, amin, namburra, mundu ekikigura kiteto changu tenewona kufwa tendarasi.

⁵² Wakamburra Wayahudi, Ngeriaha tutisiwa ti una luhungu. Ibrahimu efwie, na nabii, nawe wateta mundu ekikigura kiteto changu tenewona kufwa tendarasi.

⁵³ We mbaha kukela Apa wetu Ibrahimu, efwie? nawo nabii wefwie: ukuareha niwani?

⁵⁴ Akatalwa Isa, Nikikuisisa mwenye, kuisiswa kwangu si kiteto. Apa niye enisisa, mumteta ti niye Izuwa wenyu.

⁵⁵ Na tomumtisiwe, mi nimtisiwe, nikighamba simtisiwe, nineoka sa unwi, wa maongo, kake nimtisiwa nikigura kiteto chakwe.

⁵⁶ Ibrahimu wawee wenyu eizihiriwe auwone musi wangu, akauwona, akaizihirwa.

⁵⁷ Wakamburra Wayahudi, Toumefika miaka makumi masano, umbonie Ibrahimu?

⁵⁸ Akawawurra Isa, Amin, amin, namburra, kuwoka kwa kuoka Ibrahimu, nioho mi.

⁵⁹ Wakawushija mabwe wamgere: kake Isa akatesia, akafuma ghati ya hekalu, ekitonga ghati yawo, huwo akavetia.